ޖުމްހޫރީ ޕާޓީއަކީ ޒުވާނުންނަށް ތެދު މަގު ދައްކާ ފުރުސަތު އޮތް އޮތް ޕާޓީއެއް ކަމުގައި އެޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
ޤާސިމް މިހެން ވިދާޅުވީ ލ.ގަމު އެމްޑީޕީގެ އިސްސަފުގައި ހަރަކާތްތެރިވި ޒުވާނަކު އިތުރު 100 މީހުންގެ ސޮޔާއިއެކު ޖޭޕީއާއި ގުޅިވަޑައިގަތުުން އެކަމަށް މަރުހަބާ ވިދާޅުވެ ކުރެއްވި ޓުވީޓުގައެވެ.
ޤާސިމް ވިދާޅުވީ ޖުމްހޫރީ ޕާޓީއަކީ ދިވެހި ޒުވާނުންނަޒށް ހެޔޮ އެދޭނެ ޕާޓީއެއްކަމަށެވެ. އަދި ޒުވާނުން ބޭނުންވާ ކަންތައްތަކާއި، ޒުވާނުންގެ އުންމީދުތައް ހާސިލް ކޮށްދިނުމުގައި އަބަދުވެސް ދިމި އޮންނާނެކަމަށެވެ. އަދި ޖޭޕީން އަބަދުވެސް އެދެނީ ދިވެހި ޒުވާނުންނަށް ފަހި ދުވަސްތަކެއް ކަމަށާއި، ޒުވާނުންނަށް ކުރި މަގު ދައްކައި ފަހި ފުރުސަތު އަބަދުވެސް ޖޭޕީގައި އޮންނާނެކަމަށް ޤާސިމް ވިދާޅުވިއެވެ.
އެމްޑީޕީ ގަމު ދާއިިރާގެ އިސްސަފުގައި ހަރަކާތްތެރި ވަމުންދިޔަ ޒުވާން އިސްމާއިލް ވަހީދު، އިތުރު 100 ޒުވާނުންގެ މެމްބާޝިޕް ފޯމާއިއެކު ޖޭޕީއާއި ގުޅިވަޑައި ގެންނެވީތީ އިޚުލާސްތެރި މަރުޚަބާއަކާއިއެކު ޝުކުރު ދަންނަވަން. އަޅުގަނޑުމެން ޖޭޕީ އަކީ އަބަދުވެސް ޒުވާނުންނަށް ފުރުސަތު އޮތް، ޒުވާނުންނަށް ހެޔޮ މަގު ދައްކާނެ ޕާޓީއެއް.
– ޤާސިމް ވިދާޅުވިއެވެ.
ޤާސިމްވެފައިވާ ރިޔާސީ ވައުދުތަކުގެ ތެރޭގައި ފަސް އަހަރު ދުވަހުގެ ތެރޭގައި ރާއްޖޭގައި 100 މިލިއަނަރުން އުފައްދަވާނެ ކަމުގެ ވައުދު ހިމެނެއެވެ. ގާސިމް ވިދާޅުވީ ކުދި އަދި މެދުފަންތީގެ ވިޔަފާރި ތަރައްގީ ކުރުމަށް ފަސް އަހަރު ތެރޭގައި ތިން ބިލިއަން ރުފިޔާ ހަރަދުކޮށް ރާއްޖޭގެ އެކި ހިސާބުގައި މަދުވެގެން 500 "ސްމޯލް ބިޒްނަސް ލީޑާސް" އުފައްދަވާނެ ކަމަށެވެ.
ގާސިމް ވިދާޅުވީ އޭނާގެ ވެރިކަމެއްގައި ބައިނަލްއަގުވާމީ މުބާރާތްތައް ބޭއްވޭ ވަރަށް އިންފްރާސްޓްރަކްޗާ ގާއިމުކޮށް ދުނިޔޭގެ ފެންވަރުގެ އޮލިމްޕިކް ސްޓޭޑިއަމްއެއް އަޅުއްވާނެ ކަމަށެވެ. އަދި ބައިނަލްއަގުވާމީ މޯޝަންޕިކްޗަރަސް ސްޓޫޑިއޯ އައިލެންޑެއް ރާއްޖޭގެ ރަށެއްގައި ތަރައްގީކޮށް، ދިވެހި ޒުވާނުންނަށް އެމީހުންގެ ހުނަރުން އާމްދަނީ ލިބޭނެ މަގުފަހި ކުރައްވާނެ ކަމަށް ވެސް ގާސިމް ވައުދުވެ ވަޑައިގެންފައިވެއެވެ.
