ތ. ވިލުފުށީގައި އެއާޕޯޓެއް އަޅާނީ ޖުމްހޫރީ ޕާޓީ (ޖޭޕީ) ގެ ވެރިކަމެއްގައި ކަމަށް އެ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ ސްޕެޝަލް އެޑްވައިޒަރު އަދި ރައްޔިތުންގެ މަޖިލިހުގެ ވިލުފުށީ ދާއިރާގެ މެމްބަރު ރިޔާޒް ރަޝީދު ރޭ ވިދާޅުވެއްޖެއެވެ.
ޖުމްހޫރީ ޕާޓީން އދ. މާމިގިލީގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ރިޔާޒް ވިދާޅުވީ ކޮންމެ ރިޔާސީ އިންތިހާބެއްގައި ވެސް ގާސިމްގެ ފަހަތުގައި ހުންނަވަނީ މި ގައުމަށް އެންމެ އިހްލާސްތެރިވާނެ ބޭފުޅަކީ ގާސިމް ކަމަށްވީމަ ކަމަށެވެ. ރިޔާޒް ވިދާޅުވި ގޮތުގައި ގާސިމްގެ އާމްދަނީގެ %60 މީހުން ބޭނުން ވަނީ ގައުމު އާރާސްތު ކުރުމަށެވެ.
"އެހެންވެ، މިއީ ތިޔަބޭފުޅުން ވިސްނާ ފިކުރު ކުރަން ޖެހޭނެ ކަމެއް،" ރިޔާޒް ވިދާޅުވިއެވެ.
ރިޔާޒް ވިދާޅުވި ގޮތުގައި އޭނާގެ އާއިލާގެ މެމްބަރުން ވެސް ތިއްބެވީ ގާސިމް ވެރިކަމަށް ހޮވަން ތައްޔާރަށެވެ. އެގޮތުން، އޭނާގެ ލޯބިވާ ދެ ދަރިފުޅު މިއަދުން ފެށިގެން ގާސިމް ހޮވުމަށް ކެމްޕެއިން ކުރެއްވުމަށް ވިލުފުށީ ދާއިރާ އަށް ވަޑައިގަންނަވާނެ ކަމަށާއި އެއީ ގާސިމަށް ކޮށްދެއްވާ ކަމެއް ކަމަށް ވެސް ރިޔާޒް ވިދާޅުވިއެވެ.
"އަޅުގަނޑު ވަރަށް އާދޭހާ އެކު އެދެން އެ ދެ ކުދިން އެ ދާ ކަންތައް ކޮށްދިނުމަށް. އެއީ ގާސިމް އިބްރާހިމް ވެރިކަމަށް ގެނެސް ދިނުމަށް،" ރިޔާޒް ވިދާޅުވިއެވެ.
ރިޔާޒް ވިދާޅުވީ އޭނާގެ ބައްޕައަކީ އެ ދާއިރާ އަށް 40 އަހަރަށް ވުރެ ގިނަ އަހަރު ހިދުމަތްކޮށް ދެއްވާފައި ހުންނެވި ބޭފުޅެއް ކަމަށެވެ. ބައްޕަ ކުރެއްވި މަސައްކަތާ އޭނާ ހަވާލުވެވަޑައިގެންނެވި އިރު، ރާއްޖޭގެ ދާއިރާތަކުގެ ތެރެއިން ވިލިފުށީ ދާއިރާ ވަރުގެ ތަރައްގީވެފައި އޮތް ދާއިރާއެއް ނޯންނާނެ ކަމަށް ރިޔާޒް ވިދާޅުވިއެވެ.
"އަޅުގަނޑަށް ލިބުނު އެންމެހާ ފައިސާއެއް ބޭނުން ކުރީ އަޅުގަނޑުގެ މި ދެންނެވި އަހުންނާއި އުހްތުންނަށް،" ރިޔާޒް ވިދާޅުވިއެވެ.
"އެހެންވެ އަޅުގަނޑަށް ކިރިޔާ ވެސް ކުލުނެއް އޮތް ނަމަ، މިފަހަރު ގާސިމް އިބްރާހިމަށް ވޯޓު ދެއްވާ،"
ރިޔާޒް ވިދާޅުވި ގޮތުގައި ވިލުފުށީގައި އެއާޕޯޓެއް އަޅަން މި ސަރުކާރުން ވަނީ ދޮގު ހަދައި އޮޅުވާލައިފައެވެ. އަދި ގާސިމްގެ ވެރިކަމެއްގައި ވިލުފުށީގައި އެއާޕޯޓެއް އެޅުން ހަގީގަތަކަށް ހަދައި ދޭނެ ކަމަށް ވެސް ރިޔާޒް ވިދާޅުވިއެވެ.
ކޮމެންޓު ފޮނުވާ