އެމްޑީޕީން މިއަހަރުގެ ރިޔާސީ އިންތިޚާބުގެ ކެމްޕެއިނަށް ނިކުންނަނީ ވެފައިވާ ވަޢުދުތައް ފުއްދައި، އެކަމުގެ ސާބިތު ހެއްކާއިއެކުގައި ކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.

މާރިޔާ މިހެން ވިދާޅުވީ އެމްޑީޕީގެ ކެމްޕެއިން ފެށުމުގެ ކުރިން ރޭ އެމްޑީޕީގެ މާލޭގެ ހަރުގެ، ދަނޑިކޮށީ ޖަގަހާގައި ބޭއްވި ޖަލްސާގައި ވާހަކަ ދައްކަވަމުންނެވެ. މާރިޔާ ވިދާޅުވީ މާލޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ ވައުދަކީ ނިމިދިޔަ އެކި ސަރުކާރުތަކުން ވެ ނުފުއްދިފައިވާ ވައުދެއް ކަމަށެވެ. އަދި ހުސް ލިޔުމާއި ގަނޑުކޮޅުވެސް ދިން ކަމެއްކަމަށެވެ.

ނަމަވެސް ރައީސް އިބްރާހިމް މުހައްމަދު ޞާލިހު ވެވަޑައިގެންނެވި ވައުދާއި އެއްގޮތަށް ކެމްޕޭނަން ނިކުންނަވަނީ މާލޭގެ ރައްޔިތުންނަށް ގޯތި ދެއްވުމަށް ފަހުގައިކަމަށް މާރިޔާ ވިދާޅުވިއެވެ. އަދި މިއީ ވެފައިވާ ވައުދުތައް ފުއްދަވައިގެން ކެމްޕެއިންނަށް ރައްޔިތުންނާއި ހަމައަށް ނިކުންނަވާކަމުގެ ފުރިހަމަ ހެއްކެތް ކަމަށް މާރިޔާ ވިދާޅުވިއެވެ.

ހުރިހާ ކަމަކަށް ވިސްނައި ވެވަޑައިގަންނަވާ ވަޢުދުރުތައް ފުއްދާ ބޭފުޅެއްގެ ގޮތުގައި ގަބޫލުކޮށް، އެކަން ސާބިތު ހެއްކާއެކީގައި އަޅުގަނޑުމެން މިނިކުންނަނީ ކެމްޕެއިނަށް، ފިސާރި ކެރިގެން އަޅުގަނޑުމެން މިނިކުންނަނީ.

– މާރިޔާ ވިދާޅުވިއެވެ.

ސަރުކާރުގެ ބޯހިޔާވަހިކަމުގެ މަޝްރޫޢުގެ ދަށުން ދޫކުރާ ގޯތިތަކަށް ކުރިމަތިލީ ފަރާތްތަކުގެ ތެރެއިން ގޯތި ލިބޭ ފަރާތްތަކުގެ ވަގުތީ ލިސްޓު ސަރުކާރުން ޖޫން 26 ވަނަ ދުވަހު ވަނީ ޢާއްމުކުރައްވާފައެވެ. މާލޭގެ ރައްޔިތުންނަށް ދޭ ގޯތީގެ ޢަދަދު އިތުރުކުރައްވައި، ގޯތި ލިބޭ އެންމެނަށް އެންމެ ލަސްވެގެން އަންނަމަހު ގޯތިތައް ހަވާލުކުރާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ.

ރައީސް ވަނީ ބިންވެރިޔާ ސްކީމްގެ ދަށުން ދޫކުރުމަށް ނިންމެވި ގޯތިތަކުގެ ޢަދަދު އިތުރުކުރުމަށް ނިންމެވިކަންވެސް ހާމަކުރައްވާފައެވެ. އެގޮތުން ހުޅުމާލޭ ދެވަނަ ފިޔަވައްސާއި، ގުޅިފަޅު އަދި ގިރާވަރުފަޅުން ޖުމްލަ 6200 ގޯތި ދޫކުރަން ނިންމަވާފައިވާކަމަށް ރައީސް ވިދާޅުވިއެވެ. އެއީ ގުޅިފަޅުން 2000 ގޯތި، ގިރާވަރުފަޅުން 2000 ގޯތި އަދި ހުޅުމާލެފަޅުން 2200 ގޯއްޗެވެ. ސަރުކާރުން ކުރިން ނިންމަވާފައިވަނީ 5000 ގޯތި ދިނުމަށެވެ.

