ރިޔާސީ އިންތިހާބު ކާމިޔާބުކުރަން ޖުމްހޫރީ ޕާޓީ އާއި ކުރީގެ ރައީސް މައުމޫން އަބްދުލްގައްޔޫމް އުފެއްދެވި އެމްއާރުއެމް ގުޅިގެން މަސައްކަތް ކުރެވޭނެ ގޮތްތަކެއް ހޯދަން މިއަދު މަޝްވަރާތައް ފަށައިފިއެވެ.
ޖޭޕީއާއެކު ބޭއްވި މަޝްވަރާ ބައްދަލުވުމަށްފަހު ނޫސްވެރިންނާއި ބައްދަލުކޮށް ފާރިޝް މައުމޫން ވިދާޅުވީ ޖޭޕީއާއެކު ދެންމެ ބޭއްވުނު ބައްދަލުވުމުން ވަރަށް އުއްމީދީ މަންޒަަރެއް ފެނިގެންދާ ކަމަށެވެ. އެހެންނަމަވެސް އަދި ޖޭޕީގެ ހުށަހެޅުންތަކާމެދު އަދި ވަކި ގޮތެއް ނުނިންމާ ކަމަށް އޭނާ ވިދާޅުވިއެވެ.
މިއަދު މިކުރެވުނު މަޝްވަރާތަކުގެ ތެރޭގައި އަޅުގަނޑުމެންނަަށް ވަރަށް އުއްމީދީ މަންޒަރެއް ފެނިގެން އެބަދޭ. އަޅުގަނޑުމެން މައިގަނޑުގޮތެއްގައި އެކުގައި މަސައްކަތްކުރާ ބަޔަކު އެކުގައި މަސައްކަތް ކުރެވޭނެ ހާލަތަށް އައުމަށްޓަކައި އެންމެ އިސްކަން ދެނީ ދިވެހި ރައްޔިތުންނަށް، ދިވެހި ޤައުމު އެދޭ އިސްލާހީ ބަދަލުތައް ގެނައުުމަށް، އެހެންވީމަ މިކަންކަމާމެދު މަޝްވަރާ އަޅުގަނޑުމެން ކުރިން.
– ފާރިޝް ވިދާޅުވިއެވެ.
ޖޭޕީން ވަނީ ރިޔާސީ އިންތިހާބުގައި އެ ޕާޓީގެ ލީޑަރު ގާސިމް އިބްރާހިމް ވާދަކުރައްވާނެ ކަން އިއުލާނުކޮށްފައެވެ. އެމްއާރުއެމްގެ ރައީސް ފާރިސް މައުމޫން ވެސް އިންތިހާބުގައި ވާދަކުރައްވަން ނިންމަވައި ގެންދަވަނީ ކުށުގެ ރެކޯޑު ސާފުކުރައްވަމުންނެވެ.
ޖޭޕީން ރިޔާސީ އިންތިހާބުގައި ގާސިމް ވާދަކުރަން ނިންމާފައިވީ ނަމަވެސް ރައްޔިތުން އެދޭ ބަދަލު ގެނެވޭނީ އެއް ކެންޑިޑޭޓަކު ނެރެގެން ކަމަށްވާ ނަމަ އެކަމާމެދު މަޝްވަރާ ނުކުރަންވީ ސަބަބެއް ނެތް ކަމަށް އަމީން ވިދާޅުވިއެވެ.
އަޅުގަނޑުމެން ހުރިހާ އެންމެން ގުޅިގެން މަސައްކަތް ކޮށްގެން މެނުވީ މި ބޭނުންވާ ނަތީޖާ ނުނިކުންނާނެ. އަޅުގަނޑުމެން އެ ދިމާއަށް މަސައްކަތް ކުރާނަން އަދިވެސް.
– އަމީން ވިދާޅުވިއެވެ.
ފާރިސް ފާހަގަ ކުރެއްވި ގޮތުގައި, މިއަދު ޖޭޕީއާއެކު ކުރި މަޝްވަރާތަކުގައި ވަރަށް އުއްމީދީ މަންޒަރެއް ފެނިގެން ހިނގައްޖެއެވެ. އަދި, މިކަމުގައި ރަސްމީ އަދި ނުރަސްމީކޮށް ވެސް އިތުރު މަޝްވަރާތައް ކުރަން ނިންމާފައިވާ ކަން ފާރިސް ހާމަކުރެއްވިއެވެ. އެމްއާރްއެމާއި ޖޭޕީން ގުޅިގެން މަސައްކަތް ކުރުމުގެ މަޝްވަރާތައް ކުރިއަށް ގެންދިޔައިރު, ޖޭޕީން ވަނީ ގުޅިގެން މަސައްކަތް ކުރުމާ ގުޅޭގޮތުން ޑިމޮކްރެޓްސް އާއި އެމްއެންޕީގެ އިތުރުން ޕީޕީއެމާއެކު ވެސް މަޝްވަރާ ކޮށްފަ އެވެ. އަދި ޕީޕީއެމް ރުހޭނަމަ އެއް ކެންޑިޑޭޓަކު ނެރުމުގެ މަޝްވަރާތައް ވެސް ކުރިއެވެ.
