ރައްޔިތުންގެ މަޖިލީހުގެ ނައުބު ރައީސް އީވާ އަބްދުﷲ މަޤާމުން ވަކި ކުރުމަށް މަޖިލީހަށް ހުށަހަޅާފައިވާ އެމްޑީޕީގެ ޕީޖީ މެމްބަރުން ސޮއިކުރައްވާފައިވާ ޕެޓިޝަންގައި ނިލަންދޫ ދާއިރާގެ މެންބަރު އަބްދުލް މުހުސިން ސޮއިކުރައްވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، މަޖިލީހުގެ ނައިބު ރައީސް އީވާ އަބްދުﷲ މަގާމުން ދުރުކުމަށް އެމްޑީޕީގެ ޕީޖީގެ 50 މެންބަރަކު ސޮއިކުރައްވާ ޕެޓިޝަނެއް ވަނީ ހުށަހަޅާފައެވެ. އަދި މިކަން މަޖިލީހުގެ އިދާރާއިންވެސް ވަނީ މަޖިލީހުގެ ނައިބު ރައީސްކަމުން އީވާ ވަކި ކުރުމަށް އެދި އެމްޑީޕީގެ ޕީޖީ ގްރޫޕުން ހުށަހަޅާފައިވާ ޕެޓިޝަން ލިބިފައިވާކަމަށް ހާމަކޮށްފައެވެ.

މުހުސަނަކީ މަޖިލީހުގައި ހިމެނޭ މިނިވަން މެންބަރުންގެ ތެރެއިން މެންބަރެކެވެ.

ސޮއިކޮށްފައިވާ 50 މެންބަރުންގެ ތެރޭގައި ނިލަންދޫ ދާއިރާގެ މެންބަރު އަބްދުލް މުހުސިން ހިމެނިވަޑައިގަންނަވާއިރު، މުހުސިން އެމްޑީޕީއާއި ގުޅިވަޑައިގެންފައިވާކަމަށް އޭނާ އަދި ހާމަކުރައްވާފައެއް ނުވެއެވެ.

ބައެއް މީޑިއާތަކުގައި މުހުސިން އާއި ހަވާލާދީ ބުނެފައިވާ ގޮތުގައި މުހުސިން އެމްޑީޕީއާއި ގުޅުމުގެ މަޝްވަރާތަކެއް ކުރަމުން އަންނަ ކަމަށް ވިދާޅުވެފައިވާކަމަށާއި ނަމަވެސް ރަސްމީކޮށް އެމްޑީޕިއާއި ގުޅިވަޑައިގަތް ކަމެއް ކަށަވަރުކޮށް ނުދެއްވައެވެ. އަދި ވަރަށް އަވަހަށް އެކަން ރަސްމީކޮށް އިއުލާންކުރައްވާނެކަމަށް ވެސް އޭނާ ވިދާޅުވެފައިވާކަމަށް މީޑިއާތަކުގައި ބުނެފައިވެއެވެ.