ރާޅާއެޅުމުގައި ގިނަ ދުވަސްތަކެއް ވަންދެން ހަރަކާތްތެރިވެ، އަދި ފަހުން ރާޅާއަޅާ މީހުންނަށް ގިނަ ގޮތްގޮތުން އެހީތެރިކަން ފޯރުކޮށްދެމުން ގެންދިޔަ އިބްރާހިމް އަހްމަދު ޝުކޫރު (ޝޭޕަރު އިބުރޭ) ކުއްލިގޮތަކަށް ނިޔާ ވެއްޖެއެވެ.
އިބުރޭ ނިޔާވީ، މިދިޔަ މަހުގެ 14 ގައި ޖެހުނު ސްޓްރޯކަކާ ގުޅިގެން ސްރީ ލަންކާ އަށް ގެންގޮސް ހޮސްޕިޓަލްގައި ފަރުވާ ދޭތާ ދުވަސް ތަކެއް ފަހުންނެވެ. އިބުރޭ އެންމެ ހާއްސަ ގޮތެއްގައި ފާހަގަ ކުރެވެނީ ސާފިން ބޯޑު ޝޭޕް ކުރަން ރާއްޖޭގައި ފުރަތަމަ ފެށި މީހާގެ ގޮތުގައެވެ.
އޭނާ ވަނީ ސާފިން އެސޯސިއޭޝަންގެ އެކްސްކޯގެ މެންބަރުކަން ވެސް ކޮށްފައެވެ. އިބުރޭ ނިޔާވުމާއި ގުޅިގެން ވަރަށް ގިނަ ބަޔަކު އަންނަނީ އޭނާއަށް ހެޔޮދުއާކޮށް، ހިތާމައިގައި ބައިވެރިވަމުންނެވެ.
އިބުރޭ މަސައްކަތް ކުރަމުން އައީ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގައެވެ. އެމްއޭސީއެލް އިން ވަނީ އިބުރޭ ނިޔާވުމާއި ގުޅިގެން އާއިލާއަށް ތައުޒިއާ ކިޔައި ބަޔާނެއް ނެރެފައެވެ.
