ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރަނިންމޭޓަކަށް ހަމަޖެއްސެވި އެމްޑީޕީގެ ޕީޖީ ގްރޫޕްގެ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމަށް މިހާރުގެ ނައިބް ރައީސް ފައިސަލް ނަސީމް މަރުހަބާ ވިދާޅެއް ނުވިއެވެ.

ރަނިންމޭޓަކު ކަނޑައެޅުމަށް ރައީސް ޞާލިހަށް ބޮޑުޖެހުމެއް ވިދާޅުވިކަމަށް ރައީސްވެސް ވަނީ ވިދާޅުވެފައެވެ. ނައިބް ރައީސްކަމަށް ލިބިވަޑައިގެންފައިވާ ނަންތަކަށް ބަލާއިރު ހުށަހެޅާފައިވަނީ ގާބިލް ނަންތަކެއްކަމަށް ރައީސް ވަނީ ވިދާޅުވެފައެވެ.

ފާޅުގައި ނައިބް ރައީސްކަމަށް ޝައުވެރިކަން ފާޅު ކުރެއްވި ހަމައެކަނި ބޭފުޅަކީ ފައިސަލް ނަސީމެވެ. ނައިބު ރައީސް ފައިސަލް ނަސީމް، އަމިއްލަ ޚިދުމަތުގެ ޙަޔާތްޕުޅުގައިވެސް އެތައް ރިކޯޑެއް މުގުރައްވައިފައިވާ ބޭފުޅެކެވެ. އަދި އެމަނިކުފާނުގެ ސިޔާސީ ޙަޔާތަށް ބަލާއިރު، ފައިސަލް ނަސީމްއަކީ ރައީސުލްޖުމްހޫރިއްޔާގެ ނައިބުގެ މަޤާމުގެ ދަޢުރު ފުރިހަމަކުރައްވާ ފުރަތަމަ ނައިބު ރައީސްވެސްމެއެވެ. މިވެސް ރާއްޖޭގެ ތާރީޚުގައި ލިޔެވޭނެ، މުހިންމު ޞަފުޙާއެކެވެ.

ފައިސަލް ނައިބް ރައީސްކަމަށް ޝައުގުވެރިކަން ފާޅުކުރެއްވި ނަމަވެސް ރައީސް ޞާލިހު އެފުރުސަތު ދެއްވީ އަސްލަމަށެވެ.

އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަދި މަޖިލީހުގެ މެޖޯރިޓީ ލީޑަރު މުހައްމަދު އަސްލަމްއަކީ މަޖިލީހުގައި މިހާރު ތިއްބެވި މެމްބަރުންގެ ތެރެއިން، އެ މަޖިލީހުގައި އެންމެ ގިނަ ދުވަސްވީ އެއް މެމްބަރެވެ. މީގެއިތުރުން އޭނާއަކީ އެ ޕާޓީ އުފެދުނީއްސުރެ ޕާޓީގެ ހަރަކާތްތަކުގައި އިސް ސަފުގައި ހަރަކާތްތެރިވެވަޑައިގަންނަވަމުންދާ މެމްބަރެކެވެ.

އަސްލަމް ރައީސް ޞާލިހުގެ ކެމްޕޭނުން ނުފެނި ހުރުމަށްފަހު އެމަނިކުފާނު މިހާރު ދ.އަތޮޅަށް ކުރައްވާ ކެމްޕޭންގައި ދަނީ ބައިވެރިވަންނެވެ. ނަމަވެސް މިހާރުގެ ނައިބް ރައީސް ފައިސަލް ނަސީމް މިހާތަނަށްވެސް އަސްލަމަށް މަރުހަބާ ވިދާޅުވެފައި ނުވެއެވެ.