ހއ.އަތޮޅު ވެރިކަންކުރާ ކުރަށް ދިއްދޫގައި އޮންނާނީ އެމްޑީޕީ ކަމަށާއި، ދިއްދޫގައި އޮތް ބަދަހި އެމްޑީޕީގެ ސަފުތައް ރޫޅާ ނުލެވޭނެކަމަށް ވިދާޅުވެ ރައީސް އިބްރާހިމް މުހައްމަދު ޞާލިހުގެ ބަހުގެ ހަމަލާއެއް ރައީސް ނަޝީދަށް ދެއްވައިފިއެވެ.
ދަ ޑިމޮކްރެޓްސް އަށް ސޮއި ކުރުމަށްފަހު ރައީސް ނަޝީދު ތަކުރާރުކޮށް ވިދާޅުވެފައިވަނީ އެމްޑީޕީ ރޫޅާލާނެކަމަށެވެ. ނަމަވެސް ރައީސް ޞާލިހު ހއ.އަތޮޅަށް ކުރެއްވި ދަތުރުފުޅުގައި ފެނިގެން ގޮސްފައިވަނީ ރައީސް ނަޝީދު ވިދާޅުވި ކަންކަމާއި މުޅިން ތަފާތު މަންޒަރުތަކެކެވެ. ވަޑައިގެންނެވި ކޮންމެ ރަށަކުންވެސް އެމަނިކުފާނަށް މަރުހަބާ ދަންނަވަން ގިނަ އަދަދެއްގެ އެމްޑީޕީ މެމްބަރުން ވަނީ ނިކުމެފައެވެ. ޚާއްސަކޮށް ދިއްދޫ އަކީ ޑިމޮކްރެޓްސްގެ ހަރަކާތްތައް ވަރުގަދަ ކުރުމަށް މަސައްކަތް ކުރާ ރަށަކަށް ވާއިރު އެރަށުންވެސް ވަނީ ރައީސް ޞާލިހަށް ހޫނު މަރުހަބާއެއް ކިޔާފައެވެ.
ދިއްދޫގައި ރޭ ބޭއްވި ޖަލްސާގައި ވާހަކަ ދައްކަވަމުން ރައީސް ޞާލިހު ވިދާޅުވީ ދިއްދޫގައި އަބަދުވެސް އޮންނާނީ އެމްޑީޕީ ކަމަށެވެ. ދިއްދޫ އިން އެމްޑީޕީ ރޫޅާލުމަކީ ކުރެވޭނެ ކަމެއް ނޫންކަމަށް ރައީސް ވިދާޅުވިއެވެ.
އަޅުގަނޑަށް ސާފު ދިއްދޫ ރައްޔިތުން ނިންމާނެ ގޮތް. އަޅުގަނޑަށް އެނގޭ މިރޫޅައެއް ނުލެވޭނެކަންވެސް ދިއްދޫ އިން. ދިއްދޫ ގައި އޮންނާނީ އެމްޑީޕީ. ދިއްދޫގައި އޮންނާނީ އެމްޑީޕީ އިނގޭތޯ.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ އެމަނިކުފާނު ބޭނުންފުޅުވަނީ ކުރިއެކޭ އެއްގޮތަށް ދިއްދޫގެ ރައްޔިތުން ކުރިޔަށް އޮތް ރިޔާސީ އިންތިޚާބުގައި، 9 ސެޕްޓެމްބަރުގައި ނުކުމެ ފުރިހަމަ އަގްލަބިއްޔަތަކުން ކޯލިޝަނަށް ތާއީދުކޮށްދެއްވުންކަމަށެވެ. ދިއްދޫ ރައްޔިތުން ބޭނުންވި ގިނަ ކަންތައްތަކެއް ފުރިހަމަކޮށްދެވިއްޖެކަމަށް ރައީސް ވިދާޅުވެ އެކަމުގެ ތަފްސީލުތައް ދެއްވިއިރު ކޮށްދެއްވާނެކަމަށް ވިދާޅުވެ ނުކުރެވި ހުރި ކަންކަންގޮސްފައިވާ ހިސާބުވެސް ރައީސް ވަނީ ސާފުކޮށްދެއްވާފައެވެ. އަދި ކުރިޔަށް އޮތް ތަނުގައި ކޮށްދެއްވާނެކަންކަންވެސް ވަނީ އިއުލާންކުރައްވާފައެވެ.
