އާޓިފިޝަލް ބީޗު ސަރަހައްދުގައި ހުންނަ އެމްޑީޕީގެ މައި ހަރުގެ އަތުލުމަށް އެ ތަނުގެ ވެރި ފަރާތުން މަސައްކަތް ކުރަނީ އޮޅުވައިލުމާއި، މަކަރާއި ހީލަތުން ކަމަށް އެމްޑީޕީ އިން ބުނެފިއެވެ.
އެމްޑީޕީގެ މައި ހަރުގެ، އެ ބިމުގެ ވެރިފަރާތުން އަތުލުން ހުއްޓުވަން އެ ޕާޓީން އެދިފައިވާ އަމުރު ނެރޭނެ ހަމައެއް ނެތް ކަމަށް ސިވިލް ކޯޓުން ނިންމީ ނިމިދިޔަ މޭ މަހުގެ 30ވަނަ ދުވަހެވެ.
ރިޔާސީ އިންތިޚާބު ނިމުމުގެ ކުރިން އެ ހަރުގެއިން އެމްޑީޕީގެ ހަރަކާތްތައް ހުއްޓައި ބަދަލުވުމަށް ނާންގާނެ ކަމުގެ ޔަގީންކަން ހަރުގޭގެ ވެރިފަރާތްކަމަށްވާ ޝަފިއްޔާ ޒުބައިރު ދިން ކަމަށް ވެސް އެމްޑީޕީ އިން ބުނެފައިވެއެވެ.
އެހެންވެ، އެ ހަރުގެއަށް އަށް ލައްކަ އަށްވުރެ ގިނަ ރުފިޔާ ޚަރަދުކޮށްގެން މަސައްކަތް ފެށި ކަމަށާއި ތަނުން ދިއުމަށް އަންގައި ނޯޓިސް ދިނީ މަސައްކަތް ފެށި ފަހުން ކަމަށް އެ ޕާޓީއިން ހާމަކޮށްފައިވެއެވެ. އެމްޑީޕީއިން މަޢުލޫމާތުދޭ ގޮތުގައި އެމްޑީޕީ އެ ހަރުގެއިން ނެރުމަށް ކުރާ މަސައްކަތަކީ ޝަފިއްޔާގެ ސިޔާސީ ފިކުރަށް އައި ބަދަލުގެ ސަބަބުން ކުރި ކަމެއްކަން ޔަގީންވާ ކަމަށެވެ. އަދި ޑިމޮކްރެޓްސްއަށް އެ ތަން ހޯދައިދިނުމުގައި ގެންގުޅެފައިވަނީ 'މަގުމަތިން އިންސާފު ހޯދުމުގެ ސިޔާސަތެއް' ކަމަށެވެ.
ސިވިލް ކޯޓުން ހަރުގެ އަތުލުން ހުއްޓުވައިދިނުމަށް އަމުރު ނުނެރެވޭނެ ކަމަށް ނިންމުމުން އެމްޑީޕީގެ ވަކީލުން އެ މައްސަލަ ބަލައި، ވަގުތީ އަމުރު އިސްތިއުނާފު ކުރުމަށް ތައްޔާރުވަމުން އަންނަ ކަމަށް ވެސް އެ ޕާޓީއިން ބުނެއެވެ.
އަދި އެމްޑީޕީން ތިބީ ޝަފިއްޔާގެ ތަނެއް ގަދަކަމުން ހިފައިގެން ނޫން ކަމަށެވެ. އެ ތަން ބޭނުންކުރުމުގެ އެއްބަސްވުން އޮތީ ރިޔާސީ އިންތިޚާބުގެ ނިޔަލަށް ކަމަށް ބުނެފައިވެއެވެ.
ނަމަވެސް ތަން ދޫކުރަން އެންގުމުން ޖުލައި 31 އާ ހަމައަށް ވަގުތު ދިނުމަށް ވެސް އެދުނު ކަމަށް ވެސް އެ ޕާޓީއިން ބުނެފައިވެއެވެ.
