މިދިޔަ ލޯކަލް ކައުންސިލް އިންތިޚާބުގައި މާލެއަށް ވޯޓުލުމަށް ރީ-ރެޖިސްޓްރީކުރި މީހުން، ކުރިއަށްއޮތް ރިޔާސީ އިންތިޚާބުގައި މާލޭގައި ވޯޓުލާނަމަ އަލުން ރީ-ރެޖިސްޓްރީވާން ނުޖެހޭގޮތަށް އިލެކްޝަން ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ކުރިން ނިންމާފައި އޮތީ، އުފަން ރަށް ނޫން އެހެން ތާކަށް ވޯޓުލާ ކޮންމެ މީހަކު ރީ-ރެސްޖިޓަރވާން ޖެހޭގޮތަށެވެ. އާއްމު ޢުސޫލު އޮންނަގޮތުން، ކޮންމެ އިންތިޚާބެއްގައިވެސް އެމީހަކު އުފަން ރަށް ނޫން އެހެން ތަނެއްގައި ވޯޓުލާނަމަ އެތަނަކަށް ރަޖިސްޓްރީވާންޖެހެއެވެ.
ޤައުމީ ކޮމިޓީގެ މެންބަރުންނާ ޕާޓީތަކުން ހުށައެޅި ލަފާގެ މައްޗަށް ބިނާކޮށް، އިލެކްޝަންސް ކޮމިޝަނުން މިވަނީ، "ލޯކަލް ކައުންސިލް އިންތިޚާބު 2020″ގައި މާލެއަށް ރީ-ރެޖިސްޓްރީކުރި މީހުންގެ ލިސްޓު އެގޮތުގައި ބޭއްވުމަށް ނިންމަވާފައެވެ.
އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބް ވިދާޅުވީ، މިގޮތަށް ނިންމީ މާލެއަކީ ދިރިއުޅުމުގެ އެކި ބޭނުންތަކަށް ހިޖުރަކޮށް ގިނަބަޔަކު ދިރިއުޅެމުންދާ ތަނަކަށްވާތީކަމަށެވެ. މިގޮތަށް ނިންމީ އަލުން ރީ-ރެޖިސްޓަރ ކުރަންޖެހޭނަމަ ވޯޓުލުމުގެ ޙައްޤު ލިބިގަންނަ މީހުން މަދުވެދާނެކަމަށް ޕާޓީތަކުން ހުށައެޅި ޚިޔާލުތަކަށް ބެލުމަށްފަހުގައިކަމަށް ޙަބީބް ވިދާޅުވިއެވެ.
ނަމަވެސް އަތޮޅުތަކުގައި، އުފަން ރަށް ނޫން އެހެން ރަށަކަށް އަދި ރިސޯޓްތަކަށް ވޯޓްލާ މީހުން އެތަންތަނަށް ރީ-ރެޖިސްޓްރީ ކުރަން ޖެހޭނެކަމަށް ޙަބީބް ވިދާޅުވިއެވެ. ރިޔާސީ އިންތިޚާބުގައި ވޯޓުލުމަށްޓަކާ ރީ-ރަޖިސްޓްރީކުރުމުގެ ފުރުޞަތު ހުޅުވާލުމަށް ނިންމާފައިވަނީ މިމަހުގެ 16 ވަނަ ދުވަހުން ފެށިގެން އޮގަސްޓް 5 ވަނަ ދުވަހުގެ ނިޔަލަށެވެ.
މިފަހަރު އޮންލައިންކޮށް ރީ-ރަޖިސްޓްރީވުމުގެ ފުރުޞަތުވެސް ހުޅުވާލުމަށް އިލެކްޝަން ކޮމިޝަނުން ވަނީ ނިންމާފައެވެ. ޙަބީބް ވިދާޅުވީ މިގޮތަށް ނިންމީ، ގިނަބަޔަކަށް ފުރުޞަތުދީ ރަޖިސްޓްރޭޝަން ޕްރޮސެސް ވީހާވެސް ފަސޭހަކޮށްދިނުމަށްކަމަށެވެ.
