ސަރުކާރުގެ ބޯހިޔާވަހިކަމުގެ ޕްރޮގްރާމުގެ ދަށުން ވެރި ރަށް މާލެ ސަރަހައްދުން ގޯތި ލިބުނު މީހުންނަށް އެ ގޯތި ލިބޭ ސަރަހައްދު ކަނޑައެޅުމަށް މާދަމާ ހެނދުނު 11:00 އިން ފެށިގެން ގުރު ނަގާނެ ކަމަށާއި ގުރުއަތުލުމަށް ހާޒިރު ނުވެވޭ މީހުންގެ ބަދަލުގައި ގުރު ނަގާނީ އެކަމަށް ކަނޑައަޅާފައިވާ ހާއްސަ އޮފިޝަލުން ކަމަށް ހައުސިން މިނިސްޓްރީން ހާމަކޮށްފިއެވެ.
ސަރުކާރުގެ "ބިންވެރިޔާ" ސްކީމްގެ ދަށުން ގޯއްޗަށް 18،955 ފަރާތެއް ޝަރުތު ހަމަވެފައިވާ އިރު އެ ފަރާތްތަކަށް ގޯތި ލިބޭ ތަންތަން ކަނޑައެޅުމަށް ގުރުއަތު ނެގުން ފަށަނީ ގަލޮޅު ދަނޑުގައި މާދަމާ މެންދުރު 11:00 ގައެވެ. އެކަމާ ބެހޭ ގޮތުން މައުލޫމާތު ދިނުމަށް މިރޭ ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ ގުރުލަމުން ދާއިރު ހުޅުމާލެ އިން ގޯތި ލިބޭ ފަރާތްތަކަށް ގޯތި ކެނޑުމުގެ މަސައްކަތް މާދަމާ ފަށާނެ ކަމަށެވެ. އެ ފަރާތްތަކަށް ޕްލޮޓު ނަމްބަރު އެނގުމުން ވަކިން ގުޅައި ބިން ކަނޑަން ދާންވީ ތަނާއި ވަގުތު އަންގާނެ ކަމަށް އާރިފް ވިދާޅުވިއެވެ.
މިވަގުތު އެވައިލަބަލް ބިންތަކުން ގުރުއަތުން ދިމާވާ ބޭފުޅުންނަށް ވަކިން ގުޅުއްވާނެ. ޕްލޮޓު ކަނޑަން ދާންވީ ވަގުތާއި ތަން. މާދަމާ ހަވީރު ޕްލޮޓު ކަނޑާ ދިނުމުގެ މަސައްކަތް ފެށުމަށް ވަނީ ހަމަޖެހިފައި.
– އާރިފް ވިދާޅުވިއެވެ.
ގުރު ނަގާއިރު ކަރުދާސްކޮޅުގައި ލިބޭ ގޯތީގެ ލޯކޭޝަނާއި ލޮޓު ނަންބަރު އެނގިގެންދާނެ ކަމަށް ވެސް އާރިފް ވިދާޅުވި އެވެ. އަދި, ހާޒިރު ނުވެވޭ ހާލަތެއްގައި ވެސް ގުރު ނެގުން މެދުނުކެނޑި ކުރިއަށްގެންދިޔުމުގެ ގޮތުން އެ މީހެއްގެ ބަދަލުގައި ބައިވެރިވާނީ އޮފިޝަލެއް ކަމަށް ސަރުކާރުން ވަނީ މިރޭ ބުނެފަ އެވެ.
ޓައިމް ޕީރިއަޑް ތެރޭގައި ވަޑައިނުގެންފިނަމަ ހަމަޖައްސާފައި މިއޮތީ އޮފިޝަލުން ތިބޭނެ އެކަމަށް ހާއްސަ ކުރެވިފަ ތިބި, ގުރުލާން. އޭގެ ތެރެއިން އޮފިޝަލަކު އެ ބޭފުޅެއްގެ ބަދަލުގައި ގުރުލާނީ. މިކަން ހިނގާނީ މީޑިއާ ކުރިމަތީގައި.
– ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު، މުހައްމަދު އާރިފް ވިދާޅުވިއެވެ.
އަދި, ގުރުލަމުންދާ ވަރަކުން ގޯތި ކަނޑަމުންދާނެ ކަމަށާއި މިވަގުތު ހުޅުމާލޭގައި ހުރި ބިންތައް ގުރުއަތުން ލިބޭ މީހުންނަށް ވަކިން ގުޅައި ޕްލޮޓު ކަނޑަން ދާންވީ ވަގުތާއި ތަން އަންގާނެ ކަމަށް ވެސް ޕްލޭނިން މިނިސްޓްރީން ވަނީ ހާމަކޮށްފައެވެ. އެގޮތުން, މާދަމާ ހަވީރު ގޯތި ކަނޑަން ފަށާނެ ކަމަށް ވެސް ޕްލޭނިން މިނިސްޓްރީން ބުންޏެވެ.
ބިންވެރިޔާ ސްކީމުގެ ގޯތީގެ ބޮޑުމިނާއި ދޫކުރާ ތަންތަން:
– 1250 އަކަފޫޓު – 3551 ގޯތި (ހުޅުމާލެ 250, ގުޅީފަޅު 260, ގިރާވަރު 3041)
– 1650 އަކަފޫޓޫ – 2802 ގޯތި (ހުޅުމާލެ 340, ގުޅީފަޅު 558, ގިރާވަރުފަޅު 1904)
– 2050 އަކަފޫޓު – 1547 ގޯތި (ހުޅުމާލެ 370, ގުޅީފަޅު 690, ގިރާވަރުފަޅު 487)
– 2450 އަކަފޫޓު – 656 ގޯތި (ހުޅުމާލެ 180, ގުޅީފަޅު 476)
– 2850 އަކަފޫޓު – 254 ގޯތި (ހުޅުމާލެ 100, ގުޅީފަޅު 154)
– 3250 އަކަފޫޓު – 109 ގޯތި (ހުޅުމާލެ 60, ގުޅީފަޅު 49)
– 3650 އަކަފޫޓު – 53 ގޯތި (ހުޅުމާލެ 31, ގުޅީފަޅު 22)
– 4000 އަކަފޫޓު – 29 ގޯތި (ހުޅުމާލެ 20, ގުޅީފަޅު 9)
އޭގެ ތެރެއިން، 1250 އަކަފޫޓުގެ 3551 ގޯއްޗަކީ, ސިންގަލް އެޕްލިކަންޓުންގެ ގޮތުގައި ހުށަހަޅައިގެން ގޯތި ލިބުނު މީހުންނެވެ. އަދި 1650 އަކަފޫޓުގެ 2802 ގޯއްޗަކީ, ދެ މީހަކު އެކުވެގެން އެޕްލިކޭޝަން ހުށަހެޅި މީހުންނެވެ.
