ރިޔާސީ އިންތިޚާބުގައި ޖުމްހޫރީ ޕާޓީގެ ޓިކެޓްގައި ވާދަކުރައްވާ ޤާސިމް އިބްރާހިމްގެ ރަނިންމޭޓް އަމީން އިބްރާހިމް ލ.އަތޮޅަށް ވަޑައިގެންނެވުމުން ހޫނު މަރުހަބާއެއް ދަންނަވައިފިއެވެ.
މިދަތުރަކީ ރިޔާސީ ކެމްޕޭންގެ ހަރަކާތްތައް ލ.އަތޮޅުގައި ކުރިއަށް ގެންދިއުމަށް ހިންގާ ޚާއްސަ ހަރަކާތުގެ ތެރެއިން ކުރައްވާ ދަތުރުފުޅެކެވެ. މިދަތުރުގައި ކުރީގެ ހެލްތު މިނިސްޓަރ އަދި ޤާސިމްގެ ތަރުޖަމާން އަމީންއާއި، ވިލިފުށީ ދާއިރާގެ ކުރީގެ މެމްބަރު ރިޔާޒު ރަޝީދު ބައިވެރިވެ ވަޑައިގަންނަވައެވެ.
މުޅި ރާއްޖޭގައި ކެމްޕޭން ކުރުމަށް ކުޑަ ދުވަސްކޮޅަކަށް ވެފައިވުމުން ޖުމްހޫރީ ޕާޓީންވެސް ގެންދަވަނީ ޓީމުތަކަށް ބަހާލައިގެން މުޅި ރާއްޖެ ކަވަރު ކުރުމަށް މަސައްކަތް ކުރަމުންނެވެ.
ޤައުމީ ކެންޑިޑޭޓް އޮނަރަބްލް ޤާސިމް އިބްރާހީމްގެ ރަނިންގމޭޓް ޑރ.އަމީން އިބްރާހީމްގެ ރިޔާސީ ކެމްޕެއިނަށް ލ.ގަމު ރައްޔިތުން މަރުހަބާއެއް ދަންނަވައިފި pic.twitter.com/CvpcAieg4Y
— QasimAmeen2023 (@qasim2023mv) August 23, 2023
ޖުމްހޫރީ ޕާޓީން މިފަހަރުގެ ރިޔާސީ އިންތިޚާބުގައި ވާދަކުރާއިރު އެޕާޓީން އަމާޒު ކުރަނީ ދެވަނަ ބުރަކަށް ދިއުމަށެވެ. ކެމްޕޭންގައި ޤާސިމް ގެންދަވަނީ ނ.އަތޮޅުގެ ރަށްތަކަށް ވަޑައިގަންނަވަމުންނެވެ. 2008 ވަނަ އަހަރުން ފެށިގެން މިހާތަނަށް ބޭއްވި ކޮންމެ ރިޔާސީ އިންތިޚާބެއްގައި ވާދަ ކުރައްވާފައިވާ ޤާސިމަކީ މިހާތަނަށް އުފެދުނު ކޮންމެ ވެރިކަމެއްގެވެސް އެންމެ މުހިންމު ބައިިވެރިޔާއެވެ.
