ޗައިނާ މޯލްޑިވްސް ފްރެންޑްޝިޕް ބްރިޖަކީ ތަރައްޤީގެ ބާނީ ރައީސް ޔާމީންގެ އިރުޝާދުގެ ދަށުން ފެންނަ އޮތް ޑރ.މުހައްމަދު މުއިއްޒުގެ މަސައްކަތުގެ އަލިގަދަ ރަމްޒެއް ކަމުގައި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.
ރިޔާސީ ކެމްޕޭންގައި ވަރަށް ބުރަކޮށް އެކި ރަށްރަކަށް ދަތުރު ކުރައްވަމުން މާލޭގައި ހުންނަވާ މަދު ވަގުތުތަކުގައި ޑރ.މުއިއްޒު ގެންދަވަނީ އެކި ދާއިރާތަކުގެ ބޭފުޅުންނާއި ބައްދަލު ކުރައްވައި މަޝްވަރާތައް ކުރައްވަމުންނެވެ. އެގޮތުން މިއަދު ޓެކްސީ ޑްރައިވަރުންނާއިއެކު ބޭއްވި ބައްދަލުވުމުގައި ޕީޕީއެމްގެ ނައިބް ރައީސް ޝިޔާމް ވިދާޅުވީ ސިނަމާލެ ބްރިޖަކީ މާލެ ސަރަހައްދުގެ އުމްރާނީ އަދި އިޤްތިސާދީ ތަރައްޤީއަށް އެޅުނު މުހިންމު ފިޔަވަޅެއް ކަމަށެވެ.
ރައީސް ޔާމީންގެ އިރުޝާދާއި ލަފާފުޅުގެ މަތީން ބްރިޖުގެ މަސައްކަތް އެމަނިކުފާނު ނިންމަވަން ދެއްވި ތާރީހަށް ނިންމަވައި މަސައްކަތުގައި އަމަލީގޮތުން ބައިވެރިވި މޭސްތެރިއަކީ މިހާރުގެ ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ.މުއިއްޒު ކަމަށް ޝިޔާމް ވިދާޅުވިއެވެ. މި ބްރިޖާއިއެކު އެންމެ ބޮޑު ހިތްހަމަޖެހުމެއް ލިބިގެންދިޔަ އެއްބަޔަކީ ޓެކްސީ ޑްރައިވަރުން ކަން ޝިޔާމް ފާހަގަ ކުރެއްވިއެވެ.
ހަމައެކަނި މާލެ ތެރޭގައި ދުއްވައިގެން ލިބޭ އާމްދަނީއަށް ބަރޯސާ ވުމުގެ ބަދަލުގައި ބްރިޖާއެކު، ހުޅުމާލެ ހުޅުލޭގެ ދަތުރުތައް ލިބި، ޑްރައިވަރުންގެ ޢާމްދަނީއަށް ބޮޑު ކުރިއެރުމެއް ލިބުނުކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ ޓެކްސީ ޑްރައިވަރުންނަށް ޑރ.މުއިއްޒުގެ ވެރިކަމުގައި އެދިވަޑައިގަންނަވާ ކަންކަން ކޮށްދެއްވާނެކަމުގެ ޔަގީންކަން އޮތްކަމަށެވެ. ޑްރައިވަރުންނަށް ޤާނޫނީ ގޮތުންވެސް ކަންކަން ކުރެވޭނެ މަގު ފަހިވެގެންދާނީ ޤައުމީ ދަފްތަރެއް އެކުލަވާ ލެވިގެންކަން ފާހަގަކޮށް ޝިޔާމް ވަނީ ވެރިކަމައި ހަވާލުވުމަށްފަހު ޑރ.މުއިއްޒު އެކަން ކުރައްވާނެކަމަށް ވިދާޅުވެފައެވެ.
އަދި ޑްރައިވައިންނަށް ފްލެޓު ލިބޭނެ ގޮތް ހަމަޖެއްސުމާއި، ޕާކިން މައްސަލަތަކާއި، ސްޓިކާ ޖެހުމުގެ މައްސަލައަށްވެސް ދާއިމީ ހައްލު ހޯއްދަވައި ދެއްވާނެ ކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ ޑރ.މުއިއްޒަކީ ރައީސް ޔާމީންގެ ތަރައްޤީގެ އެންމެ ބޮޑު ހިއްސާދާރު ކަމަށްވާއިރު ތަރައްޤީކޮށް ގައުމު އާރާސްތު ކުރުން ނޫން ވިސްނުމެއް ޑރ. މުއިއްޒުގެ ނުހުންނަވާނެކަމަށެވެ.
