ރިޔާސީ ދެވަނަ ދައުރަކަށް ވެރިކަން ކުރެވެން އޮންނަ އުސޫލު ބަދަލުކުރަން ޖެހޭކަމަށް ދެކެވަޑައިގަންނަވާކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
ކެމްޕެއިންގައި އދ.ދިއްދުއަށް ވަޑައިގެން ވާހަކަފުޅު ދައްކަވަމުން ޤާސިމް ވިދާޅުވީ، ޤާނޫނު އަސާސީގައި ދެ ދައުރަށް ވެރިކަން ކުރެވެން އޮންނަ އުސޫލު ބަދަލުކުރަން ފެނިވަޑައިގަންނަވާކަމަށެވެ، އެއީ ދެވަނަ ދައުރަކަށް ކުރިމަތިލައްވާއިރު ސަރުކާރުން އިންތިޚާބަށް އިންތިހާއަށް ނުފޫޒް ފޯރުވާތީކަމަށްވެސް ޤާސިމް ވިދާޅުވިއެވެ. އެގޮތުން ފަސް އަހަރުގެ ދައުރު 7 އަހަރަށް ދިގުކޮށްގެންވެސް އެއްދައުރު ކުރެވޭގޮތް ހަދަން ޖެހޭކަމަށް ޤާސިމް ވިދާޅުވިއެވެ.
މި އޮންނަ ފަސް އަހަރު 7 އަހަރަށް ދިގުކޮށްގެންވެސް އެއް ދައުރު ކޮންމެ މީހަކަށްވެސް ލިބޭނީ ބުނެފިއްޔާ ޤާނޫނާ ޚިލާފްވެގެން މަސައްކަތް ކުރުމުގެ ބޭނުމެއް ނެތްތާ..
– ޤާސިމް ވިދާޅުވިއެވެ.
ދެވަނަ ދައުރެއް ނުލިބޭގޮތަށް ކަނޑައަޅައިފިނަމަ ވެރިކަންކުރާ ޕާޓިން އެހެން ކެންޑިޑޭޓެއް ނެރުމުގެ ފުރުޞަތު އޮންނާނެކަންވެސް ޤާސިމް ފާހަގަކުރެއްވިއެވެ.
ކުރިއަށް އޮތް ރިޔާސީ އިންތިޚާބަށް ދައުލަތުގެ މުވައްޒަފުންނާއި ވަޞީލަތް ވެރިކަންކުރާ މައި ޕާޓީގެ ރިޔާސީ ކެންޑިޑޭޓް ބޭނުންކުރައްވަމުން އަންނަކަަމށް ތުހުމަތުކުރައްވާ ޤާސިމް އަންނަނީ އެކަމުގެ ކަންބޮޑުވުން ފާޅުކުރައްވަމުންނެވެ.
