ދައުދީ އަރަބިއާއިން އަލަށް އުފައްދާފައިވާ އެގައުމުގެ ގައުމީ އެއަރލައިނެއް ކަމަށްވާ ރިޔާދު އެއަރއިން އެއަރލައިންގެ ފުރަތަމަ ފުލައިޓް މާދަމާ އުދުއްސާލާ ގޮތަށް ހަމަޖައްސައިފިއެވެ.
ރިޔާދު އެއަރގެ ފުރަތަމަ ފުލައިޓް މާދަމާ މެންދުރު ގަޑީން 1:00 ގައި، ވަރަށް ތިރިން އުދުހޭނީ ސައުދީގެ ވެރިރަށް ރިޔާދުގެ މަތިންނެވެ. މި ފްލައިޓުގެ މި ދަތުރުގައި 3 ލޮކޭޝަނެއް ފަސްދީ ދާނެއެވެ. އެ ލޮކޭޝަންތަކަކީ ދަ ކިންގ އަބުދުﷲ ފައިނޭންޝަލް ޑިސްޓްރިކްޓް (KAFD)އާއި ދަ ކިންގޑަމް ޓަވަރާއި، އަދި ފައިސަލިއާ ޓަވަރެވެ.
Tomorrow is the day! Keep an eye on the sky at 1 pm for the #RiyadhAir livery as we fly at a low altitude across Riyadh. Capture your photos of the plane and share them with us on #Futuretakesflight #aPIFCompany pic.twitter.com/f1gTNwpjQX
— Riyadh Air (@RiyadhAir) June 11, 2023
ރިޔާދު އެއަރގެ ފުރަތަމަ ފްލައިޓް މާދަމާ މި އުދުހެނީ، ބޮއިން 787ގެ މަރުކާގެ އެ އެއަރލައިންގެ ބޯޓުގެ ޑިޒައިން އެއަރލައިނުން އާންމު ކުރިތާ ދުވަސްކޮޅެއް ފަހުންނެވެ.
"ރިޔާދު އެއަރ"ގެ ނަމުގައި އާ އެއަރލައިނެއް އުފެއްދުމަށް ނިންމާފައިވަނީ ސައުދީގެ ޕަބްލިކް އިންވެސްޓްމަންޓް ފަންޑު (PIF)އިންނެވެ. މި އެއަރލައިންގެ ވެރިފަރާތަކީވެސް މި ފަންޑުކަމުގައިވެސް ވަނީ ހަމަޖައްސާފައެވެ.
ސައުދީ ވަލީއަހުދު މުހައްމަދު ބިން ސަލްމާންއަކީ އެގައުމުގެ ބޮޑުވަޒީރުގެ އިތުރުން ޕަބްލިކް އިންވެސްޓްމަންޓް ފަންޑު (PIF)ގެ ޗެއަރމަންވެސްމެއެވެ.
ސައުދީ އަރަބިއާއިން މުޅިން އަލަށް އުފައްދާ މި ގައުމީ އެއަރލައިންގެ އެންމެ އިސް ފަރާތެއްކަމުގައި ހަމަޖައްސާފައިވަނީ PIFގެ ގަވަރުނަރު ޔާސިރު އަލް-ރުމައްޔަން އެވެ. ސައުދީ ޕްރެސް އޭޖެންސީން ރިޕޯޓު ކޮށްފައިވާ ގޮތުގައި މި އެއަރލައިންގެ ސީނިއަރ މެނޭޖްމަންޓުގައި އެގައުމުގެ ތަޖުރިބާކާރުންގެ އިތުރުން ބައިނަލްއަގުވާމީ ތަޖުރިބާކާރުންވެސް ހިމެނޭނެއެވެ.
މި އެއަރލައިންގެ ސީއީއޯއަކަށް ހަމަޖައްސާފައިވަނީ، ދަތުރުފަތުރާއި ލޮޖިސްޓިކްސް އިންޑަސްޓްރީގެ 40 އަހަރުދުވަހު ތަޖުރިބާހުރި ޓޯބީ ޑޮގުލަސްއެވެ. އޭނާވަނީ ޔުއޭއީގެ އިއްތިހާދު އެއަރލއިންގެ އެންމެ އިސްވެރިޔާގެ މަގާމް 2018ވަނަ އަހަރުގެ ޖެނުއަރީން 2022 ވަނަ އަަހަރު އޮކްޓޯބަރުމަހުގެ ނިޔަލަށް އަދާކޮށްފައެވެ.
މިއައަރލައިންގެ ހެޑުކުއާޓަރު ހުންނާނީ ސައުދީގެ ވެރިރަށް ރިޔާދުގައެވެ. އަދި 2030 އަންނަންވާއިރަށް ދުނިޔޭގެ 100 މަންޒިލަކަށް ދަތުރު ކުރުންވަނީ މިއެއަރލައިންގެ ލަނޑުދަޑިއަކަށް ހަދާފައެވެ.
ސައުދީ އަރަބިއާއިން ހާމަ ކޮށްފައިވާ ގޮތުގައި، މިއީ ދުނިޔޭގެ އެންމެ މަތީ ފެންވަރުގެ އެއަރލައިނަކަށް ވުމުގެ އިތުރުން ތެލުން ލިބޭ އާމްދަނީ ނުހިމަނާ ސައުދީގެ ޖީޑީޕީއަށް 20 ބިލިއަން އެމެރިކާ ޑޮލަރުގެ ބޮޑު ކުރިއެރުމެއް މި އިންވެސްޓްމަންޓުން ގެނެސްދޭނެއެވެ. އަދި ސީދާ ގޮތުން 200،000 އަށްވުރެ ގިނަވަޒިފާ އުފެއްދިގެން ދާނެއެވެ.
