ވަރިވާން ހުށަހެޅި އަންހެން މީހާއަށް ގުޅައި މެސެޖުކުރި ގާޒީ ސަސްޕެންޑްކޮށްފިއެވެ.
ޖޭއެސްސީ އިން ބުނީ ހދ. ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި މައްސަލައެއްގައި ހިމެނޭ ހަސްމަކަށް ގުޅައި މެސެޖުކޮށް ހެދި ކަމަށް ތުހުމަތުގައި އަލީ އާދަމްއާ ގުޅޭ މައްސަލައެއް ކޮމިޝަނުން ތަހުގީގުކުރަމުންދާ ކަމަށެވެ.
މައްސަލައިގެ ތަހުގީގަށް ހޯދިފައިވާ މައުލޫމާތަށް ރިއާޔަތްކޮށް، ޝަރުއީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، ކޮމިޝަނުން ވަކިގޮތެއް ކަނޑައަޅަންދެން އަލީ އާދަމް ވަޒީފާއަށް ނުނިކުމެ މަޑުކުރުމަށް އެންގުމަށް މިރޭ ބޭއްވި ކޮމިޝަންގެ ކުއްލި ޖަލްސާގައި ނިންމާފައިވާ ކަމަށްވެސް ޖޭއެސްސީ އިން ވަނީ ބުނެފައެވެ.
ވަރިވާން ހުށަހެޅި އަންހެން މީހާއަށް އަލީ އާދަމް ގުޅާތީ އެކަމާ ހިތްހަމަނުޖެހިގެން އޭނާއަށް މަރުގެ އިންޒާރު ދިން ކަމުގެ ތުހުމަތުގައި މިދިޔަ ހޯމަ ދުވަހު ފުލުހުން ވަނީ އުމުރުން 25 އަހަރުގެ މީހަކާއި 23 އަހަރުގެ މީހަކު ހައްޔަރުވެސް ކޮށްފައެވެ.
