ސެޕްޓެމްބަރުގައި އޮންނަ ރިޔާސީ އިންތިހާބުގައި ވަކިން ވާދަކުރުމަށް ޖުމްހޫރީ ޕާޓީ (ޖޭޕީ) އިން ނިންމުމުން ސަރުކާރުގެ އެކި މަޤާމުތަކުަގއި ތިއްބެވި ޖުމްހޫރީ ޕާޓީގެ ބައެއް މެމްބަރުންތަކެއް ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާ ގުޅިއްޖެއެވެ.
އެމްޑީޕީން މިރޭ ކުރެއްވި ޓުވީޓެއްގައި ޖޭޕީގެ ކުރީގެ ގިނަ މެންބަރުންތަކެއް އެ ޕާޓީ އަށް ސޮއި ކުރައްވާފައިވާ ކަމަށެވެ. އޭގެ ތެރޭގައި ސަމީރު އާއި ޝާހުގެ އިތުރުން އެ ޕާޓީގެ ކައުންސިލްގައި އުޅުއްވި ބައެއް މެންބަރުން ވެސް ވަނީ އެމްޑީޕީ އަށް ސޮއި ކުރައްވައިފައެވެ.
އެ ބޭފުޅުންގެ ފޯމާ ހަވާލުވެވަޑައިގެންނެވީ ރައީސް އިބްރާހިމް މުހައްމަދު ސޯލިހެވެ. އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ބައިވެރިވެވަޑައިގަތެވެ. ޖުމްހޫރީ ޕާޓީން ވަނީ ކުރިޔަށް އޮތް ރިޔާސީ އިންތިހާބުގެ ފުރަތަމަ ބުރުގައި ރައީސް އިބްރާހިމް މުހައްމަދު ސޯލިހާ ކޯލިޝަން ނުހަދައި ވަކިން ވާދަ ކުރަން ނިންމައިފައެވެ.
ކުރީގެ ކައުންސިލް މެންބަރުން ހިމެނޭގޮތަށް ޖޭޕީގެ ކުރީގެ ގިނަ މެންބަރުންތަކެއް މިއަދު އެމްޑީޕީ އަށް ސޮއި ކުރައްވައިފި.
އެމްޑީޕީއަށް މަރުޚަބާ! #Ibu2023 #MDP2023 pic.twitter.com/kWDk790VTb— MDP Secretariat (@MDPSecretariat) June 21, 2023
މި ބޭފުޅުން އެމްޑީޕީއާ ގުޅިވަޑައިގެންނެވިއިރު މިއަދަކީ އެ ޕާޓީގެ ރައީސްގެ މަގާމުގައި ހުންނެވި މަޖިލިސް ރައީސް މުހައްމަދު ނަޝީދު އެ ޕާޓީން ވަކިވި ދުވަހެވެ. ހިޔާލު ތަފާތުވުންތައް ގިނަވެ ނަޝީދު ގެންދަވަނީ އާ ސިޔާސީ ހަރަކާތެއް ލީޑު ކުރައްވަމުންނެވެ.
ރިޔާސީ އިންތިހާބަށް ވަގުތު ކުޑަތަންވަމުން އަންނައިރު ޕާޓީތަކުން ދަނީ މެމްބާޝިޕް އިތުުރު ކުރުމަށް އަމާޒުކޮށް ހާއްސަ ހަރަކާތްތަކެއް ހިންގަމުންނެވެ. ޖޭޕީގެ މެމްބަރުންތަކެއް އެމްޑީޕީއާ ގުޅުނުއިރު ޖޭޕީން ވެސް ދަނީ އެ ޕާޓީއަށް މެމްބަރުން ވެއްދުމަށް އަމާޒުކޮށް ރާއްޖޭގެ އެކި ކަންކޮޅުތަކުން ފޯމު ފުރަމުންނެވެ.
