ގާސިމް ވިއްކަވާލެއްވުމަށް މަސައްކަތް ކުރައްވަމުން ގެންދެވި ކ. ވާވެއްދިފަޅު ނުވަތަ ވާރެއްދޫ ވިއްކުން އެންޓި ކޮރަޕްޝަން ކޮމިޝަން (އޭސީސީ) އިން ހުއްޓުވީ ސަރުކާރު އަޑީގައި އޮވެގެންކަމަށް ތުހުމަތު ކުރައްވަމުން، ޖުމުހޫރީ ޕާޓީގެ ލީޑަރު ގާސިމް އިބުރާހިމް ރައީސް ސާލިހާމެދު މިއަދު ވަރަށްބޮޑަށް ނުރުހުން ފާޅު ކޮށްފިއެވެ.
މިއަދު ބޭއްވުނު، ޖުމުހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަ ދައްކަވަމުން ގާސިމް ވިދާވީ ސުޕްރިމްކޯޓުންނާއި، އެންޓި ކޮރަޕްޝަންގެ ކޮމިޝަނުންވެސް ނިމިފަ އޮތް މައްސަލައެއްގެ، މީހަކު ލާ ސިޓީއަކަށް ފަޅު ވިއްކުން ހުއްޓުވިގެން ނުވާނެ ކަމުގައެވެ.
ސުޕްރިމް ކޯޓުން ނިމިފަ، އެންޓިކަރަޕްޝަން ކޮމިޝަނުން ނިމިފަ އޮތްކަމެއްގަ، އިތުރަށް ކޮންތާކުން ކާކު ލާ ސިޓީއެއްތޯ ބަލައިގަނެގެން ހުއްޓުވަން އޮތީ އެ ޕްރޮޖެކްޓު؟ ނުތަވަ އެ މައްސަލަ. ވިދާޅުވެބައްލަވާ. ކާކަށްތޯ ހުއްޓުވޭނީ؟ ރައީސުލްޖުމުހޫރިއްޔާއަށްވެސް ސުޕްރިމް ކޯޓުން ނިންމީމަ ދެން ރައްޔިތުންގެ މަޖިލީހަށްވެސް ނޯންނާނެ އޭގެ ބާރެއް. ގާނޫނުއަސާސީގަ އޮތްގޮތް އެއީ. އަޅުގަޑުގެ ވާހަކައެއް ނޫން އަޅުގަޑު މިދަންނަވަނީ. އެހެންވީމަ މިވަރުގެ ޖަރީމާ ހިންގީމަ ކަމަކު ނުދޭ. "އިޓް އިޒް ޓޫ މަޗް". "އިޓް އިޒް މޯ ދޭން އިނަފް". "ޔޫ ހޭވްޓު ގޯ ބެކް". މިހާރު ދާންވީ، ކަނޑާލަންވީ ގެއަށް. ވަރަށް ސާފުކޮށް މިބުނީ. މިހާރު ކަނޑާލަންވީ ގެއަށް.
ރައީސް ސާލިހަށް ނިސްބަތް ކުރައްވަމުން، ސަރުކާރާމެދު އޮތް ހިންހަމަ ނުޖެހުން ފާޅު ކުރައްވާ ގާސިމް ވިދާޅުވިއެވެ.
މިއަދުގެ ކައުންސިލް ބައްދަލުވުމުގައި ވާހަކަ ދައްކަވަމުން ގާސިމް ވަނީ ރައީސް ސާލިހު މިހާރު ގެންދަވަނީ ގޯހުގެ މައްޗަށް ގޯސް ހައްދަވަމުންކަމަށް ވިދާޅުވެ، ސަރުކާރަށް ރައްޔިތުންގެ އިތުބާރު އޮތްތޯވެސް ސުވާލު އުފައްދަވާފައެވެ. އަދި ގާސިމްވަނީ ސަރުކާރުން މަޖިލިސް "ޑެޑް ލޮކަށް" ގެނެސްގެން އުޅޭކަމަށްވެސް ވިދާޅުވެފައެވެ.
ޖުމުހޫރީ ޕާޓީން މެމްބަރުން ވަކިވެ ސަރުކާރާ ގުޅެމުންދާ ދިއުމަށް ނިސްބަތްކޮށް، ހިންހަމަނުޖެހުން ފާޅު ކުރައްވަމުން ގާސިމްވަނީ، ރައީސް އޮފީހުގެ މިނިސްޓަރުކަމުގައި ހުންނެވި އެޕާޓީގެ ކުރީގެ ސެކެޓްރީ ޖެނެރަލް އަހުމަދު ސަމީރަށްވެސް ވަރަށްބޮޑަށް ފާޑު ވިދާޅުވެފައެވެ. ގާސިމް ތުހުމަތު ކުރައްވާފައިވާ ގޮތުގައި، ޖޭޕީގެ މެމްބަރުންނަށް ގުޅާ، އެޕާޓީން މެމްބަރުން ވަކި ކުރުމަށް މަސައްކަތް ކުރަމުންދަނީ ސަމީރެވެ.
އަޅުގަޑުމެންގެ އެސްޖީއަކަށް ހުންނެވި ސަމީރުގެ ރެއާދުވާލުގެ މަސައްކަތަކީ އަޅުގަޑުމެން ޕާޓީގަ ތިބޭ ތަންތަނުގަ ތިބޭ މީހުން، އެކި ބޭފުޅުންނަށް ފޯނު ކޮށްގެން، ކޮންވިންސް ކޮށްދީގެން އަބަދު ރައީސް އޮފީހަށް ގެންގޮސްގެން ބޮޑުގޮނޑި ދައްކައިގެން.. ބަލަ ތަންކޮޅެއް ލަދުހަޔާތް ކުޑަ ދޯ މިވަރު ދެން. ލަދެއް ހަޔާތެއް ހުންނަން ޖެހޭނެ ދޯ! ސަމީރެއް ކަމަކު، އަދި އެހެން މީހެއްކަމަކު. ދެން އެހިސާބަށް ދިޔައިމާ އަޅުގަޑު ދަންނަވާލީ، ދަންނަވާލަން ބޭނުންވަނީ ބޭފުޅުންނޭ މިއަދެއް ނޫނޭ އެކަނި އޮތީ. މާދަމާވެސް އެބައޮތޭ. އަޅުގަޑުމެންގެ ބުއްދިވެރި ވިސްނުންތެރިން ބުނަނީ ކާޅަކަށް ދުވަހެއް އޮތިއްޔާ ވާލަށްވެސް ދުވަހެއް އަންނާނެއޭ.
ޖުމުހޫރީ ޕާޓީ ދޫކޮށް ދާ، ސަރުކާރުގެ ވަޒީފާގައި ތިބި ސިޔާސީ މުވައްޒަފުންނަށް ނިސްބަތްކޮށް ގާސިމް ވިދާޅުވިއެވެ.
ގާސިމް އިބުރާހިމް ވިދާޅުވީ އެބޭފުޅުން ވިސްނަމުންދަނީ ގޯސްކޮށް ކަމުގައެވެ. އަދި ހެޔޮކަމެއް ކޮށްދިން މީހަކަށް ތެޔޮ ހަމެއް ދެވިދާނެކަމަށާއި، އެހެންނަމަވެސް ތެޔޮހަން އަބަދު ނުދެވޭނެކަމަށް ވިދާޅުވަމުން ގާސިމް ވިދާޅުވީ ކަންކަން ކުރަންވާނީ "ތަންކޮޅެއް ތާހިރުކޮށް" ކަމުގައެވެ.
ކޮމެންޓު ފޮނުވާ