ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ނުހައްގުން ބަޔަކަށް ގޯތި ވިއްކާފައިވާ މައްސަލައާ ގުޅޭގޮތުން އެ ކުންފުނީގެ އާ މެނޭޖިން ޑިރެކްޓަރު މުހައްމަދު މައުރޫފް ޖަމީލް ކަންކަން ރަގަޅު ކުރައްވާނެކަމަށް އުއްމީދު ކުރައްވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވެފައިވަނީ، ގޯތި ލިސްޓު އެކުލަވާލީ ކުރިން ވެސް އަދި މިހާރު ވެސް އެތައް ބަޔަކަށް ބޭއިންސާފުން ގޯތި ލިބޭގޮތަށް ކަމަށާއި، މިފަހަރު ވެސް އެ ބޭއިންސާފަށް އިތުރު ބޮޅެއް އިތުރުވެގެން ދިޔައީ ކަމަށެވެ. ނަމަވެސް މިހާރު މި މައްސަލަ ތަހުގީގު ކުރަން ފަށައި، އެޗްޑީސީގެ ވެރިން ބަދަލުކޮށްފައިވާތީ، ފުލުހުން ރަނގަޅު ތަހުގީގެއް ހިންގާނެ ކަމަށާއި މައުރޫފް ޖަމީލް އެންމެހާ ކަންކަން އިސްލާހު ކުރައްވާނެ ކަމަށް އުންމީދު ކުރައްވާ ކަމަށް ނަޝީދު ވިދާޅުވިއެވެ.
އެޗްޑީސީގެ އެމްޑީގެ މަގާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް އައްޔަނުކުރެއްވީ އިއްޔެއެވެ. މި މަގާމު ހުސްވެފައިވަނީ ކުރިން އެ މަގާމުގައި ހުންނެވި އިބްރާހިމް ފަޒުލް ރަޝީދު، ގޯތި މައްސަލައިގައި ކޮރަޕްޝަންގެ ބޮޑެތި ތުހުމަތުތަކެއް ފެންމަތިވުމާ ގުޅިގެން އިސްތިއުފާ ދެއްވުމުންނެވެ.
މިހާރު ކުރިއަށްދާ ބިންވެރިޔާ ސްކީމުގެ ތަހުގީގާ ގުޅިގެން ފަޒުލް ހިމެނޭގޮތަށް 20 ފަރާތެއްގެ ޕާސްޕޯޓު ފުލުހުން އެދިގެން ހިފަހައްޓާފައިވާއިރު، ކުރީ ސަރުކާރުގައި ބިންވެރިޔާ ސްކީމު ހިންގެވުމުގައި އެންމެ އިސްކޮށް ތިއްބެވި ހަތަރު ބޭފުޅުންގެ ޕާސްޕޯޓުވެސް ވަނީ ހިފަހައްޓާފައެވެ.
