އެމްޑީޕީ ރޫޅާ ނުލެވުނު ކަމަށާއި، ރޫޅިގެން ދިޔައީ އެހެން މީހުންކަމަށް ވިދާޅުވެ އެމްޑީޕީގެ ޗެއާޕާސަން ފައްޔާޒު އިސްމާއިލްގެ ބަހުގެ ހަމަލާއެއް އެމްޑީޕީގެ ކުރީގެ ރައީސް މުހައްމަދު ނަޝީދަށް ދެއްވައިފިއެވެ.
އެމްޑީޕީގެ ރިޔާސީ ޕްރައިމަރީގައި އުފެދުނު ޚިޔާލް ތަފާތުވުންތަކާއިއެކު ރައީސް ނަޝީދު ވަނީ އެޕާޓީން ވަކިވެ ދަ ޑިމޮކްރެޓްސްއާއި ގުޅިފައެވެ. ރައީސް ނަޝީދު ޑިމޮކްރެޓްސްއަށް ސޮއި ކުރުމަށްފަހު ބޭއްވި ފުރަތަމަ ޖަލްސާގައި ވިދާޅުވީ އެމްޑީޕީ ރޫޅާލާނެކަމަށެވެ. އަދި އެމްޑީޕީ އަކީ އޭނާކަމަށްވެސް ނަޝީދު ވަނީ އޭރު ވިދާޅުވެފައެވެ.
އެމްޑީޕީ ރޫޅާލުމަށް ކުރި މަސައްކަތުން ނަޝީދު ވަނީ މަޖިލީހުގެ 13 މެމްބަރަކުވެސް ޑިމޮކްރެޓްސްއަށް ގެންގޮސްފައެވެ. ނަމަވެސް އެމެމްބަރުންވެސް ނަޝީދަށް ނުހިފެހެއްޓުނެވެ. އޭގެ ތެރެއިން ތޮއްޑޫ ދާއިރާގެ މެމްބަރު ހަސަން ޝިޔާންއާއި، ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފު ވެސް ވަނީ އަލުން އެމްޑީޕީއާއި ގުޅިފައެވެ.
މިރޭ ހުޅުމާލޭ ފޭސް ދޭއްގައި ބޭއްވި އިވެންޓުގައި ފައްޔާޒް ވަނީ އެމްޑީޕީ ރޫޅާލުމަށް ގިނަ ބަޔަކު އަތުގުޅާލި ނަމަވެސް އެ ޕާޓީ ނުރޫޅޭ ކަމަށް ވިދާޅުވެފައެވެ. އަލަށް އެމްޑީޕީ އާއި ގިނަ ބަޔަކު ގުޅުމަކީ އުފާކުރައްވާ ކަމެއް ކަމަށާއި އެ ޕާޓީ އަކީ އާ މޫނުތަކަށް އަބަދުވެސް މަރުޚަބާ ކިޔާނެ ޕާޓީ އެއް ކަަމަށް ފައްޔާޒް ވަނީ ވިދާޅުވެފައެވެ. އަދި ހުކުރު ދުވަހުގެ ރެއަކީ ހުޅުމާލެ އަށް ބޮޑު ގުޑުމެއް އަރާނެ ރެއެއް ކަމަށް ފައްޔާޒް ވަނީ ވިދާޅުވެފައެވެ.
ފައްޔާޒް ވަނީ އެމްޑީޕީ އަކީ އަބަަދުވެސް އެތެރޭގެ ވާދަވެރިކަން ބޮޑު ޕާޓީ އެއް ކަމަށް ވިދާޅުވެފައެވެ. އެމްޑިޕީ ވަރުގަދަވެގެން ދަނީ އެތެރޭގެ ވާދަވެރިކަމުގެ ސަބަބުން ކަމަށް ވެސް ފައްޔާޒް ވަނީ ވިދާޅުވެފައެވެ. ހަމައެހެންމެ އެމްޑީޕީ ކުރިއަރާ ދަނީ ވެސް އެ ސަބަބާއި ހުރެ ކަމަށް އޭނާ ވަނީ ވިދާޅުވެފައެވެ. މީގެ އިތުރުން އަލަށް އަންނަ މީހުންނަށް ވެސް މަސައްކަތް ކޮށްގެން ޕާޓީގެ އެންމެ ކުރީ ސަފަށް އެރުމުގެ ފުރުސަތު އޮންނާނެ ކަމަށާއި އެއީ އެންމެނަށް ވެސް އޮންނާނެ ފުރުސަތެއް ކަމަށް ފައްޔާޒް ވިދާޅުވިއެވެ.
