އިސްލާމީ ފަތުވާދޭ އެންމެ މަތީ މަޖިލިސް އެކުލެވިގެން ގޮތަށް ބަދަލު ގެނެސް ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު މުރާޖާ ކުރުމުގެ މަސައްކަތް ކުރުމަށްފަހު، ޤާނޫނަށް އިސްލާހު ނުގެނެސް އިސްލާމީ ފަތުވާދޭ އެންމެ މަތީ މަޖިލީހުގައި ތިއްބެވި މެމްބަރުންގެ ދައުރު ހަމަވިތާ ދެ އަހަރެއްހާ ދުވަސް ފަހުން އާ މެމްބަރުން އައްޔަންކޮށްފިއެވެ.
މިހާރު އެމަޖިލީހުގައި އިންނެވީ އެންމެ މެންބަރެކެވެ. އެއީ ފަޟީލަތުލް އުސްތާޛުއްޝައިޚް ޑރ. މުހައްމަދު ރަޝީދު އިބްރާހިމްއެވެ. އޭނާ ވެސް މެންބަރުކަމަށް އައްޔަން ކުރެއްވީ ކުރީގެ ރައީސް ޔާމީންގެ ސަރުކާރުންނެވެ. ޔާމީންގެ ސަރުކާރުން އައްޔަން ކުރެއްވި އެހެން މެންބަރުން ވަނީ މިހާރު މަގާމުގެ މުއްދަތު ހަމަކުރައްވާ މެންބަރު ކަމުން ވަކިވެފައެވެ.
އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަށް ޖަވާބުދެއްވަމުން ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ، އެ މަސައްކަތް ކުރެވެމުންދާ ކަމަށާއި، މާ ގިނަ ދުވަސް ނުނަގާނެ ކަމަށެވެ. އެކަމަކު ފަހުން މިއުވާން ނޫސްވެރިން ތިބޭ ވަޓްސްއެޕް ގްރޫޕްގައި ވިދާޅުވީ، ފަތުވާ ކޮމިޓީއަށް މިހާރު ރައީސް ހަތަރު މެމްބަރުން އައްޔަން ކުރައްވާފައިވާ ކަމަށެވެ. އަދި އެ ކޮމެޓީގެ މަަސައްކަތްތައް ކުރިއަށްދާ ކަަމަށް ވިދާޅުވިއެވެ.
ފަތުވާދޭ މަޖިލީހުގައި މިހާރު ތިއްބެވި 4 މެމްބަރުން:
1. ޑރ.މުހައްމަދު ރަޝީދު އިބްރާހިމް
2. ޑރ.އަބްދުއްސައްތާރު އަބްދުއްރަހުމާން
3. ޑރ.އިބާރްހިމް ޒަކަރިއްޔާ މޫސާ
4. ޝައިޚު އިލްޔާސް ހުސެއިން
މީގެ 15 އަހަރު ކުރިން، ކުރީގެ ރައީސް މުހައްމަދު ނަޝީދުގެ ވެރިކަމުގައި 2008 ގައި އުފެއްދި ފިގުހު އެކަޑެމީ ގަވައިދެއްގެ ދަށުން ވަރަށް ރަނގަޅަށް ހިންގަމުން އައިސް ކުރީގެ ރައީސް ޔާމީންގެ ވެރިކަމުގައި 2016 ގައި ގާނޫނެއްގެ ތެރެއިން ބާރުވެރިކަން ދިނެވެ. ދިވެހިރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނަށް އެ އަހަރު ގެނައި އިސްލާހެއްގެ ދަށުން ޔާމީންގެ ވެރިކަމުގައި "އިސްލާމީ ފަތުވާދޭ އެންމެ މަތީ މަޖިލިސް" އުފެއްދިއެވެ.
ޔާމީންގެ ސަރުކާރުގައި ވެސް ފަތުވާ މަޖިލިސް ވަރަށް ރަނގަޅަށް ހިންގަމުން އައި ނަމަވެސް އެ މަޖިލިހުގެ ފަސް މެމްބަރުންގެ މުއްދަތު 2021 ވަނަ އަހަރު ހަމަވުމާއެކު، އެ ހިސާބުން މި ސަރުކާރުން ކުރަން ޖެހޭ ކަންކަން ނުކުރުމުން ހުރިހާ ކަމެއް ބޮއްސުންލައިގެން ދިޔައީއެވެ.
ފަތުވާދޭ މަޖިލީހަށް 2 އަހަރުފަހުން މެމްބަރުންތަކެއް އައްޔަން ކުރެއްވިއިރު، އިސްލާމީ ފަތުވާދޭ އެންމެ މަތީ މަޖިލިސް އެކުލެވިގެން ގޮތަށް ބަދަލު ގެނެސް ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު މުރާޖަޢާކުރުމަށް ޤާނޫނަށް އިސްލާހު ގެނައުމުގެ މަސައްކަތް ސަރުކާރުން ދަނީ ކުރަމުންނެވެ.
އިސްލާމީ ފަތުވާދޭ އެންމެމަތީ މަޖިލީހުގެ މަސްއޫލިއްޔަތުގެ ތެރޭގައި ދައުލަތުގެ މުއައްސަސާތަކުން މަޖިލީހުގެ ލަފަޔަކަށް އެދޭ ދީނީ ކަންކަމުގައި އެފަރާތްތަކަށް ބޭނުންވާ އިސްތިޝާރީ ލަފާ ފޯރުކޮށްދެއްވުމާއި، ރައްޔިތުންގެ ދީނީ ޚިޔާލު ތަފާތުވުންތައް އުފެދޭ މައްސަލަތައް ދެނެގަނެ އެކަންކަމުގެ ދިރާސާކޮށް އެމަޖިލީހުގެ ފަތުވާ ޢާންމުންނަށް ލިބޭނެގޮތް ހެއްދެވުން ހިމެނެއެވެ.
ޤާނޫނަށް ހުށަހަޅަން ފެންނަ އިސްލާހުތަކުގެ މަޝްވަރާ ކުރައްވާފައިވާއިރު، ބިލު މަޖިލީހަށް ފޮނުވުމަށްޓަކައި ކަމާއިބެހޭ އެހެން އިދަރާތަކާއިއެކުވެސް މަޝްވަރާކުރުމަށް ވަނީ ހަމަޖެހިފައެވެ.
