ކުރިޔަށް އޮތް ރިޔާސީ އިންތިޚާބަށް އެންމެ 5 މަހަށް ވެފައިވާއިރު، އިންތިޚާބަށް އަމާޒުކޮށް ރާއްޖޭގެ އެކި ސިޔާސީ ޕާޓީތަކުން ދަނީ އެކި ޕްލޭންތައް ކޮށް، އެކި ކާރޑުތައް ކުޅެއް، އޮތް ފުރުސަތެއްގެ ބޭނުންކޮށް އިންތިޚާބަށް ތައްޔާރު ވަމުންނެވެ.

އެގޮތުން، ކުރިޔަށް އޮތް ރިޔާސީ އިންތިޚާބުގައި 6 ކެނޑިޑޭޓަކު ވާދަކުރާނޭކަން އިއުލާކޮށް، ބައެއް ކެނޑިޑޭޓުން މިހާރުވަނީ އަމަލީގޮތުން ކެމްޕޭންވެސް ފައްޓަވާފައެވެ. އޭގެ ތެރޭގައި ހިމެނެނީ ވެރިކަންކުރާ އެމްޑީޕީ ހިމެނޭ ކޯލިޝަންގެ ކެނޑިޑޭޓް ރައީސް އިބުރާހިމް މުހައްމަދު ސާލިހުއާއި، ޖުމުހޫރީ ޕާޓީގެ ރިޔާސީ ކެނޑިޑޭޓް ގާސިމް އިބުރާހިމްއާއި މިނިވަން ކެނޑިޑޭޓުންގެ ގޮތުގައި ވާދަކުރައްވާނޭކަން އިއުލާން ކޮށްފައިވާ ތިން ކެނޑިޑޭޓެއްގެ އިތުރުން އިދިކޮޅު ޕީޕީއެމްގެ ރިޔާސީ ކެނޑިޑޭޓް، މިވަގުތު ޖަލުގައި އޮންނެވި ކުރީގެ ރައީސް އަބުދުالله ޔާމިންއެވެ.

އެހެންނަމަވެސް، ރިޔާސީ އިންތިޚާބުގައި ވާދަކުރައްވާނޭކަން އިއުލާން ކުރައްވާފައިވާ ކެނޑިޑޭޓުންގެ ތެރެއިން ރައީސް ޔާމިން ފިޔަވާ އެހެން ހުރިހާ ކެނޑިޑޭޓުންނަށްވެސް އިންތިޚާބުގައި ވާދަކުރުމަށް ގާނޫނީ ހުރަހެއް ނެތްތާގައި، އެބޭބޭފުޅުންގެ ރިޔާސީ ޓިކެޓަށް ޝައުގުވެރިކަންހުރި ވަކި އެހެންފަރާތްތަކެއްވެސް ކެނޑިޑޭޓުންގެ ވަށައިގެން، ނުވަތަ ކެނޑިޑޭޓުން ނިސްބަތްވާ ޕާޓީތަކުގައިވެސް ނެތްކަން ފާހަގަ ކޮށްލާން ޖެހެއެވެ.

އެއާއި ޚިލާފަށް، އިދިކޮޅު ޕީޕީއެމްގެ ރިޔާސީ ޓިކެޓް އެޕާޓީން ރަސްމީކޮށް ރައީސް ޔާމިންއާއި ހަވާލު ކޮށްފައިވިނަމަވެސް، ރައީސް ޔާމިންއަށް ރިޔާސީ އިންތިޚާބިގައި ވާދަކުރެއްވޭނެކަމާމެދު އޮތް ޝައްކުތަކާއެކު، އެޕާޓީގެ ރިޔާސީ ޓިކެޓަށް "ހޯރަ" އަޅަމުންދާ ފަރާތްތަކުގެ ލިސްޓު ދިގުވެ، ވާދަވެރިކަންވެސް އެޕާޓީގެ އެތެރޭގައި އިންތިހާއަށް ބޮޑުވެގެން ގޮސްފައިވާކަމީ ސާފުކޮށް ފެންނާން އޮތް ހަގީގަތެއް ކަމުގައި ދަންނަވާން ޖެހެއެވެ.

