އިންޑިއާގެ ޓެމިލް ނާޑޫގެ ޓުޓިކޮރިން ބަނދަރުން ސީދާ ރާއްޖެއަށް މުދާ އުފުލާ ބޯޓުގެ ދަތުރުތަކެއް ފަށައިފިއެވެ.
އިންޑިއާ އާއި ރާއްޖެ އާ ދެމެދު ދަތުރުތައް ކުރުމަށް ހަމަޖެހިފައި ވަނީ ރާއްޖޭގެ ގައުމީ ޝިޕިން ކުންފުނި އެމްއެސްއެސްގެ ބޯޓު 'އެމްއެސްއެސް ގަލީނާ، އިންނެވެ. މިއީ 680 ކޮންޓެއިނާ އުފުލޭ ބޯޓެކެވެ.
ހަފްތާއަކު ތިން ދުވަހު ކުރުމަށް ހަމަޖެހިފައިވާ މި ދަތުރުތައް ފަށްޓަވައިދެއްވީ އެ ގައުމުގެ މިނިސްޓާ އޮފް ސްޓޭޓް ފޯ ޕޯޓްސް، ޝިޕިން އެންޑް ވޯޓާވޭސް ޝާންތަނޫ ޓާކޫރެވެ. މި ރަސްމިއްޔާތުގައި ޝާންތަނޫ ވިދާޅުވީ މި ހިދުމަތް ފެށުމާއެކު ރާއްޖެ އާއި އިންޑިއާ އާ ދެމެދު މުދާ އުފުލަން ސްރީލަންކާ މަގުން ކުރަމުން އައި ބާޖާއި ބަލްކު ކާގޯގެ ދަތުރުތައް ނިމުމަކަށް އަންނާނެ ކަމަށެވެ.
ރާއްޖެއަށް ބޭނުންވާ އާންމު މުދާ އިންޑިއާގެ ޓުޓިކޮރިން އިން މީގެކުރިން ފޮނުވަމުން ދިޔައީ ސްރީލަންކާގެ ކޮލަމްބޯ މަގުންނެވެ. ނަމަވެސް އިއްޔެ އިން ފެށިގެން ރާއްޖެއަށް މުދާ ދެން ގެންނާނީ އިންޑިއާގެ ޓުޓިކޮރިންގެ ބަނދަރުން ސީދާ މާލެއަށެވެ.
ރާއްޖެއާއި އިންޑިއާއާ ދެމެދު ކޮންޓެއިނަރުގައި މުދާ އުފުލުމުގެ ސީދާ ދަތުރުތައް ފަށާފައި މިވަނީ 2019 ވަނަ އަހަރު އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދަތުރުފުޅުގައި ދިވެހި ސަރުކާރާ އެކު ސޮއިކުރި އެއްބަސްވުމެއްގެ ދަށުންނެވެ.
