ރިޔާސީ އިންތިޚާބުގެ ވޯޓު ކަރުދާހުގައި ކުރީގެ ދެ ރައީސުން ކަމުގައިވާ، ރައީސް ޔާމީނާއި، ރައީސް ނަޝީދުގެ ނަން ވޯޓު ކަރުދާހުގައި ނޯންނާނެކަމީ ލިބޭ ވަރަށް ބޮޑު އުފަލެއް ކަމުގައި ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.

މިފަހަރުގެ ރިޔާސީ އިންތިޚާބަކީ މަލްޓި ޕާޓީ ނިޒާމުގެ ތެރެއިން ރާއްޖޭގައި މިހާތަނަށް ބާއްވާ ރިޔާސީ އިންތިޚާބެއްގައި އެންމެ ގިނަ ކެންޑިޑޭޓުން ވާދަކުރާ އިންތިޚާބެވެ. މިއިންތިޚާބުގައި 8 ކެންޑިޑޭޓުން ވާދަކުރެއެވެ. ރިޔާސީ އިންތިހާބު ބާއްވަން ނިންމާފައި ވަނީ އަންނަ މަހުގެ ނުވަ ވަނަ ދުވަހުއެވެ. ދެވަނަ ބުރެއް ބާއްވަން ޖެހިއްޖެ ނަމަ އިންތިހާބު ބޭއްވުމަށް އިލެކްޝަނުން ނިންމާފައި ވަނީ ސެޕްޓެމްބަރު 30ގައެވެ.

ޑރ.އިޔާޒު ވިދާޅުވީ މިފަހަރުގެ ރިޔާސީ އިންތިޚާބުގެ ވޯޓު ކަރުދާހުގައި ރައީސް ޔާމީނާއި، ރައީސް ނަޝީދުގެ ނަން ނޯންނަކަމީ ލިބޭ ވަރަށް ބޮޑު ހިތްހަމަ ޖެހުމެއް ކަމަށެވެ.

ވޯޓު ކަރުދާސްކޮޅުގައި މުހައްމަދު ނަޝީދާއި، ރައީސް ޔާމީންގެ ނަން ނޯންނާނެކަމީ ލިބޭ ވަރަށް ބޮޑު އުފަލެއް. އަދި ހިތްހަމަޖެހުމެއް. އަޅަމެންގެ ދުޢާ އިޖާބަ ކޮށްދެއްވި ކަމަށްޓަކައި މާތް ރަސްކަލާންގެ އަށް ޙަމްދުކުރަން.

– އިޔާޒު ވިދާޅުވިއެވެ.

ޕީޕީއެމްއިން މިފަހަރު ވެސް އިންތިހާބުގައި ވާދަކުރަން ނިންމައި، ކުރީގެ ރައީސް ޔާމީން ހުށަހެޅުއްވި ފޯމް އިލެކްޝަންސް އިން ބާތިލްކުރިއެވެ. ސަބަބަކީ އެމަނިކުފާނު ޖަލު ހުކުމެއްގައި ހުންނެވުމެވެ. ޕީޕީއެމުން ކެންޑިޑޭޓަކު ނުނެރެ، އެ ޕާޓީ ވާގިވެރިވާ ޕީއެންސީގެ ރިޔާސީ ކެންޑިޑޭޓަކަށް ޑރ. މުހައްމަދު މުއިއްޒު ހަމަޖައްސައި އޭނާ ވަނީ ފޯމު ހުށަހަޅުއްވައިފައެވެ. އޭނާގެ ރަނިންމޭޓަކީ ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފްއެވެ.

ޑިމޮކްރެޓްސްގެ ފަރާތުން އިލްޔާސް ލަބީބު އަށް ރިޔާސީ ޓިކެޓް ދީފައި ވާއިރު ރަނިންމޭޓަކަށް ހަމަޖައްސާފައި ވަނީ އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރެވެ. ރައީސް ނަޝީދު ވިދާޅުވެފައިވަނީ މިފަހަރުގެ އިންތިޚާބަކީ ޒުވާނުންނަށް ފުރުސަތު ދޭންވީ އިންތިޚާބު ކަމަށެވެ.