އެގޮތުން، މިހާރުވެސް ރައީސް ޔާމިންގެ މައްޗަށް މަތިމައްޗަށް ހިގަމުންދާ ޝަރީއަތަކާއެކު، ކުރިޔަށް އޮތް ކުރު މުއްދަތުގައި ޖަލުން މިނިވަންވެ އިންތިޚާބުގައި ވާދަކުރުމާމެދު އޮތް ޔަގީންކަން ފަނޑުވަމުން ދާވަރަކަށް، ރިޔާސީ ޓިކެޓަށް ޕާޓީގެ ތެރޭގައި އޮތް ވާދަވެރިކަންވެސް ބޮޑުވެ، ޔާމިންގެ ރުހުމާއެކު ޓިކެޓް ލިބޭނެކަމުގެ ޔަގީންކަން ޕާޓީގެ ލީޑަރޝިޕްގައި ތިއްބެވި ބައެއް ފަރާތްތަކުން އިހުނަށްވުރެ ބޮޑަށް ހޯއްދަވާފައިވާކަމުގައިވެސް ބައެއް ފަރާތްތަކުން ޚަބަރު އޮންލައިނަށް މައުލޫމާތު ދީފައި ވެއެވެ.

ޔާމިންގެ ހުރިހާ މުއާމަލާތެއް ސެނެޓާއި ހަމައަށް ގެންދިއުމުގެ ހުރިހާ ބާރެއް ޖަމީލަށް!

ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ރައީސް ޔާމިނަށް މީގެ ކުރިން އެންމެ ބޮޑަށް ފާޑު ވިދާޅުވަމުން ގެންދެވި، ކުރީގެ ނާއިބު ރައީސް އަދި މިހާރުގެ ޔާމިންގެ އިސްވަކީލު ޑރ. މުހައްމަދު ޖަމީލު އަހުމަދު ދާދިފަހުންވަނީ ރައީސް ޔާމިންގެ ފަރާތުން ޚާއްސަ ނޯޓެއް ލީޑަރޝިޕްގައި ތިއްބެވި ފަރާތްތަކަށް އަރުވާފައެވެ.

މި ނޯޓަކީ، ރައީސް ޔާމިންގެ ފަރާތްޕުޅުން، ފޯރުކޮށްދޭ އެކިއެކި މެސެޖުތައް މީގެ ކުރިން ޕާޓީގެ އިސްފަރާތްތަކާއި ހަމައަށް ފޯރުކޮށްދޭ ވަސީލަތް ކަމުގައިވިނަމަވެސް، އެންމެފަހުން ފޯރުކޮށްދިން މި ނޯޓުގައި ރައީސް ޔާމިން ލިޔުއްވާފައިވާކަމަށް ވަނީ، ނޯޓުތައް ކުރިޔަށް އޮތް ތާގައި ނުފޮނުއްވާނެ ކަމަށާއި، ދެން މެސެޖުތައް ފޯރުކޮށް ދެއްވާނީ ސީދާ ޑރ. ޖަމީލް މެދުވެރިކޮށް އަނގަބަހުން ކަމަށް ކަމުގައެވެ.

މި އުސޫލާ ލީޑަރޝިޕްގެ ބޭފުޅުން ގަބޫލެއް ނޫން. ޑރ. ޖަމީލް އަނގަބަހުން ގެނެސް ދެއްވާ މެސެޖްތަކަށް އިތުބާރު ކުރާކަށް ލީޑަރޝިޕް ބޭނުމެއް ނުވޭ. އޭގެ ބަދަލުގައި ލީޑަރޝިޕުން ޑިމާންޑް ކުރަނީ، ޑރ. ޖަމީލް އަނގަބަހުން ގެނެސްދެއްވާ މެސެޖްތަކުގެ ބަދަލުގައި، ރައީސް ޔާމިން ވިދާޅުވާ ވާހަކަފުޅުންތައް ލިޔުއްވާފަ، ޑރ. ޖަމީލް ސޮއި ކުރައްވާ ފިންގަރ ޕްރިންޓްވެސް ޖައްސަވާފަ ދެއްވުމަށް. އެގޮތަކަށް ޑރ. ޖަމީލް އެއްބަހެއް ނުވޭ.

ޑރ. ޖަމީލަށް ލީޑަރޝިޕްގެ އިތުބާރު ނެތްކަމަށް މޭރުންކޮށް، އިދިކޮޅު ޕީޕީއެމްގެ އިސް ބޭފުޅަކު މި ރިޕޯޓަށް މައުލޫމާތު ދެއްވަމުން ވިދާޅުވެފައި ވެއެވެ.

