ރާއްޖޭގެ އެކި ކަންކޮޅުތަކަށް ދެން އުފެދޭ ޕްރޮގްރެސިވް ކޯލިޝަންގެ ސަރުކާރެއްގައި ތަރައްޤީ ގެނެސްދޭނީ އެއްވެސް ތަފާތުކުރުމެއް ނެތި ހަމަހަމަ ކަމާއިއެކުގައި ކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ހޯރަފުއްޓަށް ވަޑައިގެން އެރަށުގެ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުން ޑރ.މުއިއްޒު ވިދާޅުވީ މިސަރުކާރުގެ ރާއްޖޭގެ އެކި ރަށްރަށަށް ވެފައިވާ އިހުމާލު ރަށްރަށަށް ވަޑައިގެންނެވުމުން ރައްޔިތުން ހިއްސާ ކުރާ ކަންކަމުން ހާމަވާކަމަށެވެ. މިސަރުކާރުން އެއްވެސް ތަފާތުކުރުމެއްނެތި ރަށްރަށަށް ތަރައްޤީ ގެނެސްދޭކަމަށް ވިދާޅުވާއިރު، ރަށްރަށުން އަޑުއިވިގެންދަނީ އެއާއި މުޅިން ޚިލާފް އަޑުތަކާއި ވާހަކަތަކެއް ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރައީސް ޔާމީން އަކީ ދިވެހި ރާއްޖޭގެ ތަރައްޤީ މުޅިން އާ އުސްމިންތަކަކަށް ގެންގޮސްދެއްވި ބޭފުޅާކަމަށެވެ. ރައީސް ޔާމީންގެ ސިޔާސަތަކީ އެއްވެސް ރަށެއް ތަފާތުކުރުމެއްނެތި ތަރައްޤީ ގެނެސް ދިނުން ކަމަށާއި، އެކަން ކުރިއަށް އޮތް ރިޔާސީ އިންތިޚާބު ކާމިޔާބުކޮށް ރައްޔިތުންނަށް ކަށަވަރު ކޮށްދެއްވާނެކަމަށް މުއިއްޒު ވިދާޅުވިއެވެ.
އަޅުގަނޑުމެން ރައްޔިތުންނަށް އެއްވެސް ތަފާތު ކުރުމެއްނެތި ތަރައްޤީ ގެނެސްދޭނަން. ކުޑަރަށެއް ބޮޑު ރަށެއް ތަފާތު ކުރުމެއްނެތި އަޅުގަނޑުމެން ތަރައްޤީީ ގެނެސްދޭނަން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ މިސަރުކާރުން ރަށްރަށުގައި ކުރި ކަމެއްވެސް އަދި ފެށި މަސައްކަތެއް ވިޔަސް ނުނިމި ހުރިކަމީ ފެންނަން އޮތް ހަގީގަތް ކަމަށެވެ. ޕީޕީއެމްއާއި، ޕީޕީއެމްއަށް ތާއީދުކުރާކޮންމެ ބޭފުޅަކީވެސް ތަރައްޤީގެ ވިސްނުމާއި ގުޅިފައިވާ ބޭފުޅުންނަށްވާއިރު، މިސަރުކާރުންވެސް ކުރަން ފަށާފައިވާ ތަރައްޤީގެ މަސައްކަތެއް ދެން އަންނަ ވެރިކަމެއްގައި ހުއްޓާ ނުލާނެކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރާއްޖޭގެ ތަރައްގީގެ ބާނީ ރައީސް ޔާމީންގެ އިރުޝާދާއި ލަފާފުޅާއިއެކު ދެން އުފެދޭ ވެރިކަމެއް ވެގެންދާނީ ދިވެހި ތާރީހުގައި ތަރައްޤީގެ ރަން ޒަމާނެއް ގެނުވާނެ ވެރިކަމެއް ކަމުގައެވެ.
