އައްޑޫ ސިޓީ ހިތަދޫގެ އެމްޑީޕީ މައި ހަރުގެ ރައީސް ހުޅުއްވައި ދެއްވައިފި

ރައީސް ސާލިހު އައްޑޫ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި، އެ ސިޓީގެ ހިތަދޫ އެމްޑީޕީ މައި ހަރުގެ މިއަދު ހުޅުއްވައި ދެއްވައިފިއެވެ.

ހިތަދޫ އެމްޑީޕީ މައި ހަރުގެ ހުޅުވުމަށް ބޭއްވުނު ޖަލްސާއަށް އައްޑޫ ސިޓީގެ އެމްޑީޕީގެ ގިނަ އަދަދެއްގެ މެމްބަރުންގެ އިތުރުން ރައީސްއާއެކު އައްޑުއަށް ދަތުރު ކުރެއްވި ބައެއް އޮފިޝަލުންވެސް ވަނީ ބައިވެރިވެވަޑައިގެންފައެވެ.

މި ޖަލްސާގައި ރައީސް ސާލިހު ދެއްކެވި ވާހަކަފުޅުގައި ވަނީ އަންނަ ރިޔާސީ އިންތިޚާބު އެމްޑީޕީއަށް ކާމިޔާބު ކުރުމަށް މަސައްކަތް ކޮށްދިނުމަށް އެމްޑީޕީގެ މެމްބަރުންގެ ކިބައިން އެދިފައެވެ.

މިއަދު އައްޑޫ ސިޓީގެ ހިތަދޫގެ އެމްޑީޕީ މައި ހަރުގެ ހުޅުވާފައިވާއިރު، ރައީސް ސާލިހުވަނީ ރޭ އެސިޓީގެ ފޭދޫގައި ހުންނަ އެމްޑީޕީގެ ހަރުގެ ހުޅުވާ ދެއްވާފައެވެ.

ރައީސް ސާލިހު އައްޑޫ ސިޓީއަށް ކުރައްވަމުން ގެންދަވާ ދަތުރުފުޅަކީ އައްޑޫ ސިޓީގެ ބިން ހިއްކުމުގެ މަޝްރޫޢު އިފްތިތާޙު ކުރުމަށް ކުރައްވަމުން ގެންދަވާ ދަތުރުފުޅެކެވެ. މިގޮތުން އިއްޔެ ރައީސް ސާލިހުވަނީ، 1.5 ބިލިއަން ރުފިޔާ ޚަރަދު ކޮށްގެން ކުރިޔަށް ގެންދާ 194 ހެކްޓަރުގެ ބިން ހިއްކުމުގެ މަޝްރޫއު އިފްތިތާޙު ކޮށްދެއްވާފައެވެ. އޭގެ އިތުރުން އައްޑޫގައި 11 ކިލޯމީޓަރުގެ ސަރަހައްދެއްގައި ގޮނޑުދޮށް ހިމާޔަތްކުރުމުގެ މަޝްރޫޢުވެސް ކުރިޔަށް ގެންދިއުމަށް ވަނީ ހަމަޖެހިފައެވެ.

މި ދަތުރުފުޅުގައި ރައީސް ސާލިހުވަނީ އައްޑޫގައި ކުރިޔަށްދާ މަގުހެދުމުގެ މަޝްރޫޢު ކުރިޔަށްދާގޮތް ބައްލަވާލައްވާފައެވެ. އަދި އައްޑޫ ސިޓީގެ ރައްޔިތުންނާވެސް ރައީސް ސާލިހު ބައްދަލު ކުރައްވާފައި ވެއެވެ.