އެއްވެސް މީހަކާ ދޭތެރޭގައި ހަސަދަވެރިކަމެއް ނެތް ކަމަށާއި އޭނާ އަށް އަނިޔާ ކުރި މީހުންނާ ދޭތެރޭގައި ވެސް ހަސަދައެއް ނެތް ކަމަށް ޖުމްހޫރީ ޕާޓީ (ޖޭޕީ) ގެ ލީޑަރު އަދި ރިޔާސީ ކެންޑިޑޭޓު ގާސިމް އިބްރާހިމް ށ. ފޭދޫގައި މިއަދު ވިދާޅުވެއްޖެއެވެ.
އަންނަ މަހުގެ 9 ގައި އޮންނަ ރިޔާސީ އިންތިހާބުގެ ކެމްޕެއިނަށް ރަށްތަކަށް ކުރައްވަމުން ގެންދަވާ ދަތުރުގެ ތެރެއިން ފޭދު އަށް ވަޑައިގެން އެ ރަށުގައި ތިބި ސަޕޯޓަރުންނާ ބައްދަލު ކުރައްވައި ގާސިމް ވިދާޅުވީ ކުރީގެ ރައީސް ޔާމީންގެ ވެރިކަމުގައި ފެނުނީ ރައްޔިތުންގެ ފަރާތުން ލޯތްބާއި އިހްތިރާމް ވަކި ބޭފުޅަކަށް ލިބިދާނެތީ ވިޔަފާރިވެރިންނަށް ހުރަސް އެޅި މަންޒަރު ކަމަށެވެ.
އަދި ޔާމީންގެ އެއްބަފާ ބޭބޭފުޅު، ކުރީގެ ރައީސް މައުމޫން އަބްދުލްގައްޔޫމް ޖަލަށްލުމަކީ ޔާމީން އަމިއްލަ އެދުމުން ފޯވެފައި ހުރި މިންވަރު ދައްކުވައި ދިން ކަމެއް ކަމަށް ވިދާޅުވިއެވެ.
"އަޅުގަނޑުމެން އެއްވެސް މީހަކު ދެކެ ރުޅި ނާދެ، ހަސަދަވެރިއެއް ވެސް ނުވޭ. އަނިޔާ ކުރި މީހުންނަށް ވެސް ހަސަދަވެރިއެއް ނުވޭ. ރައީސް ނަޝީދުގެ ވެރިކަމުގައި އަޅުގަނޑު ޖަލަށްލި. ޔާމީންގެ ވެރިކަމުގައި ޖަލަށްލި ދެ ފަހަރަށް. ޔާމީނަށް ވެރިކަން ހޯދައި ދިނީމަ، އަޅުގަނޑު ނަގައި ހޫރާލީ،" ރައީސް އިބްރާހިމް މުހައްމަދު ސޯލިހްގެ ސަރުކާރުން ވެސް އަމަލު ކުރަމުން ދަނީ އެގޮތަށް ކަން ފާހަގަ ކުރައްވައި ގާސިމް ވިދާޅުވިއެވެ.
ގާސިމް ވިދާޅުވީ އޭނާގެ ވިޔަފާރިތަކަކީ ދިވެހި ރައްޔިތުންނަށް އަގުހެޔޮކޮށް އެއްޗެހި ހޯދައި ދިނުމަށް ކުރާ ވިޔަފާރިއެއް ކަމަށެވެ.
އެއީ ތެޔޮ ވިއްކުން ކަމަށް ވިޔަސް، ހިލަ އާއި ހިލަވެލި ވިއްކުން ކަމަށް ވިޔަސް، އަދި ގޭސް ވިއްކި ކަމުގައި ވިޔަސް، އަދި އެއާލައިން ކަމުގައި ވިޔަސް، އަދި މަސް ކުންފުނި ކަމަށްވިޔަސް، އަޅުގަނޑުމެން އޭގެ ތެރޭގައި ތިބެގެން މަސައްކަތް ކުރަނީ. އެހެންވުމުން ސަރުކާރުން ބޭނުންވާ ވަރަށް އަގު މައްޗަށް ޖައްސާލުމުގެ ފުރުސަތެއް އެމީހުންނަށް ނެތް.
– ގާސިމް ވިދާޅުވިއެވެ.
ގާސިމް ވިދާޅުވި ގޮތުގައި އޭނާ އަށް ލިބެންވާ ފައިދާގެ %60 ހަރަދު ކުރައްވާފައި ވަނީ އިންސާނިއްޔަތަށްޓަކައި އަދި ގައުމުގެ ކުރިއެރުމަށްޓަކައެވެ. އަދި އޭނާގެ އެހީތެރިކަން އިޖުތިމާއީ ކަންކަމަށާއި ކްލަބް، ޖަމިއްޔާތަކާއި ރަށް ރަށުގެ އެކި ކަންކަމަށް ލިބިފައިވާ ކަމަށް އޭނާ ވިދާޅުވިއެވެ.
ކޮމެންޓު ފޮނުވާ