އަޅުގަނޑުމެންނާއި ދޭތެރޭ ވިސްނަވާ، ވެވަޑައިގެންނަވާ ވައުދު ފުއްދަވާ ބޭފުޅެއްގެ ގޮތުގައި ހުންނެވީ ރައީސް އިބްރާހިމް މުހައްމަދު ޞާލިޙް ~ @MariyaDidi

ޝުކުރިއްޔާ ރައީސް @ibusolih#Ibu2023#UfaaveriAmaanRaajje pic.twitter.com/mTdn1DxLYJ

— Mohamed Shaan Abdulla (@kudey_a) July 7, 2023

ވަރަށް ފޯރީގައި ވާހަކަ ދައްކަވަމުން މާރިޔާ ވިދާޅުވީ މި އިންތިޚާބު އެމްޑީޕީން ކާމިޔާބު ކުރާނީ ފަސޭހަ ކަމާއިއެކުގައި ކަމަށެވެ. މާރިޔާ ވަނީ ރޭގެ ބައްދަލުވުމަށްފަހު މިއަދު މާލޭގައި ކެމްޕެއިން ހަރަކާތްތައް ފަށައި ގޭގެއަށް ހިނގަން ފަށާފައެވެ. އެ ހަރަކާތްތައް މިއަދު ފެށީ މާފަންނު މެދުދާއިރާއިންނެވެ. އިސްކޮށް ހުންނެވީ ޑިފެންސް މިނިސްޓަރު އަދި މާލޭގެ ކޯޑިނޭޓަރު މާރިޔާ ދީދީއެވެ. އަދި މާލޭގެ އެކި ދާއިރާތަކުގެ މަޖިލިސް މެމްބަރުންގެ އިތުރުން އެމްޑީޕީގެ ދާއިރާ ރައީސުން ވެސް ބައިވެރިވިއެވެ.

އެ ޕާޓީން މީގެ ކުރިން ވަނީ ރަށްރަށުގައި ކެމްޕެއިން ފަށައި، ކެމްޕެއިން ޕޯސްޓަރު ހަރުކުރުމުގެ ބުރުތަކެއް ބާއްވައިފައެވެ. އަދި މިހާރު ވެސް ރަށްރަށުގައި އެ ދާއިރާއަކަށް ނިސްބަތްވާ ޓީމުތަކުން ކެމްޕެއިން މަސައްކަތް އަންނަނީ ކުރަމުންނެވެ.

ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާނެ ކެނޑިޑޭޓެއް ކަނޑައަޅުއްވާފައިވަނީ އެޕާޓީގެ ތެރޭގައި ބޭއްވު ރިޔާސީ ޕްރައިމަރީއަކުންނެވެ. މިއީ މިފަހަރުގެ ރިޔާސީ އިންތިޚާބުގައި އެތެރޭގެ ޕްރައިމަރީއަކުން ރިޔާސީ ކެނޑިޑޭޓަކު ކަނޑައެޅި ފުރަތަމަ ޕާޓީވެސް މެއެވެ.

ރިޔާސީ ޕްރައިމަރީއަށްފަހު ކެމްޕެއިން ހަރަކާތްތައް އެމްޑީޕީން ދަނީ މާލެއާއި އަތޮޅު ތެރޭގެ ރަށްތަކުގައި ކުރިއަށް ގެންދަމުންނެވެ. މިދަތުރުތަކުގެ ބޭނުމަކީ ރިޔާސީ އިންތިޚާބަށް އެމްޑީޕީން އެކުލަވާލާ މެނިފެސްޓޯއަށް ބޭނުންވާ މައުލޫމާތުތައް އެއްކުރުމާއި، ރަށްރަށުގައި ހުރި ކަންބޮޑުވުންތައް ސަރުކާރާއި ހަމައަށް ގެނެސް ދިނުމެވެ.

ރައީސްގެ ޢަމާޒަކީ ރިޔާސީ އިންތިޚާބުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން ކެމްޕެއިން ހަރަކާތްތައް ކުރިއަށް ގެންދިއުމެވެ.