ދަ ޑިމޮކްރެޓްސް އާއި އިދިކޮޅު ޕްރޮގްރެސިވް ކޯލިޝަން ގުޅިގެން މިހާރު ކުރިއަށް ގެންދާ މަޝްވަރާ ތަކަކުގައި ވާހަކަ ދެކެވޭނީ ސީދާ ރައީސް ޔާމީން ދެއްވާ ނޯޓުގައިވާ ކަންކަމަށް ކަމުގައި ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވެއްޖެއެވެ.
ދަ ޑިމޮކްރެޓްސް އާއި، ޕްރޮގްރެސިވް ކޯލިޝަނުން މިއަދު ބޭއްވި މަޝްވަރާ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝުޖާ ވިދާޅުވީ ޕީޕީއެމްގެ ރިޔާސީ ކެނޑިޑޭޓަކީ ރައީސް ޔާމީންކަމަށެވެ. ރައީސް ޔާމީން ނޫން ކެނޑިޑޭޓެއް ޕީޕީއެމްއިން ނުފެންނާނެކަމަށެވެ. އަދި މިހާރު ކުރިއަށްދާ މަޝްވަރާ ތަކަކީ ސީދާ ރައީސް ޔާމީންގެ އިރުޝާދުގެ ދަށުން ކުރިއަށް ގެންދާ މަޝްވަރާ ތަކެެއްކަމަށް ޝުޖާ ވިދާޅުވިއެވެ.
އޭނާ ވިދާޅުވީ މިމަޝްވަރާތައް ކުރަނީ ސީދާ ރައީސް ޔާމީން ފޮނުއްވާ ނޯޓުގައިވާ ކަންތައްތަކަށް ކަމަށެވެ. ބައްދަލުވުންތަކުގައި އެނޫން ކަމަށާއި ގުޅޭގޮތުން ކުރާނެ މަޝްވަރާ އެއް ނޯންނާނެކަމަށް އޭނާ ވިދާޅުވިއެވެ.
އަޅުގަނޑުމެން މަޝްވަރާ ކުރަނީ ރައީސް ޔާމީން ދެއްވާ ނޯޓުގައިވާ ކަންކަމަށް. މިމަޝްވަރާތަކާއިމެދު ކަންބޮޑުވެގެން އަޅުގަނޑުމެންގެ ގްރާސްރޫޓް ސެނެޓްގެ މެމްބަރުން ނޫޅޭ.
– ޝުޖާ ވިދާޅުވިއެވެ.
މިބައްދަލުވުމުގައި، ޑިމޮކްރެޓްސްގައި އިސްކޮށް ހަރަކާތްތެރިވާ އަމްރު ވިދާޅުވީ ޑިމޮކްރެޓްސް އުފެއްދުމުގެ ހުއްދަ ދިނުމާއިއެކު މިހާރު މަސައްކަތް ކުރަމުންދަނީ ޖަލްސާ ބޭއްވުމަށް ވާންޖެހޭ ތައްޔާރީތައް ވުމަށް ކަމަށެވެ. އަދި އެޕާޓީގެ ނެރޭނެ ކެނޑިޑޭޓެއް ހުންނާނެ ކަމަށާއި، ޕީޕީއެމްގެ ކެނޑިޑޭޓަކީ ރައީސް ޔާމީންކަމަށެވެ.
ޕީޕީއެމްއާއި ދަ ޑިމޮކްރެޓްސް އާއިއެކު ކުރެވޭ މަޝްވަރާތަކުގައި ޕްރޮގްރެސިވް ކޯލިޝަންގެ ބައެއް ސެނެޓު މެމްބަރުންގެ ކަންބޮޑުވުން އޮތްކަމަށް ވަނީ ކަންބޮޑުވުން ފާޅުކޮށްފައެވެ. ނަމަވެސް މިމަޝްވަރާތަކަކީ ސީދާ ރައީސް ޔާމީންގެ މަޝްވަރާގެ މަތީން ކުރިއަށް ގެންދާ މަޝްވަރާތަކެއްކަމަށް މަޝްވަރާތަކުގައި ބައިވެރިވާ ބޭފުޅުން ވަނީ ބުނެފައެވެ.
