ރައީސް އިބްރާހިމް މުހައްމަދު ޞާލިހުގެ ރަނިން މޭޓަކަށް އައުމުގެ އެއްވެސް ޝައުގުވެރި ކަމެއް ނެތްކަމަށް ރައީސް ޞާލިހު ރިޔާސީ ދެވަނަ ދައުރަކަށް އިންތިޚާބު ކުރެއްވުމަށް ކޯލިޝަން ހަދާފައިވާ އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
ސިޔާމް މިހެން ވިިދާޅުވީ ސިންގަޕޫރުގައި ހައްޔަރުކޮށް، ޕާސްޕޯޓް ހިފަހައްޓާފައިވާކަމަށް ބުނެ ޚަބަރު ފެތުރުނުތާ ގިނަ ދުވަސްތަކެއް ނުވަނީސް ރާއްޖެ ވަޑައިގެން ނޫސްވެރިންނާއި ވާހަކަ ދައްކަވަމުންނެވެ. ސިޔާމް ވިދާޅުވީ ރިޔާސީ އިންތިޚާބުގައި ރައީސް ޞާލިހާއިއެެކު ކޯލިޝަން ހަދައިގެން މަސައްކަތް ކުރައްވަނީ ޤައުމުގެ މަސްލަހަތާއި ހަމަޖެހުމަށް ޓަކައި ކަމަށެވެ. އިންތިޚާބުގައި މަސަައްކަތް ކުރަނީ ރައީސް ޞާލިހަށް އެއްބުރުން އިންތިޚާބު ކާމިޔާބު ކޮށް ދެއްވުމަށް ކަމަށް ސިޔާމް ވިދާޅުވިއެވެ.
އަޅުގަނޑުގެ އެއްވެސް ޝައުގުވެރިކަމެއް ނެތް ރަނިން މޭޓަކަށް. އެހެން ނަމަވެސް މިދެންނެވީ މަޖުބޫރުވާ ހާލަތެއްގައި ނުކުރާނަމެކޭ ނޫން. އެހެން ނަމަވެސް އަޅުގަނޑުގެ އެއަވެސް ޝައުގެއް ނެތް. އަޅުގަނޑުމެން މިއިންތިޚާބު ކާމިޔާބު ކުރާނީ އެއްބުރުން.
– ސިޔާމް ވިދާޅުވިއެވެ.
ސިޔާމް ރައީސްގެ ރަނިން މޭޓަކަށް ޝައުގުވެރިކަމެއް ނެތްއިރު، އެމްޑީޕީގެ ޗެއާޕާސަން ފައްޔާޒު އިސްމާއިލްވެސް ވަނީ މިމަޤާމަށް ޝައުގުވެރިކަން ނެތްކަން ހާމަ ކުރައްވާފައެވެ. ނަމަވެސް މިހާރުގެ ނައިބް ރައީސް ފައިސަލް ނަސީމް ވަނީ ރައީސްގެ ރަނިންމޭޓަކަށް އައުމުގެ ޝައުގުވެރިކަން ހުރިކަން ހާމަ ކުރައްވާފައެވެ.
ރިޔާސީ އިންތިޚާބުގައި ރައީސް ޞާލިހަށް މިފަހަރު އޮތް އެންމެ ބޮޑު ބޮލުގެ ރިހުމަކީވެސް ރަނިން މޭޓަކު ކަނޑައެޅުމެވެ. ރައީސް ޞާލިހު ވަނީ ގިނަ ނަންތަކެއް ލިބެމުންދާކަމަށާއި، ރަނިން މޭޓަކަށް ބޭފުޅަކު ކަނޑައެޅުމުގެ މަސައްކަތް ވަރަށް އަވަހަށް ހަމަޖައްސަވާނެކަމަށް ވިދާޅުވެފައެވެ.
