އެމްޑީޕީގެ ރައީސް މުހައްމަދު ނަޝީދު އުފެއްދުމަށް މަސައްކަތް ކުރައްވަމުން ގެންދަވާ "ދަ ޑިމޮކްރޭޓްސް" ޕާޓީ ރަޖިސްޓްރީ ކުރުމަށް މިއަދު އިލެކްޝަންސް ކޮމިޝަނަށް ހުށަހެޅުއްވިއިރު، ގިނަބަޔަކު ހީކުރިވަރަަށްވުރެ މާމަދުން ފޯމު ހުށަހެޅުމާއި ގުޅިގެން ގިނަބަޔަކު އެކަން ފާހަގަކޮށް، އެޕާޓީއަށް ހަޖޫ ޖަހައިފިއެވެ.
"ދަ ޑިމޮކްރެޓްސް" ރަޖިސްޓްރީކުރުމަށް ފޯމު ހުށަހެޅުމަށް ގިނަ އަދަދެއްގެ ބަޔަކު ވަނީ ފޯމުތަކާއިއެކު އިލެކްޝަންގެ މައި މަރުކަޒު ދަރުބާރުގެއަށް މިއަދު ގޮސްފައެވެ. މިގޮތުން ޕާޓީ ރަޖިސްޓްރީ ކުރުމަށް އިލެކްޝަނަށް ހުށަހެޅީ 3،560 ފޯމެވެ. ފޯމު ހުށަހެޅުމަށްފަހު ނޫސްވެރިންނަށް މައުލޫމާތު ދެއްވަމުން އެޕާޓީ ރަޖިސްޓްރީ ކުރުމަށް އިސްކޮށް މަސައްކަތް ކުރައްވަމުން ގެންދަވާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވީ މިއީ އެބޭފުޅުން އުންމީދު ކުރި އަދަދުކަމަށެވެ. އަދި މިއީ ޕާޓީ ރަޖިސްޓްރީ ކުރަން ބޭނުންވި އަދަދަށް ވުމުން ޕާޓީއަށް މެމްބަރުން ވެއްދުމުގެ މަސައްކަތް އަދި ނުކުރާކަމަށް ހަސަން ވިދާޅުވިއެވެ.
އެހެންނަމަވެސް އެޕާޓީއަށް ސޮއި ހަމަކުރުމަށް މަސައްކަތް ކުރަމުންދިޔައިރު، ޕާޓީ ހެދުމަށް އިސްކޮށް އުޅުއްވަމުން ގެންދަވާ ބޭފުޅުންވަނީ އެމްޑީޕީގެ ގިނަ އަދަދެއްގެ މެމްބަރުން އެޕާޓީއާއި ގުޅޭމުންދާކަމަށް ވިދާޅުވެ، ސޮއިކުރުމަށް ހިންގުނު ހަރަކާތްތައް ވަރަށް ބޮޑަށް އިސްތިހާރު ކޮށްފައެވެ. އަދި ރާއްޖޭގެ އެކި ކަންކޮޅުތަކުން ގިނަ އަދަދެއްގެ ބަޔަކު އެޕާޓީއަށް ސޮއި ކުރަމުންދާކަމަށް ބުނެ، އެކަން ވަރަށް ބޮޑަށް އިސްތިހާރު ކޮށްފައި ވެއެވެ.
އެންމެ 3،560 ފޯމާއެކު "ދަ ޑިމޮކްރެޓްސް" ރަޖިސްޓްރީ ކުރުމަށް ހުށަހެޅުމާއެކު ހަޖޫޖައްސަވަމުން އެމްޑީޕީގެ ޗެއަރޕާސަންގެ ނައިބު އިބުރާހިމް ވަހީދު (މަދަނަ އިބުރޭ) ކުރެއްވި ޓުވީޓެއްގައި އޭނާ ޖައްސަވާފައިވަނީ ހިސާބު އަދަދުން ފޯމިއުލާއެކެވެ.
39,900 + 15,631 = 3,560 🎈
— Ibrahim Waheed (@ibreys) June 1, 2023
އެ ޓުވީޓުގައި އޭނާ ސުވާލު ކުރައްވާފައިވަނީ، ނަޝީދަށް ޕްރައިމަރީގައި ލިބިވަޑައިގެންނެވި 15،631 ވޯޓާއި، އަދި ޕްރައިމަރީގެ ކުރިން އެމްޑީޕީން ވަކިކުރިކަމަށް ނަޝީދު ވިދާޅުވަމުން ގެންދެވި 39،900 މެމްބަރުން އެއްކޮށްލުމުން ހަމަވާ އަދަދަކީ 3،560 މެމްބަރުންތޯ ސުވާލު ކުރައްވާފައެވެ.
ސޯޝަލް މީޑިއާގައި އެހެން ބައެއް ފަރާތްތަކުންވެސް ވަނީ، ނަޝީދުގެ ޕާޓީ ރަޖިސްޓްރީ ކުރުމަށް އާދަޔާ ޚިލާފު މަދުއަދަދެއްގެ ފޯމާއެކު އިލެކްޝަންސްއަށް ހުށަހެޅުމާއި ގުޅިގެން އެކަން ފާހަގަކޮށް، އިސްތިހާރު ކުރަމުންދާވަރު ބުނަމުންދާވަރުގެ ތާއީދެއް ނަޝީދަށް ނެތްކަމަށް ބުނެފައެވެ.
ކޮމެންޓު ފޮނުވާ