އެމްއެމްއޭއިން "ބޭރު ފައިސާއާ ބެހޭ ގާނޫނު"ގެ ދަށުން އައު ގަވައިދު ގެޒެޓްކޮށްފި އެވެ. މި ގަވައިދަކީ ރާއްޖޭގެ ބޭންކުތަކުގައި ވަކި އަދަދަކަށް ބޭރު ފައިސާ މާރުކުރަން ޖެހޭ ކުންފުނިތައް އެމްއެމްއޭގައި ރަޖިސްޓްރީ ކުރުމާ ބެހޭ ގަވައިދެވެ. "ބޭރު ފައިސާއާބެހޭ ޤާނޫނުގެ ދަށުން ރަޖިސްޓަރީކުރުމުގެ ގަވައިދު" ގެ ނަމުގައި ގެޒެޓްކޮށްފައިވާ މި އުސޫލު އެކުލަވާލާފައިވަނީ ބޭރު ފައިސާއާ ބެހޭ ޤާނޫނުގެ 18 ވަނަ މާއްދާގެ ދަށުންނެވެ.
މި ގަވައިދުގެ ދަށުން، ފަތުރުވެރިކަމުގެ ދާއިރާގެ މުދާ ވިއްކާ އަދި ޚިދުމަތް ފޯރުކޮށްދޭ ފަރާތްތަކުން 2025 ވަނަ އަހަރުގެ ޖަނަވަރީ 13 ގެ ކުރިން އެމްއެމްއޭގައި ރަޖިސްޓަރކުރަން ޖެހެ އެވެ. އަދި ފަތުރުވެރިކަމުގެ ދާއިރާގައި ހަރަކާތްތެރިވާ، 2024 ވަނަ އަހަރު ބޭރު ފައިސާއިން މަދުވެގެން 15 މިލިއަން އެމެރިކާ ޑޮލަރަށް ނިސްބަތްވާ އަދަދެއް ލިބިފައިވާ ފަރާތްތަކުން ފެބްރުއަރީ 3 ގެ ކުރިން ރަޖިސްޓަރވާން ޖެހެ އެވެ.
2025 ވަނަ އަހަރު ފެށުނު ފަހުން އަލަށް ފަތުރުވެރިކަމުގެ ދާއިރާގެ މުދަލެއް ނުވަތަ ޚިދުމަތެއް ފޯރުކޮށްދޭން ފަށާ ފަރާތްތަކުން، އެ ވިޔަފާރިއެއް ފަށާތާ 30 ދުވަހުގެ ތެރޭގައި އެމްއެމްއޭގައި ރަޖިސްޓަރވާން ޖެހެ އެވެ. މީގެ އިތުރުން، ފަތުރުވެރިކަމުގެ ދާއިރާގެ މުދާ ވިއްކާ އަދި ޚިދުމަތް ފޯރުކޮށްދޭ ފަރާތްތަކާއި މާލީ އިދާރާތައް ފިޔަވައި، އެހެން ފަރާތަކުން ވިއްކާ ނުވަތަ ފޯރުކޮށްދޭ މުދަލާއި ޚިދުމަތަށް މީލާދީ އަހަރެއްގެ ތެރޭގައި ބޭރު ފައިސާއިން މަދުވެގެން 15 މިލިއަން އެމެރިކާ ޑޮލަރަށް ނިސްބަތްވާ އަދަދެއް ލިބިފައިވާނަމަ، އެ މީލާދީ އަހަރަކާ ވިދިގެން އަންނަ އަހަރުގެ ޖަނަވަރީ މަސް ނިމުމުގެ ކުރިން އެމްއެމްއޭގައި ރަޖިސްޓަރކުރަން ޖެހެ އެވެ.
މި ގަވައިދުގެ ދަށުން ރަޖިސްޓަރކުރުމަށް ހަމަޖެހިފައިވަނީ "މޯލްޑިވްސް މަނިޓަރީ އޮތޯރިޓީގެ ފޮރިން އެކްސްޗޭންޖު ރަޖިސްޓްރޭޝަން ޕޯޓަލް" މެދުވެރިކޮށެވެ.