"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، އިދިކޮޅު ޕީޕީއެމްގެ އިސް ބައެއް ބޭފުޅުން ތުހުމަތު ކުރައްވަނީ، ރައީސް ޔާމިންގެ މެސެޖްތައް ނޯޓަކުން ލީޑަރޝިޕާއި ހަމައަށް ފޯރުކޮށް ދިނުމަށް ހުރަސް އަޅުއްވާފައިވަނީ ސީދާ ޑރ. ޖަމީލް ކަމުގައެވެ. އޭގެ އެއް ބޭނުމެއްގެ ގޮތުގައި ޕީޕީއެމްގެ އިސް ބައެއް ބޭފުޅުން ފާހަގަ ކުރައްވަނީ ޕާޓީގެ ރިޔާސީ ޓިކެޓް ކަށަވަރު ކުރެއްވުމަށް ޑރ. ޖަމީލްގެ އޮތް ޝައުގުވެރިކަމާއި އެމަގުން ކުރައްވަމުން ގެންދަވާ މަސައްކަތްތަކެވެ.

ހަމައެއާއެކު ގަބޫލުކުރާންޖެހިފައިވާ އެއް ހަގީގަތަކީ ޑރ. ޖަމީލަކީ ރައީސް ޔާމިން އިސް ވަކީލުކަމަށް ވުމާއެކު، ރައީސް ޔާމިންއާއި ޖަލުން ބައްދަލުކޮށް، މުއާމަލާތު ކުރުމުގެ ފުރުސަތުވެސް، ވަކީލެއްގެ ހައިސިއްޔަތުން އެންމެ ބޮޑަށް ހުޅުވިފައިވާ ފަރާތަކީވެސް އެއީކަމެވެ.

އެހެންކަމުން، ލީޑަރޝިޕްގެ ވާހަކަތަކާއި، ހިގަމުންދާ ބައެއް މުއާމަލާތުތަކުގެ ޚަބަރުތައް ރައީސް ޔާމިންއާއި ހަމައަށް އަމިއްލަ މޭރުމުން ގެންގޮސް ދިނުމުގެ އިތުރުން، ޕާޓީގެ ރިޔާސީ ޓިކެޓް ކަށަވަރު ކުރުމަށް ރައީސް ޔާމިންގެ އިތުބާރު ހޯއްދަވާ، އަދި އެމަގުން ފާއިތުވެދިޔަ ތަނުގައި ޑރ. ޖޖަމީލް ގިނަގުނަ މަސައްތަކެއް ކުރައްވާފައިވާކަމުގައި އިދިކޮޅު ޕީޕީއެމްގެ އިސް ބައެއް ފަރާތްތަކުން ދެކޭކަމަށް، ޕީޕީއެމްގެ އިސް ބައެއް ބޭފުޅުން "ޚަބަރު އޮންލައިނަށް" މައުލޫމާތު ދީފައި ވެއެވެ.

ޓިކެޓް ރައީސް ޔާމިންގެ ރުހުން އޮތް ފަރާތަކަށް!

ރައީސް ޔާމިން ހިމެނިވަޑައިގަންނަވަނީ ކުރިޔަށް އޮތް ރިޔާސީ އިންތިބުގެ ޓިކެޓް އެންމެ ކުރިން ކަށަވަރުކުރެއްވި ކެނޑިޑޭޓްގެ ގޮތުގައެވެ. މިގޮތުން ދެވަނަށް ފަހަރަށް ޖަލަށް ވަޑައިގަންނަވަން ޖެހިވަޑައިގަތުމުގެވެސް މާކުރިން، ފާއިތުވި އަހަރުގެ މެދެއްހާ ތާގައި އިދިކޮޅު ޕީޕީއެމްއިންވަނީ އެޕާޓީގެ ރިޔާސީ ޓިކެޓް ރައީސް ޔާމިނަށް ރަސްމީކޮށް އަރުވާފައެވެ.

