އެމްޑީޕީގެ ތެރޭގައި އުފެދުނު ޚިޔާލް ތަފާތުވުންތަކުގެ ތެރެއިން ރައީސް ނަޝީދަށް ތައީދު ކުރާ މީހުން ވަކި ޕާޓީއެއް ހެދުމަށް ކުރަމުންދާ މަސައްކަތުގައި ސިޔާސީ މަޤާމުތަކުގައިތިބި މީހުންގެ ތެރެއިން ނަޝީދުގެ ދަ ޑިމޮކްރެޓްސް އަށް ތާއީދުކުރާ މީހުން ވަކިކުރަމުންދާ މައްސަލާގައި އެމީހުންގެ ދިފާއުގައި ރައީސް ނަޝީދާއި، އީވާ ތެދުވެއްޖެއެވެ.
ރައްޔިތުން މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދަވާ ޕާޓީ ކަމަށްވާ ދަ ޑިމޮކްރެޓްސް އަށް ސޮއި ކޮށްފައިވާ ބައެއް މީހުން ސަރުކާރުގެ ސިޔާސީ މަގާމުތަކުން މިއަދު ވަނީ ކޮށްފައެވެ.
މިއަދު މިހާތަނަށް އެންވާރްމަންޓް މިނިސްޓްރީގެ ނައިބު މުހައްމަދު އަންޞާރު އާއި އެމިނިސްޓްރީގެ ސީނިއާ އެގްޒެކެޓިވް މުހައްމަދު ހަމްދާން ވަނީ ވަޒީފާ އިން ވަކިކޮށްފައެވެ. އަދި ހޯމް މިނިސްޓްރީގެ ސީނިއާ ޕޮލިސީ ޑިރެކްޓަރ އާޝިޔަތު އަލައިކާ އަދުނާން ވެސް މިއަދު ވަނީ ވަޒީފާ އިން ވަކިކޮށްފައެވެ. އަލައިކާ އާއި ހަމްދާނަކީ ދެމަފިރިންނެވެ. އެތިން ބޭފުޅުން ވެސް ވަނީ މިދިޔަ ހަފްތާގައި ޑިމޮކްރެޓްސް އަށް ސޮއި ކުރައްވާފައެވެ.
މިބޭފުޅުން ވަޒީފާއިން ވަކި ކުރުމާއި ގުޅިގެން ރައީސް ނަޝީދު ވިދާޅުވީ، މިބޭފުޅުންނަކީ އެމްޑީޕީއަށް 5 އަހަރުގެ ވެރިކަމެއް ހޯދާ ދިނުމުގައި ގިނަ މަސައްކަތްތަކެއް ކުރި ބޭފުޅުންތަކެއް ކަމަށެވެ. އަދި މިބޭފުޅުންނަކީ އެމްޑީޕީގެ މެނިފެސްޓޯ ތަންފީޒު ކުރުމުގައި އެންމެ އިސްދައުރެއް އަދާކުރެވޭނެ ބޭފުޅުންކަމަށެވެ.
މިއަދު ސަރުކާރުން ވަކިކުރި މުހައްމަދު އަންސަރާއި، އަލައިކާއާއި، ހަމްދާނަކީވެސް އެމްޑީޕީ ސަރުކާރު 5 އަހަރު ދުވަހަކަށް ގެނައުމަށް އިންތިހާއަށް ބުރަ މަސައްކަތް ކުރި ޒުވާނުން. އެމްޑީޕީގެ މެނިފެސްޓޯއެއް ތަންފީޒު ކުރަން އެނގޭނެ ގާބިލް މީހުން. އެމީހުން ވަކި ކުރުމަކީ ދިވެހިންނަށް ދެވޭ ގެއްލުމެއް.
– ރައީސް ނަޝީދު ވިދާޅުވިއެވެ.
މިބޭފުޅުންގެ ދިފާއުގައި މަޖިލީހުގެ ނައިބް ރައީސް އީވާ ވިދާޅުވީ ޚިޔާލު ތަފާތުވާ ކޮންމެ މީހަކު ނިކަމެތި ކޮށްލަން ހިތައް އެރުވުމަކީ ލިބޭނެ ނާކާމިޔާބީއްކަމަށެވެ. އަދި ވަޒީފާއިން ވަކި ކުރި މީހުންނަށް ލިބެނީ އިތުރު ހިތްވަރެއް ކަމަށާއި، އެމީހުންނަކީ ޤައުމަށް ޚިދުމަތްކޮށްދޭންތިބި ޒުވާނުންކަމަށް އީވާ ވިދާޅުވިއެވެ.
ވަޒީފާއިން ކަނޑާލި ޒުވާނުން މި ސަރުކާރު ގެންނަން ކުރި މަސައްކަތް މިނާ ނުކިރޭ. ޚިޔާލު ތަފާތުވާ ކޮންމެ މީހަކު ނިކަމެތި ކުރާނަމޭ ހީކޮށް އުޅޭއުޅުމުން އިތުރުވާނީ ނަފްރަތު. ރައީސް ޞާލިހަކީ ފިނޑި ވެރިއެއް! ޔަގީނުންވެސް މިއިން އެކަކުގެވެސް ހިތްވަރެއް ނޭލޭނެ. ވާނީ އިތުރަށް ވަރުގަދަ.
– އީވާ ވިދާޅުވިއެވެ.
ޑިމޮކްރެޓްސް އަށް 3000 މެންބަރުން ހަމަ ކުރުމުގެ މަސައްކަތް ފެށީ މިދިޔަ ހަފްތާގައެވެ. އެޕާޓީން ބުނެފައިވާ ގޮތުގައި އެއަދަދަށް މެންބަރުންގެ ސޮއި ހަމަކޮށް މިހަފްތާގައި އިލެކްޝަންސް ކޮމިޝަނަށް ހުށަހަޅާނެއެވެ.
