މިމަހުގެ 24 ވަނަ ދުވަހު ސިޔާސީ ޕާޓީއެއްގެ ގޮތުގައި އުފެއްދުމުގެ ހުއްދަ ދިން "ދަ ޑިމޮކްރެޓްސް" އަށް މިހާތަނަށް 5،000 އަށް ވުރެ ގިނަ މީހުން ސޮއިކޮށްފިއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިސްވެ ހިންގަވާ "ފިކުރެއްގެ ދިރުން" ގައި ޙަރަކާތްތެރިވެވަޑައިގަންނަވާ މެންބަރުން އިސްވެ ތިއްބަވައިގެން "ދަ ޑިމޮކްރެޓްސް"ގެ ނަމުގައި އުފައްދަވަން މަސައްކަތް ކުރައްވާ ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދިނުމާއިއެކު ފޯމު ފުރުމުގެ ހަރަކާތްތައް މާލެެއާއި އަތޮޅު ތެރޭގައި ދަނީ ކުރަމުންނެވެ.
"ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ ދީފައިވާއިރު، ސިޔާސީ ޕާޓީތަކުގެ ޤާނޫނު ބަޔާންކުރާ ގޮތުން ޕާޓީ ރަޖިސްޓްރީކުރުމަށް 3000 މެންބަރުންގެ ސޮއި ހޯދައި އިލެކްޝަންސް ކޮމިޝަނަށް ހުށައަޅަންޖެހެއެވެ.
"ދަ ޑިމޮކްރެޓްސް" އިން ވަނީ އިލެކްޝަންގެ ހުއްދައާއިއެކު ފޯމު ފުރުމަށް ކުރިއަށް ގެންދާ ހަރަކާތުގައި މިހާތަނަށް 5،000 އަށްވުރެ ގިނަ މީހުންގެ ސޮއި ހޯދާފައެވެ. ޚަބަރު އޮންލައިިނަށް މައުލޫމާތު ދިން ފޯމު ފުރުމުގައި އިސްކޮށް ހަރަކާތްތެރިވާ މެމްބަރަކު ވިދާޅުވީ، މިއީ އަދި އަތޮޅު ތެރޭގެ ގިނަ ރަށްތަކެއް ފޯމުތައް ނުލައި، މިހާތަނަށް މައި ހަރުގެ ބޮޑުފެންވަޅުގެއަށް ލިބިފައިވާ ފޯމުތަކުގެ ހިސާބުތައް ކަމަށެވެ. އަތޮޅު ތެރޭގެ ރަށްތަކުގައި މިހާރުވެސް ފޯރީގައި ފޯމުތައް ފުރަމުންދާއިރު، މިއަދަދު ކުރިއަށް އޮތް ދުވަސްތަކުގައި މާބޮޑަށްވެސް އިތުރު ވެގެންދާނެކަމަށެވެ.
މިއީ އަދި އަޅުގަނޑުމެންނަ ހެދިފައިވާ ކުޑަ ހިސާބަކުން ދައްކާ އަދަދު. މިހާރުވެސް 5،000 އަށް ވުގެ ގިނަ މީހުންގެ ސޮއި ވަނީ ލިބިފަ. އަތޮޅު ތެރޭގައި ވަރަށް ފޯރީގައި ފޯމުފުރުމުގެ ކަންކަން ދަނީ ކުރިއަށް.
– ފޯމު ފުރުމުގައި އިސްކޮށް ހަރަކާތްތެރިވާ ބޭފުޅަކު ވިދާޅުވިއެވެ.
"ދަ ޑިމޮކްރެޓްސް" އަށް މެމްބަރުން އިތުރު ކުރުމުގެ މަސައްކަތް ކުރަމުންދާއިރު، އެޕާޓީ އުފެއްދުމުގައި އިސްކޮށް ހަރަކާތްތެރިވާ ބޭފުޅުންގެ ތެރެއިން ބައެއް ބޭފުޅުން މިއަދު ވަނީ ކުޅުދުއްފުށީފައި ފޯމު ފުރުމުގައި ހަރަކާތްތެރިވެފައެވެ. ނަމަވެސް ރަސްމީކޮށް އެޕާޓީ އުފެއްދުމުގައި ހަރަކާތްތެރިވާ ބޭފުޅުން ރަށްތަކަށް ދަތުރުކޮށްގެން އަދި ފޯމު ފުރުމުގެ މާބޮޑު މަސައްކަތްތަކެއް ކުރާތަނެއް ނުފެނެއެވެ.
އުތުރުން ދެކުނަށް އެއްވާނެއްގައި ނުކުމެ ދަ ޑިމޮކްރެޓްސް ގެ ފޯމުފުރުން ކުރިއަށްދަނީ. ✍🏽 🙌🏽🎉
މެންބަރޝިޕް ފޯމު ފުރާން ބޭނުންވާނީ:
– ޕާސްޕޯޓް ސައިޒު ފޮޓޯއެއް
އައިޑީ ކާޑުގައި އޮންނަ ފޮޓޯއަށް ވެގެން ނުވާނެ– އައިޑީކާޑު ދެފުށުގެ ކޮޕީ
މުއްދަތު ހަމަނުވާ#WeTheDemocrats pic.twitter.com/aSvX0EP6Kk— The Democrats (@TheDemocratsMV) May 27, 2023
ޕާޓީ އުފެއްދުމުގައި އިސްކޮށް ހަރަކާތްތެރިވަނީ އެމްޑީޕީގެ ރައީސް މުހައްމަދު ނަޝީދަށް ވާއިރު، ރައީސް ނަޝީދު އަދި އެމްޑީޕީން ވަކިވެފައި ނުވެއެވެ. "ދަ ޑިމޮކްރެޓްސް" އިން ވަނީ ކުރިއަށް ރިޔާސީ އިންތިޚާބުގައި ކެނޑިޑޭޓަކު ނެރުމަށްވެސް ނިންމާފައެވެ.
"ދަ ޑިމޮކްރެޓްސް" އަށް ޕާޓީ ރަޖިސްޓްރީ ކުރުމަށް ބޭނުންވާ ޤާނޫނީ އަދަދަށްވުރެ އިތުރަށް ފޯމު ލިބިފައިި ވީނަމަވެސް އެޕާޓީން އަދި އިލެކްޝަނަށް ރަޖިސްޓްރީއަށް ހުށަހަޅާފައި ނުވެއެވެ. މައުލޫމާތު ލިބިފައިވާ ގޮތުގައި ރަޖިސްޓްރީއަށް ހުށަހަޅާނީ މިހަފްތާގެ ބުދަ ނޫނީ ބުރާސްފަތި ދުވަހުއެވެ.
