ރާއްޖޭގެ ކަނޑުގެ ސަރަހައްދުން ބައެއް ވިއްކާލާފައިވާ ކަމަށް ބުނެ "ކަނޑު ވިއްކުމާ ދެކޮޅު އިއްތިހާދު"ން މިރޭ މާލޭގައި ބާއްވާ ބޮޑު އެއްވުމާއި ދިމާކޮށް މިއަދު ހަވީރު ޖުމްހޫރީ ޕާޓީގެ ލީޑަރު ޤާސިމް އިބްރާހިމް ޚާއްސަ އިންޓަރވިއުއެއް ދެއްވުމަށް ހަމަޖެހިއްޖެއެވެ.
ރާއްޖެ އާއި މޮރިޝަސްގެ ކަނޑުގެ އިމުގެ މައްސަލައިގައި "ފޯޅަވަހި ކޯލިޝަނުން" މިރޭހު ބާއްވާ އެއްވުމުގައި ޖުމްހޫރީ ޕާޓީ (ޖޭޕީ) ގެ އެއްވެސް މެމްބަރަކު ބައިވެރިނުވުމަށް އެ ޕާޓީގެ ލީޑަރު އަދި ރިޔާސީ އިންތިހާބުގައި ވާދަކުރައްވާ ގާސިމް އިބްރާހިމް ވަނީ ގޮވާލާފައެވެ. ނަމަވެސް ޖޭޕީގެ ކައުންސިލްގެ ބައެއް މެމްބަރުންނާއި، ޢާންމު މެމްބަރުން މިއެއްވުމުގައި ބައިވެރިވާނެކަމަށް ދަނީ ބުނަމުންނެވެ.
ޗާގޯސް ކޯލިޝަންގެ ވިސްނުމާއި ދެކޮޅު ޤާސިމް ވަނީ މިއަދު މެންދުރު ފަހު 2 ޖަހާއިރު، ޤާސިމްގެ އަމިއްލަ ޓީވީ ޗެނަލް މެދުވެރިކޮށް ޚާއްސަ އިންޓަރވިއުއެއްވެސް ދިނުމަށް ނިންމާފައެވެ.
އެ އެއްވުމުގައި ބައިވެރި ނުވުމަށް ގާސިމް އެދިވަޑައިގެންނެވި އިރު، ޖޭޕީގެ ބައެއް ބޭފުޅުން ވަނީ ފޯޅަވަހި ކޯލިޝަނާ އެކު މަސައްކަތްތަކެއް ވެސް ކުރައްވައިފައެވެ. އެގޮތުން އެންމެ ހަރަކާތްތެރިކޮށް އުޅުއްވީ ކެންދޫ ދާއިރާގެ ޖުމްހޫރީ ޕާޓީގެ މެމްބަރު އަލީ ހުސެއިނެވެ. އޭނާ ވަނީ ފޯޅަވަހި ކޯލިޝަނުން ބޭއްވި ޕްރެސް ކޮންފަރެންސްތަކުގައި ޖޭޕީ ތަމްސީލް ކުރައްވައިފައެވެ.
ކަނޑުވިއްކުމާ ދެކޮޅު އިއްތިހާދުގައި ޕީޕީއެމް، ޕީއެންސީ، އެމްއެންޕީ އަދި ކުރީގެ ދެ ވަޒީރުން ކަމަށްވާ ކުރީގެ ބަންޑާރަނައިބު ޑރ. މުހައްމަދު މުނައްވަރާއި، ކުރީގެ ހޯމް މިނިސްޓަރު އުމަރު ނަސީރު ހިމެނެއެވެ.
މާލޭ އާޓިފިޝަލް ބީޗްގައި ބާއްވާ މި އެއްވުމުގައި، ކަނޑުގެ ސަރަހައްދު ވިއްކުމާ ދެކޮޅުކަން ހާމަކުރުމުގެ ގޮތުން ޕެޓިޝަނެއްގައި ސޮއިކުރުން ކުރިއަށް ގެންދާނެ ކަމަށް އެ އިއްތިހާދުން ބުނެއެވެ.
