އިދިކޮޅު ޕީޕީއެމްގެ ރިޔާސީ ކެނޑިޑޭ، ކުރީގެ ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތެއްގައި، އިދިކޮޅު ކެނޑިޑޭޓެއްގެ ގޮތުގައި، ޕީއެންސީގެ ޓިކެޓްގައި ވާދަކުރާ ކެނޑިޑޭޓަކު އައްޔަން ކުރުމަށް މިއަދު ބޭއްވި، އެޕާޓީގެ މަޝްވަރާ މަޖިލިހުގެ ސިއްރު ވޯޓު، މާލޭ ސިޓީގެ މޭޔަރު ޑރ. މުއިއްޒު ކާމިޔާބު ކުރައްވައިފިއެވެ.

މިވޯޓު ޑރ. މުއިއްޒު ކާމިޔާބު ކުރެއްވީ، މަޑުއްވަރި ދާއިރާގެ މެމްބަރު އާދަމް ޝަރީފާއި ވާދަކުރައްވާ ވަރަށް ކުޑަ ތަފާތަކުންނެވެ. މިގޮތުން ޕިއެންސީގެ މަޝްވަރާ މަޖިލިހުގެ 48 މެމްބަރުން މި އިންތިޚާބުގައި ވޯޓު ލާފައިވާއިރު، މުއިއްޒުއަށް ވޯޓު ދީފައިވަނި 25 މެމްބަރުންނެވެ. އަދަމް ޝަރީފަށް ވޯޓު ދީފައިވަނީ 23 މެމްބަރުންނެވެ.

މިއަދު ބޭއްވުނު ޕީއެންސީގެ މަޝްވަރާ މަޖިލިހުގެ ސިއްރު ވޯޓު މުއިއްޒު ކާމިޔާބު ކުރައްވާފައިވާއިރު، ޓިކެޓް ކަށަވަރު ކުރުމަށް މުއިއްޒު ކުރި ކެމްޕޭންގައި ރައީސް ޔާމިންގެ އަރިސް ގިނަ ބޭފުޅުން ހަރަކާތްތެރިވި މަންޒަރު ފެނިގެންދިޔައީ މުއިއްޒުގެ ކެމްޕޭންގައެވެ.

އޭގެ ތެރޭގައި، ރައީސް ޔާމިންގެ އިތުބާރު އެންމެ ބޮޑަށް އޮންނަކަމަށް ބެލެވޭ، އެމަނިކުފާނުގެ ކުރީގެ ޗީފް އޮފް ސްޓާފު މުސްތަފާވެސް ވަނީ ޑރ. މުއިއްޒުއަށް ވޯޓު ހޯދުމަށް އިސްކޮށް ހަރަކާތްތެރި ވެފައެވެ. އަދި މުއިއްޒުއަށް ޕީއެންސީގެ ވޯޓު ކަށަވަރު ކުރުމަށް، ކެމްޕޭން ޓީމުގައި މަސައްކަތް ކުރި ފަރާތްތަކުގެ ތެރޭގައި މެޑަމް ފާތުންގެ އަރިހުގައި ވަރަށް އިސްކޮށް މަސައްކަތް ކުރި ޕީޕީގެ އިސް އަންހެން އެކްޓިވިސްޓުނުންވެސް ހިމެނެއެވެ.

އޭގެ އިތުރުންވެސް ޕީޕީއެމްގެ ސެނެޓްގެ ގިނަމެމްބަރުންނާއި، ރައްޔިތުންގެ މަޖިލިހުގެ ކުރީގެ ގިނަ މެމްބަރުންވެސް ވަނީ މިއަދު ބޭއްވުނު ސިއްރު ވޯޓު މުއިއްޒުއަށް ކާމިޔާބު ކޮށްދިނުމަށް މަސައްކަތް ކޮށްފައެވެ.

ޑރ. މުއިއްޒު މިއަދު ބޭއްވުނު ސިއްރު ވޯޓު ކާމިޔާބު ކުރިނަމަވެސް އޭނާ ޕީއެންސީގެ ރިޔާސީ ޓިކެޓްގައި ވާދަކުރައްވާނީ ސުޕްރިމް ކޯޓުގައި މިހާރު ކުރިޔަށްދާ، ރައީސް ޔާމިންގެ ކެނޑިޑަސީގެ މައްސަލަ އެމަނިކުފާނަށް ކާމިޔާބު ނުކުރެވިއްޖެ ނަމައެވެ.

މިގޮތުން، މިހާރު ސުޕްރިމް ކޯޓަށް ހުށަހަޅާފައިވާ، އިދިކޮޅު ޕީޕީއެމްގެ ފަރާތުން ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ނިންމާފައިވާ، ކުރީގެ ރައީސް ޔާމިންގެ ކެނޑިޑަސީގެ މައްސަލައިގެ ފުރަތަމަ އަޑުއެހުން މާދާ 14:30 އަށް ސުޕްރިމް ކޯޓުން ވަނީ ތާވަލު ކޮށްފައެވެ.

ބެލެވޭ ގޮތުގައި އެ މަސައްލާގެ ހުކުމް ސުޕްރިމް ކޯޓުން އަންނަ ހޮނިހޮރު ދުވަހު އިއްވާނެއެވެ.