ރިޔާސީ އިންތިޚާބު އޮބްޒާވު ކުރުމަށާއި، މޮނިޓަރ ކުރުމަށް 8،152 އެޕްލިކޭޝަން ލިބިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
މޮނިޓަރުންނާއި އޮބްޒާވަރުންނަށް ވުމަށް ހުށަހެޅުމުގެ ސުންގަޑި ހަމަވީ އިއްޔެއެވެ. އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވީ ރިޔާސީ އިންތިޚާބު ހާމަކަން ބޮޑުކޮށް މިނިވަން ކަމާއިއެކު ކުރިއަށް ގެންދިއުމަށް އިލެކްޝަންސް ކޮމިޝަނުން އިންތިޚާބު އޮބްޒާވު ކުރުމަށާއި، މޮނިޓަރ ކުރުމަށް ހުޅުވާލި ފުރުސަތުގައި ބޮޑު ތަރުހީބެއް ލިބިފައިވާކަމަށެވެ.
ހަބީބް ވިދާޅުވީ ރިޔާސީ އިންތިހާބު މޮނިޓަރ ކުރުމަށްޓަކައި، ރާއްޖޭގެ މީޑިއާތަކުން މޮނިޓަރުންގެ ގޮތުގައި، 4،545 އެޕްލިކޭޝަން ލިބިފައިވާކަމަށެވެ. އަދި އިންތިހާބުގެ އޮބްޒާވަރުންގެ ގޮތުގައި، ސިޔާސީ ޕާޓީތަކުންނާއި، ޖަމްޢިއްޔާ ޖަމާޢަތްތަކުންނާއި އަމިއްލަގޮތުން ކުރިމަތިލެއްވި ބޭފުޅުންނާއެކު 3،607 އެޕްލިކޭޝަން ލިބިފައިވާކަމަށެވެ.
އޮބްޒާވަރުންނާއި، މޮނިޓަރުންގެ ގޮތުގައި، އެކޮމިޝަނަށް ޖުމްލަ 8152 އެޕްލިކޭޝަން ރާއްޖޭން ލިބިފައިވާކަމަށްވެސް ހަބީބް ވިދާޅުވިއެވެ. ކޮމިޝަނުން މިހާރު ކުރަމުން ދަނީ އެޕްލިކޭޝަންތަކުގެ މަޢުލޫމާތު ކަށަވަރުކޮށް އެކްރެޑިޓް ކުރުމުގެ މަސައްކަތެވެ.
ރިޔާސީ އިންތިހާބުގައި 574 ވޯޓުލާ މަރުކަޒު ގާއިމް ކުރެވޭއިރު، ކޮންމެ ވޯޓުލާ މަރުކަޒެއްގައި، ރާއްޖެއިން ގާތްގަނޑަކަށް 14 ބޭފުޅުން، އިންތިހާބު އޮބްޒާވްކޮށް މޮނިޓަރ ކުރުމަކީ، އިންތިހާބުގެ ކަންކަން ގާނޫނާއި ގަވާއިދުގެ އިމުގެ ތެރެއިން ކުރިޔަށް ގެންދިޔުމަށް، އީސީ އަށް ލިބިގެންދާ ވަރަށްބޮޑު ހިތްވަރެއްކަމަށް ހަބީބް ވިދާޅުވިއެވެ.
ރާއްޖޭގެ މޮނިޓަރުންނާއި، އޮބްޒާވަރުންގެ އިތުރުން، އިންޓަރނޭޝަނަލް އޮބްޒާވަރުންނާއި މޮނިޓަރުންގެ އޮބްޒަރވޭޝަންތަކާއެކު، ރިޔާސީ އިންތިހާބު 2023 ވެގެންދާނީ، އެންމެ ރަނގަޅަށް، އެންމެ ގިނަ އަދަދެއްގެ ބޭފުޅުން، އޮބްޒާވްކޮށް މޮނިޓަރ ކުރެވޭނެ އިންތިޚާބަށްކަމަށް ހަބީބް ވިދާޅުވިއެވެ. މިއިންތިޚާބުގައި 150 އަށްވުރެ ގިނަ ބޭރުގެ އޮފިޝަލުން ހަރަކާތްތެރިވާނެކަމަށް ބެލެވެއެވެ.
