ފުލުހުންގެ ހިދުމަތް ކިލަނބުކޮށްލީ ރައްޔިތުންގެ މަޖިލިހުގެ ތިމަރަފުށީ ދާއިރާގެ މެމްބަރު ރިޔާޒު ކޮމިޝަނާ އޮފް ޕޮލިސްގެ މަގާމުގައި ހުންނެވި އިރުގައި ކަމަށް ކިނބިދޫ ދާއިރާގެ މެންބަރު މުހައްމަދު ނާޝިޒު ވިދާޅުވެއްޖެއެވެ.
ނާޝިޒު މިހެން ވިދާޅުވީ ވެރިކަމުގެ މިފަސް އަހަރުގެ ތެރޭގައި ފުލުހުންގެ ކުރިއެރުމަށް މިސަރުކާރުގެ އެއްވެސް ކަމެއް ނުކޮށްދެވޭ ކަމަށްބުނެ ރިޔާޒު ދެއްކެވިި ވާހަކަތަކާއި ގުޅިގެންނެވެ. ނާޝިދު ވިދާޅުވީ ފުލުހުންގެ ޚިދުމަތުގައި ދެކުނު އެންމެ ކަޅު ދުވަސްތަކެއް ދެކުނީ ރިޔާޒުގެ ސީޕީ ކަމުގައެވެ. ނަމަވެސް އެކަންކަމުން އަރައިގަނެ މިއަދުގެ ސަރުކާރުން ކުރި މަސައްކަތުން ސަލާމަތީ ބާރުތަކުން ރައްޔިތުންގެ އިތުބާރު ހޯދާފައިވާކަމަށެވެ.
ދިވެހި ފުލުހުންގެ ޚިދުމަތް ކިލަނބުކޮށްލީ ރިޔާޒުގެ ސީޕީ ކަމުގަ، މިއަދު އެކަމުން މިންޖުވެ ދިވެހި ފުލުހުންގެ ޚިދުމަތާއި ޤައުމީ ދިފާއީބާރު މިވަނީ ރައްޔިތުން އިތުބާރުކުރާ މުއައްސަަސާތަކަށްވެފަ. ވީ އެންމެބޮޑު ވަޢުދު މިވަނީ ފުއްދިފަ.
– ނާޝިޒު ވިދާޅުވިއެވެ.
ނާޝިޒުގެ ވާހަކަތަކަށް ރައްދު ދެއްވައި ރިޔާޒު ވިދާޅުވީ ފުލުހުންގެ ޚިދުމަތުގައި އިޚުލާސްތެރިކަމާއި ތެދުވެރިކަމާއެކީ އޭނާ މަސައްކަތްކުރިކަން ދިވެހިރައްޔިތުން ވަނީ ބަލައިގަނެފައި ކަމަށެވެ. އެކަން ޔަޤީންވަނީ ރިޓަޔަރ ކޮށްފައި ފުރަތަމަ ބައިވެރިވި އިންތިޚާބުގައި ނާޝިޒްއާއި ވާދަކޮށް ރައްޔިތުންގެ ވޯޓަކުން އެމީހުންގެ މަންދޫބަކަށް އަޅުގަޑު ހޮވުމުންކަމަށެވެ.
ފުލުހުންގެ ޚިދުމަތުގަ އިޚުލާސްތެރިކަމާއި ތެދުވެރިކަމާއެކީ އަޅުގަޑު މަސައްކަތްކުރިކަން ދިވެހިރައްޔިތުންވަނީ ބަލައިގަނެފަ. އެކަން ޔަޤީންވަނީ ރިޓަޔަރ ކޮށްފަ ފުރަތަމަ ބައިވެރިވި އިންތިޚާބުގަ މަނިކުފާނާއިވާދަކޮށް ރައްޔިތުންގެ ވޯޓަކުން އެމީހުންގެ މަންދޫބަކަށް އަޅުގަޑު ހޮވުމުން.
– ރިޔާޒު ވިދާޅުވިއެވެ.
ފުލުހުންގެ 90 ވަނަ އަހަރީ ދުވަހުގެ މުނާސަބަތުގައި ރޭ ބޭއްވި ޖަލްސާގައި ރައީސް ސޯލިހް ވިދާޅުވީ ދިވެހި ފުލުހުންނާއި ދިވެހި ސިފައިންގެ މުސާރައަށް ހެޔޮ ބަދަލުތަކެއް ގެންނަވާނެ ކަމަށެވެ. އަދި އެކަމާ ބެހޭ ދިރާސާތައް، ޕޭ ކޮމިޝަނުން މިހާރު ކުރަމުން އަންނަ ކަމަށް އޭނާ ވިދާޅުވިއެވެ.
އެކަމަށް ރައްދު ދެއްވައި ރިޔާޒް ކުރެއްވި ޓުވީޓެއްގައި ވިދާޅުވީ ފަސް އަހަރުގެ ދައުރެއް ނިމިގެންދާ އިރު ސިފައިންނާއި ފުލުހުންގެ އުމްރާނީ ތަރައްގީ އަށް ނުވަތަ ވެލްފެއާ ރަނގަޅު ކުރުމަށް މި ސަރުކާރަށް ކޮށްދެވުނު އެއްވެސް ކަމެއް ނެތް ކަމަށެވެ. އަދި ވައުދުވި އެއްވެސް ކަމެއް ވެފައި ނުވާ ކަމަށް އޭނާ ވިދާޅުވިއެވެ.
