ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފެއްދެވުމަށް މަސައްކަތް ކުރައްވާ ސިޔާސީ ޕާޓީ "ދަ ޑިމޮކްރެޓްސް" އަށް އެމަނިކުފާނުގެ މަންމައާއި، ބައްޕަ ސޮއިކުރައްވައިފިއެވެ.
ރައީސް ނަޝީދާއި، އެމަނިކުފާނުގެ ޢާއިލީ ބޭފުޅުންކީ މީގެ ކުރިން ވެރިކަން ކުރާ މައި ޕާޓީ އެމްޑީޕީއަށް ނިސްބަތްވާ ބޭފުޅުން ތަކެކެވެ. ނަމަވެސް ނަޝީދު އިސްވެ ހުންނަވައިގެން އުފައްދަވާ ޕާޓީއަށް އެމަނިކުފާނުގެ ޢާއިލީ ބޭފުޅުންނާއި، އަދި ނަޝީދަށް ތާއީދުކުރާ މީހުން ދަނީ ސޮއި ކުރަމުންނެވެ.
ރައީސް ނަޝީދުގެ މަންމައާއި ބައްޕަ "ދަ ޑީމޮކްރެޓްސް" އަށް ސޮއިކުރި ނަމަވެސް މިހާތަނަށް ނަޝީދު އެޕާޓީއަށް ސޮއި ކުރައްވާފައި ނުވެއެވެ. އަދިވެސް ހުންނެވީ އެމްޑީޕީގެ ރައީސެއްގެ ގޮތުގައެވެ.
ނަޝީދު "ފިކުރެއްގެ ދިރުން" ހަރަކާތުން މިއަދު އުފެދިގެން ދިޔަ ޑިމޮކްރެޓްސްއިން ރިޔާސީ އިންތިހާބުގައި ވާދަކުރާނެ ކަމަށް ވަނީ އިއުލާނުކޮށްފައެވެ. ނަޝީދަށް ތާއީދު ކުރާ މަޖިލީހުގެ 12 މެމްބަރަކުން ވަނީ އެމްޑީޕީއިން ވަނީ އާ ޕާޓީއާއި ގުޅިފައެވެ. އަދި ނަޝީދަށް ތާއީދުކުރާ އެހެން ފަރާތްތަކުން ވެސް ދަނީ އެމްޑީޕީއިން ވަކިވަމުންނެވެ.
އިލެކްޝަނުން ދިން ހުއްދައާއިއެކު ޕާޓީ އުފެއްދުމަށް ހަމަކުރަންޖެހޭ 3،000 މީހުންގެ ސޮއި ހަމަކުރުމުގެ މަސައްކަތް ދަނީ ކުރަމުންނެވެ. ނަމަވެސް މިހާތަނަށް އަދަދު ހަމަވިކަމެއް ހާމަކޮށްފައި ނުވެއެވެ. ޕާޓީ އުފެއްދުމުގައި އިސްކޮށް ހަރަކާތްތެރިވާ ބޭފުޅުން ވިދާޅުވީ މިފެށޭ ހަފްތާގައި ރަޖިސްޓްރީ ކުރުމަށް ހުށަހަޅާނެކަމަށެވެ.
