ރިޔާސީ އިންތިޚާބުގައި ޖުމްހޫރީ ޕާޓީގެ ޓިކެޓްގައި ވާދަކުރައްވާ ޤާސިމް އިބްރާހިމްހެ ފޯމު މާދަމާ އިލެކްޝަންސް ކޮމިޝަނަށް ހުށަހަޅާނެކަމަށް އެމަނިކުފާނުގެ އިންތިޚާބީ އެޖެންޓް ޢަލީ ވަހީދު ވިދާޅުވެއްޖެއެވެ.
ރިޔާސީ އިންތިޚާބުގައި ވާދަކުރެއްވުމުގެ ޝައުގުވެރިކަން އެންމެ ފުރަތަމަ ފާޅުކުރެއްވެި ބޭފުޅުންގެ ތެރޭގައި ހިމެނޭ ޤާސިމްގެ ފޯމު ހުށަހަޅުއްވަނީ ކުރިމަތިލުމަށް ހުޅުވާލި އެންމެ ފަހު ދުވަހުއެވެ. މާދަމާ މެންދުރު 2:30 އާއި ހަމައަށް ކުރިމަތިލުމުގެ މުއްދަތު ހަމަވާނެއެވެ.
އަލީ ވަހީދު ވިދާޅުވީ ފެހި ޤާނޫނު އަސާސީއަށް 15 އަހަރު ފުރުނީއެވެ. އިރާދަފުޅުން މި ޤައުމުގައި މިވަގުތު ހުންނެވި ރައްޔިތުންނަށް އެންމެ ޚިދުމަތްތެރި ވިޝަނަރީ ލީޑަރު ޤާސިމް އިބްރާހިމް މާދަމާ ރިޔާސީ އިންތިޚާބަށް ކުރިމަތިލައްވާނެ ކަމަށެވެ. އެންމެހައި ރައްޔިތުންގެ ލޯތްބާއި ތާޢީދަށް އެދޭކަމަށް ޢަލީ ވަހީދު ވިދާޅުވިއެވެ.
ޤާސިމް އިންތިޚާބުގައި ވާދަކުރައްވާއިރު އެމަނިކުފާނުގެ ރަނިން މޭޓަކަށް ހަމަޖެއްސެވީ އެޕާޓީގެ ޑެޕިއުޓީ ލީޑަރު އަމީން އިބްރާހިމެވެ. އަމީން އިބްރާހީމް ވަނީ ސަރުކާރުގެ އިސް މަޤާމުތަކެއް ފުރުއްވާފައެވެ. އެގޮތުން ރައީސް ޔާމީންގެ ސަރުކާރުގައި ޓްރާންސްޕޯޓް މިނިސްޓަރުކަން ކަމާއި، ކުރީ ސަރުކާރުތަކުގައި އެހެނިހެން އިސް ބައެއް މަޤާމުތައްވެސް ފުރުއްވާފައިވެއެވެ.
މިސަރުކާރުގެ ކޯލިޝަންގައި ހިމެނޭ ޖުމްހޫރީ ޕާޓީން ވަނީ މިފަހަރުގެ ރިޔާސީ އިންތިޚާބުގައި އެޕާޓީ އިސްވެ އޮވެ އުފައްދާ ކޯލިޝަނަކުން ވާދަކުރަން ނުވަތަ އިންތިޚާބުގައި އެޕާޓީ ވަކިން ވާދަކުރުމަށް ނިންމާފައެވެ. މީގެ އިތުރުން އެއް ކެނޑިޑޭޓަކު ނެރުމާއި ގުޅޭގޮތުން ޖުމްހޫރީ ޕާޓީއާއި، ދަ ޑިމޮކްރެޓްސް އަދި މޯލްޑިވްސް ނޭޝަނަލް ޕާޓިއާއެކު ވަނީ މަޝްވަރާވެސްކޮށްފައެވެ. ނަމަވެސް އެކަމުގައި ގޮތެއް ނުނިމި ޖުމްހޫރީ ޕާޓިން ނިންމީ ވަކިން އިންތިޚާބުގައި ވާދަކުރުމަށެވެ.
ރިޔާސީ އިންތިޚާބުގައި ވާދަކުރާ ކެނޑިޑޭޓުންގެ މެދުގައި ގުރުއަތުލުން އޮންނާނީ އަންނަ ބުދަ ދުވަހުއެވެ.
