ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައިި ޕީޕީއެމްގެ ރިޔާސީ ކެނޑިޑޭޓް ރައީސް ޔާމީން ވާދަ ކުރައްވާނެކަމަށް ޕީޕީއެމް، ޕީއެންސީ ހިންގުމާއި ހަވާލުވވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.
އޭނާ މިހެން ވިދާޅުވީ ކުރިއަށް އޮތް ރިޔާސީ އިންތިހާބުގައި އެންމެ ބުއްދިވެރި ގޮތަކީ ކުރީގެ ރައީސް ޔާމީން އަދި އެމަނިކުފާނު ވެސް ކުރިމަތިނުލެއްވުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެ ދެއްކެވި ވާހަތަކަށް ރައްދު ދެއްވައި ކުރެއްވި ޓުވީޓުގައެވެ.
ރައީސް ނަޝީދު މިރޭ ދަ ޑިމޮކްރެޓްސް އުފެއްދުމަށް ބޭއްވި ޖަލްސާގައި ވާހަކަ ދައްކަވަމުން ވިދާޅުވީ ފެންނަ އެންމެ ރަނގަޅު ގޮތަކީ އެމަނިކުފާނާއި ޔާމީން އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބަށް ނުނުކުތުމެވެ. އޭގެ ބަދަލުގައި ދެ ބޭފުޅުން އެކުގައި މަސައްކަތްކޮށް ރައްޔިތުން އެދޭ ހެޔޮ ގޮތެއް ހޯދައިދޭންވީ ކަމަށެވެ.
އަޅުގަނޑަށް ފެންނަ ފެނުމުގައި މި އިންތިހާބަށް އަޅުގަނޑުމެން ދެ މީހުން ވެސް ކުރިމަތިނުލާންވީ، އަޅުގަނޑުމެން ދެ މީހުން އެކުގައި ބާރަށް މަސައްކަތްކޮށްގެން ރައްޔިތުން އެދޭ ގޮތެއް ހޯދައިދޭންވީ.
– ކުރީގެ ރައީސް ނަޝީދު ވިދާޅުވިއެވެ.
ނަޝީދުގެ ވާހަކަ ތަކާއި ގުޅިގެން އަދުރޭ ވިދާޅުވި މިއަދު މިޤައުމަށް ދިމާވެފައިވާ ހުރިހާ މައްސަލައަކުން ހައްލު ހޯދާ ދެވޭނެ ހަމައެކަނި ކެނޑިޑޭޓަކީ ރައީސް ޔާމީންކަމަށެވެ. ރައީސް ޔާމީން ރިޔާސީ އިންތިޚާބުގައި ވާދަކުރާނެކަމަށާއި، އެކަމަށް އެދޭ ރައްޔިތުން އިންތިހާއަށް ގިނަ ކަމަށް އަދުރޭ ވިދާޅުވިއެވެ.
އިރާދަ ކުރެއްވިއްޔާ ރައީސް ޔާމީން މިއަހަރުގެ ރިޔާސީ އިންތިޚާބުގައި ވާދަ ކުރައްވާނެ. ރައްޔިތުން ބޭނުންވާ ރަނގަޅުގޮތް ހޯދައި ދެވޭނެކަމަށް ރައްޔިތުން ގަބޫލުކުރަނީ ރައީސް ޔާމީން ރާއްޖޭގެ ޒަޢާމަތާ ޙަވާލުވެގެން. އެ ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަކަށް ރައްޔިތުން މިއަދަކު ގަބޫލެއް ނުކުރޭ.
– އަދުރޭ ވިދާޅުވިއެވެ.
އިރާދަ ކުރެއްވިއްޔާ ރައީސް ޔާމީން މިއަހަރުގެ ރިޔާސީ އިންތިޚާބުގައި ވާދަ ކުރައްވާނެ.ރައްޔިތުން ބޭނުންވާ ރަނގަޅުގޮތް ހޯދައި ދެވޭނެކަމަށް ރައްޔިތުން ގަބޫލުކުރަނީ ރައީސް ޔާމީން ރާއްޖޭގެ ޒަޢާމަތާ ޙަވާލުވެގެން.އެ ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަކަށް ރައްޔިތުން… pic.twitter.com/9PW0kQ0qsl
— Abdul Raheem Abdulla (@Banafsaa) July 5, 2023
ރައީސް ނަޝީދުގެ މިވާހަތަކާއިއެކު ޕީޕީއެމްގެ ލީޑަރޝިޕާއި، ޕާޓީގެ އާންމު ގިނަ މެމްބަރުން ވަނީ ރައީސް ޔާމީން ރިޔާސީ އިންތިޚާބުގައި ވާދަކުރާނެކަމަށް ވިދާޅުވެފައެވެ. އަދި އެނިންމުން ބަދަކު ކުރަން ކިތަންމެ މަސައްކަތެއް ކުރެއްވިޔަސް އެކަން ނުވާނެކަމަށް އެޕާޓީގެ ގިނަ މެމްބަރުން ދަނީ ބުނަމުންނެވެ.
އަންނަ ރިޔާސީ އިންތިހާބުގައި އެކުގައި މަސައްކަތް ކުރުމަށް ޕީޕީއެމް/ޕީއެންސީއާ އެކު ޑިމޮކްރެޓްސް އިން މިހާރު އަންނަނީ ރަސްމީކޮށް މަޝްވަރާތައް ކުރަމުންނެވެ. ނަމަވެސް، އެ ދެ ޕާޓީން ވެސް ނިންމާފައިވަނީ ފުރަތަމަ ބުރުގައި ދެ ޕާޓީ ވެސް ވަކިން ވާދަކުރުމަށެވެ. މީގެކުރިން ނަޝީދުގެ ފަރާތުން ޖުމްހޫރީ ޕާޓީއާ ވެސް މަޝްވަރާތަކެއް ކުރި ނަމަވެސް، ނަތީޖާއެއް ނުކުމެފައެއް ނުވެ އެވެ. ޖުމްހޫރީ ޕާޓީން ވެސް އިންތިހާބުގައި ވާދަކުރަނީ ވަކިންނެވެ.
