ޤައުމުގެ ހަމަޖެހުމާއި، ކުރިމަގަށްޓަކައި ކުރިއަށް އޮތް ރިޔާސީ އިންތިޚާބުގައި މަސައްކަތް ކުރުމަށް ޖުމްހޫރީޫ ޕާޓީއާއިއެކު ސިޔާސީ ކަމަރު ބަނުމަށް ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ގޮވާލައިފިއެވެ.
ޤާސިމް މިހެން ވިދާޅުވީ ނިމިދިޔަ ދައުރުގެ ފ. އަތޮޅު ކައުންސިލްގެ ނައިބުރައީސްކަން ކުރައްވާފައިވާ މަޙްމޫދު އަޙްމަދާއި، އަދި ނިމިދިޔަ ދައުރުގައި ފ. ދަރަބޫދޫ ކައުންސިލުގެ ރައީސް ކަން ކުރައްވާފައިވާ އަލީ މުޙައްމަދާއި ދެ ބޭފުޅުން، އެ ބޭފުޅުން ކުރިން އުޅުއްވި ސިޔާސީ ޕާޓީ ދޫކުރައްވާ، ޖުމްހޫރީޕާޓީ އާއި، ގުޅިވަޑައިގެންނެވީތީ އެދެބޭފުޅުންނަށް މަރުޙަބާ ދަންނަވައި ކުރެއްވި ޓުވީޓުގައެވެ.
ޤާސިމް ވިދާޅުވީ ޤައުމުގެ ކުރިއަށް އޮތް މުސްތަގުބަލަށްޓަކައި، ކުރިއަށް އޮތް ރިޔާސީ އިންތިޚާބުގައި ރާއްޖޭގެ އެކި ކަންކޮޅުތަކުގައި ތިބި މިފަދަ ޚިދުމަތްތެރި ބެބޭފުޅުން ޖުމްހޫރީ ޕާޓީއާއިއެކު ކަމަރު ބަންނަވައި ރިޔާސީ އިންތިޚާބު ކާމިޔާބު ކުރުމަށް މަސައްކަތް ކުރުމަކީ ނުހަނު އެދޭކަމެއްކަމަށެވެ.
އަޅުގަނޑު އެދެނީ ރާއްޖޭގެ އެންމެހާ ކަންކޮޅުތަކުގައި ދިރިއުޅުއްވާ މިފަދަ ޚިދުމަތްތެރީން ޤައުމުގެ ހަމަޖެހުމާއި، ކުރިމަގަށްޓަކައި އަޅުގަނޑުމެންނާއި އެކު ސިޔާސީ ކަމަރު ބަންނަވާ، އަޅުގަނޑާއި އެކު #Q2023 ގެ ރިޔާސީ ދަތުރު ގައި ބައިވެރިވެލައްވާ.
– ޤާސިމް ވިދާޅުވިއެވެ.
ސެޕްޓެމްބަރ މަހުގެ 09 ވަނަ ދުވަހު އޮންނަ ރިޔާސީ އިންތިހާބުގައި ވާދަކުރާނެކަން އިއުލާންކޮށް، ޖުމްހޫރީ ޕާޓީން އަންނަނީ ކެމްޕޭން ހަރަކާތްތައް އިތުރު ކުރަމުންނެވެ. ރިޔާސީ އިންތިހާބުގައި ވާދަކުރާނެކަން ޖުމްހޫރީ ޕާޓީން އިއުލާން ކުރި ފަހުން ގިނަ ބަޔަކު އަންނަނީ އެޕާޓީ އަށް ސޮއި ކުރަމުންނެވެ.
ކޯލިޝަނެއް ނުހަދައި ކުރިއަށް އޮތް ރިޔާސީ އިންތިހާބުގައި ވާދަކުރައްވަން ޖެހުނަސް އިންތިހާބުގައި ވާދަކުރައްވާނެ ކަމަށާއި އެއީ ސުވާލެއްވެސް އޮތް ކަމެއް ނޫން ކަމަށް ގާސިމް އިއްޔެވަނީ ވިދާޅުވެފައެވެ.
ގާސިމް އިއްޔެ ވަނީ ރާއްޖޭގެ ވެރިކަމަށް އަންނަން ކުރާ މަސައްކަތުގައި ބައިވެރިވާން އުމުރުން 18 އަހަރު ވެފައިވާ ހުރިހާ ރައްޔިތުންނަށް ދައުވަތު ދެއްވާއެވެ.
