ރައްޔިތުންގެ މަޖިލީހުގެ ސާފު މެޖޯރިޓީ އޮވެ މަޖިލިސް ހުއްޓުވާލާފައިވަނީ ސަރުކާރުން އިދިކޮޅު ފަރާތްތަކުން އަޑު ކަނޑުވާލަން ކަމަށް އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
އިދިކޮޅު ކޯލިޝަނުންގެ މަޖިލިސް މެމްބަރުން ވަނީ މަޖިލީހުގައި މިއަދު އިހުތިޖާޖުކޮށް، ޖަލްސާ ކުރިއަށް ގެންދެވޭނެ ޖާގަ ހޯދައި ދިނުމަށް ސަރުކާރަށް ގޮވާލާފައެވެ. އެކޯލިޝަނުން ބުނީ ސަރުކާރު ލީޑުކުރާ އެމް.ޑީ.ޕީ ގެ މެޖޯރިޓީއާއިއެކު ހިނގަމުންދާ ރައްޔިތުންގެ މަޖިލިސް، ސަރުކާރުން ރާވައިގެން ހުއްޓުމަކަށް ގެނެސްފައި އޮތް އޮތުން، ކުށްވެރި ކުރާކަމަށެވެ. މިގޮތަށް މަޖިލިސް ހުއްޓުމަކަށް ގެނެސްފައި ވަނީ ސަރުކާރުގެ މެޖޯޓީއޮވެމެ، ސަރުކާރުން ބޭނުންވެގެންކަމަށް އިދިކޮޅު ޕީޕީއެމްގެ ޕީޖީ ލީޑަރު އަހުމަދު ސަލީމް ވިދާޅުވިއެވެ.
ރައްޔިތުންގެ މަޖިލީހަކީ ދައުލަތުގެ 3 ބާރުގެ ތެރެއިން އެއް ބާރުކަމަށް ވީހިނދު، ރައްޔިތުންގެ މަޖިލީހުގެ ޖަލްސާ ނުބޭއްވުމަކީ މި ކޯލިޝަނުން އިންތިހާއަށް ކަންބޮޑުވާ ކަމެއް. ރައްޔިތުންގެ މަޖިލީހަކީ ސަރުކާރާއި މިނިވަން މުއައްސަސާތަކާއި ވަޒީރުން ޖަވާބުދާރީ ކުރުވުމުމަށް އޮތް ދައުލަތުގެ އެންމެ މުހިންމު އެއް ބާރު ކަމަށްވީހިނދު، ރައްޔިތުންގެ މަޖިލީހުގައި ސަރުކާރުން މަރުތަޅު އަޅުވާފައި އޮތުމާއެކު މިހާރު ދިވެހި ދައުލަތް ހިނގަމުން މިދަނީ ޤާނޫނުއަސާސީގައި ބަޔާންކުރާ 3 ބާރު ވަކިވެފައިވާ ނިޒާމެއްގެ ތެރެއިން ނޫންކަން ފާހަގަކުރަން.
– އިދިކޮޅު ކޯލިޝަނުން ބުނެފައިވެއެވެ.
ސަރުކާރުން ގަސްތުގައި މަޖިލިސް ޑެޑްލޮކަކަށް ގެންގޮސް ދައުލަތުގެ އެންމެ މުހިއްމު އެއްބާރު ހައިޖެކް ކޮށްފައިވާތީ ޕްރޮގްރެސިވް ކޮންގްރެސް ކޯލިޝަންގެ ޕީޖީ ގްރޫޕުން ކަންބޮޑުވުން ފާޅުކުރުން. pic.twitter.com/UKsq0nuJOF
— Progressive Party of Maldives (@ProgressPartyMV) June 20, 2023
އިދިޅު ކޯލިޝަނުން ބުނީ މިގޮތަށް މިކަން ކުރަނީ ރިޔާސީ އިންތިޚާބާ މިހާ ގާތްވެފައިވަނިކޮށް، ހީލަތްތެރިކަމާއެކު ދުރާލާ ސަރުކާރުން ރާވައިގެން، ރިޔާސީ އިންތިޚާބަށް ނުފޫޒު ފޯރުވުމަށާއި ރައްޔިތުންގެ އަޑު ކަނޑުވާލައި، އިދިކޮޅު ލީޑަރު އަދި ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމަށް އަނިޔާ ދިނުމަށް ކަމުގައެވެ.
ދިވެހި ދައުލަތުގެ ކީރިތިކަމާއި މޫރިތިކަން ނަގާލައި، ޤައުމުގެ ސިޔާދަތާއި މިނިވަންކަން ގެއްލުވާލައި، ދައުލަތުގެ ތިން ބާރު މައްސުނިކޮށް، ރައްޔިތުންގެ މަޖިލީހުގައި މަރުތަޅު އެޅުވުމަކީ ޚުދުމުޚުތާރު، ޒިންމާދާރުކަން ކުޑަ އަމަލެއްކަމަށް އިދިކޮޅު ކޯލިޝަނުން ބުނެފައިވެއެވެ.
އެކޯލިޝަނުން ބުނީ ދުވަހަކުވެސް ދިވެހި ދައުލަތް ނުވެއްޓޭފަދަ ނާޒުކު ޙާލަތަކަށް ދިވެހި ޤައުމު ވެއްޓިފައިމިވާ ދަނޑިވަޅުގައި ރާއްޖޭގެ ސަލާމަތީ ޚިދުމަތްތަކުން ހުޝިޔާރުވެ، އަޅުއްވަންޖެހޭ ފިޔަވަޅުތައް އެޅުއްވަން ޖެހޭކަމަށެވެ. އަދި މިނިވަން މުއައްސަސާތަކުން ރާއްޖޭގައި ހިނގަމުންދާ ޤާނޫނާ ޚިލާފު ކަންކަމަށް ފާރަވެރިވެ، ރައްޔިތުންގެ މަޖިލިސްގެ ޖަލްސާތައް ބޭއްވޭނެގޮތެއް މިހާރުން މިހާރަށް ހެދުމަށް ސަރުކާރަށް ވަނީ ގޮވާލާފައެވެ.
