ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވަނީ މަޖިލީހުގައި ހިމެނޭ ސަރުކާރަށް ތާއީދުކުރާ ވަކި މެމްބަރުންތަކެއް ރުއްސުމުގެ ބޭނުމުގައި ކަމަށް މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޤާމުން ވަކި ކުރެއްވުމަށް ހުށަހަޅުއްވާފައިވަނީ 54 މެމްބަރުންގެ ސޮޔާއެކުއެވެ. މި މައްސަލަ މަޖިލީހަށް ހުށަހަޅުއްވާފައިވަނީ 56 މެމްބަރުން ތިއްބަވާ އެމްޑީޕީގެ ޕާލިމަންޓްރީ ގްރޫޕުންނެވެ.

މިމައްސަލާގައި އާޒިމް ވިދާޅުވީ މަޖިލީހުގެ ޗުއްޓީ ކުރިއަށް އޮތްއިރު، މިމައްސަލަ މަޖިލީހަށް ހުށަހަޅާފައިވަނީ މަޖިލިސް ރައީސް މަޤާމުން ވަކި ކުރުމުގެ ނިޔަތެއް އޮވެގެން ނޫންކަމަށެވެ. މިއީ މަޖިލީހުގައި ހިމެނޭ ސަރުކާރަށް ތާއީދުކުރާ ވަކި މެމްބަރުންތަކެއް ރުއްސަން ކުރި ކަމެއްކަމަށް އާޒިމް ވިދާޅުވިއެވެ.

މަޖްލިސް ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖްލީހަށް ހުށަހެޅީ އިޖްރާޢަތް ތަކުގެ ދަށުން. އެމައްސަލަ އެޖެންޑާ ކުރަން ދުވަސް ގުނާއިރު މަޖްލިސް ޗުއްޓީއާ ދިމާވާގޮތައް. ރައީސް އިބްރާހިމް މުހައްމަދު ޞާލިހަކަށް އެކަންކުރާކަށް ނުކެރޭނެ. އެއުޅެނީ ރުއްސަން ވިކޭ މެންބަރުންކޮޅު.

– އާޒިމް ވިދާޅުވިއެވެ.

މަޖިލީހުގެ އިދާރާއިން ވިދާޅުވީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހުގެ އިދާރާއަށް ލިބިފައިވާކަމަށެވެ. މި މައްސަލަ ޤާނޫނު އަސާސީއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށްގެންދަވާނެ ކަމަށް މަޖިލީހުގެ އިދާރާއިން ވަނީ ވިދާޅުވެފައެވެ.

މަޖިލީހުގެ މިދައުރުގެ ޗުއްޓީއަށް ދާން އޮންނަނީ މިމަހުގެ 30 އިން ފެށިގެންނެވެ. ނަމަވެސް މިމަހުގެ 22 ފެށިގެން ސަރުކާރު ބަންދު ވާނެއެވެ. އެހެންކަމަށް ވުމުން މަޖިލީހުގެ މިދައުރުގެ އެންމެ ފަހު ޖަލްސާ އޮންނަނީ މިމަހުގެ 21 ވަނަ ދުވަހުއެވެ. މަޖިލިސް ޗުއްޓީއަށް ފަހު އަލުން މަސައްކަތް ފަށާނީ އޯގަސްޓް މަހުގެ 15 ވަނަ ދުވަހުއެވެ.