ރައީސް ސޯލިހް ވިދާޅުވީ 2018 ވަނަ އަހަރު ބޭއްވި ރިޔާސީ އިންތިހާބުގެ ކެމްޕެއިނަށް ރަށްރަށަށް ވަޑައިގަތުމުން އާންމުން ކުރި ޝަކުވާއަކީ ފެނާއި ނަރުދަމާގެ ނިޒާމު ނެތުމާއި ކަރަންޓު ނެތުމާއި އިންޖީނުގެތައް ގެތައް ކައިރީގައި ހުރުމާއި ކްލާސް ރޫމްތައް މަލްޓި ޕާޕަސް ހޯލް ނެތުމާއި ކުޅިވަރު ކުޅޭނެ ވަސީލަތްތައް ނެތުމާއި ލަފާފުރުން ދަތިވެގެންނާއި ބިމުގެ ދަތިކަމާއި ސިއްހީ ހިދުމަތް ނެތިގެން އެ ވާހަކަ ދެއްކި ކަމަށެވެ.
މިއަދަކު އަޑެއް ނީވޭ ފެނާއި ނަރުދަމާ ނިޒާމުގެ ޝަކުވާއެއް. ނީވެ އެއްވެސް ރަށަކުން. އަޅުގަނޑުމެންވީ ވައުދާ އެއްގޮތަށް 141 ރަށެއްގައި މިއަދު ވެސް އެ މަޝްރޫއު ކުރިއަށް އެބަދޭ. ހިނގަމުން ނިމެމުން އެ ދަނީ. ރައްޔިތުން ގަބޫލު ކުރޭ އެ ވީ ވައުދު ފުއްދަމުންދާ ކަން.
– ރައީސް ވިދާޅުވިއެވެ.
މީގެއިތުރުން 41 ރަށެއްގައި ފުޓްބޯޅަ ދަނޑު އަޅައި ނިމިފައިވާ އިރު، އެއަށް ވުރެ ގިނަ ރަށްރަށުގައި ފުޓްބޯޅަ ދަނޑު އަޅަމުންދާ ކަމަށް ރައީސް ވިދާޅުވިއެވެ. އަދި 70 ފުޓްސަލް ދަނޑު އެޅިފައިވާ އިރު، 17 ވޮލީ ކޯޓް ވެސް އެޅިފައިވާ ކަމަށް އެމަނިކުފާނު ވިދާޅުވިއެވެ. އަދި 52 ރަށެއްގެ ލަފާފުރުމުގެ ދަތިކަން ހައްލު ކުރެވިފައިވާ އިރު 42 ރަށެއްގެ މަސައްކަތް ކުރިއަށްދާ ކަމަށް ވިދާޅުވިއެވެ.
އެމަނިކުފާނު ވިދާޅުވި ގޮތުގައި އަށް ރަށެއްގެ ބިން ހިއްކުމުގެ މަސައްކަތް ނިމިފައިވާ އިރު، 10 ރަށެއްގެ ބިން ހިއްކުމުގެ މަސައްކަތް ކުރިއަށް އެބަދެއެވެ. ދިއްދޫގެ ބިން ހިއްކުމުގެ މަސައްކަތް ވެސް އަންނަ މަހުގެ ތެރޭގައި ފެށިގެންދާނެ ކަމަށް ވެސް އެމަނިކުފާނު ވިދާޅުވިއެވެ. ދިއްދޫގެ ބިން ހިއްކައި ނިމޭ އިރު ކައިރިން ޕިކްނިކް އައިލެންޑެއް ވެސް ފެންނަން އޮންނާނެ ކަމަށް އެމަނިކުފާނު ވިދާޅުވިއެވެ.