އެހެންނަމަވެސް، 11 އަހަރުގެ ޖަލު ހުކުމެއްގައި ދެވަނަ ފަހަރަށް ޖަލަށް ވަޑައިގަންނަވަން ޖެހިވަޑައިގަތް ހިސާބުން ޕާޓީގެ އެތެރޭގައި ރިޔާސީ ޓިކެޓަށް އޮތް ވާދަވެރިކަން އަލުން އާވެ، އާލާވެގެން ދިޔަނަމަވެސް، ޖުމުހޫރީ ޕާޓީގެ ރިޔާސީ ކެނޑިޑޭޓެއްގެ ގޮތުގައި އެޕާޓީގެ ލީޑަރު ގާސިމް އިބުރާހިމް ނިކުންނަވަން ނިންމެވި ހިސާބުން ޕީޕީއެމްގެ ރިޔާސީ ޓިކެޓް ހޯއްދެވުމަށް ބައެއް ބޭފުޅުން ކުރައްވަމުން ގެންދެވި މަސައްކަތް ހުއްޓަވާލައްވާފައިވާކަން ވަނީ ކަށަވަރުވެ ޔަގީން ކުރެވިފައެވެ. އޭގެ ތެރޭގައި ހިމެނޭ އެއް ބޭފުޅަކީ ޕީޕީއެމްގެ ނާއިބު ރައީސްކަމުގެ މަގާމުގައި ހުންނެވި އައްސާން މައުމޫނެވެ.

އެހެންނަމަވެސް، ޕީޕީއެމްގެ އެތެރޭގައި ރިޔާސީ ރޭހަށް އޮތް ވާދަވެރިކަމަށް ބަދަލެއް ނާދޭ. ޕްރައިމަރީއެއް ބާއްވަން ޖެހިއްޖެ ހާލަތެއްގައި، ރިޔާސީ ޓިކެޓް ލިބުން އެންމެ ގާތީ މޭޔަރު މުއިއްޒަށް. އެއާއި ޚިލާފަށް ޑރ. ޖަމީލް މަސައްކަތް ކުރައްވަމުން ގެންދަވަނީ ރިޔާސީ ޕްރައިމަރީއަކާ ނުލާ، ރައީސް ޔާމިންގެ ހަމަޖައްސަވާ ބޭފުޅެއްގެ ގޮތުގައި ޕީޕީއެމްގެ ޓިކެޓްގައި ރިޔާސީ ރޭހަށް ނިކުންނަވަން. އެހެން ވެދާނެވެސްމެ. އެހެންނަމެވެސް ޕާޓީގެ ލީޑަރޝިޕުން އެކަމަކަށް ރުހުމެއް ނުދޭނެ.

ރައީސް ޔާމިންގެ ރުހުމާއެކު، ރިޔާސީ ޓިކެޓް ލިބުން މިހާރު އެންމެ އެކަށީގެންވާ ބޭފުޅަކީ ޑރ. ޖަމީލުކަމަށް މޭރުން ކުރައްވަމުން އިދިކޮޅު ޕީޕީއެމްގެ އިސް ބޭފުޅަށް ވިދާޅުވެފައިވެއެވެ.

ކޮންމެއަކަށް ސާފުވާން އޮތް އެއް ހަގީގަތަކީ، ރައީސް ޔާމިން ޕާޓީގެ ލީޑަރޝިޕަށް ނޯޓު ފޮނުއްވުން ހުއްޓަވާލައްވާ، މެސެޖްތައް ފޯރުކޮށްދިނުމުގެ ހަމައެކަނި ވަސީލަތަކީ އިސް ވަކީލު ޑރ. މުހައްމަދު ޖަމީލު އަހުމަދު ކަމުގައި ހަމަޖެއްވި ހިސާބުން، ހާލަތަށް ބަދަލުތަކެއް އަތުވެއްޖެ ކަމުގައި ގަބޫކުރުމުގެ ފުރުސަތު އޮތްކަމެވެ.

އަދި އެމަގުން ރައީސް ޔާމިންގެ އިތުބާރު ހޯއްދަވާ، އިދިކޮޅުގެ ރިޔާސީ ޓިކެޓްގައި ރައީސް ޔާމިނަށް ވާދަ ނުކުރެއްވިއްޖެ ހާލަތެއްގައި، އެމަނިކްފާނުގެ އެންޑޯސްމަންޓް ޑރ. ޖަމީލަށް ދެއްވާނޭކަމުގެ ވަރަށްވެސް ބޮޑު ޔަގީންކަމެއް އޮތްކަމުގައިވެސް، ޑރ. ޖަމީލްގެ ބައެއް އަރިސްފަރާތްތަކުން މި ރިޕޯޓަށް މައުލޫމާތު ދެއްވަމުން ވިދާޅުވެފައިވެއެވެ.

ހަމަ އެއާއެކު ޑރ. ޖަމީލަށް އިދިކޮޅު ޕީޕީއެމްގެ ރިޔާސީ ޓިކެޓް ކަށަވަރު ކުރެއްވުމަށް ޕާޓީގެ އެތެރޭގައި މަސައްކަތް ކުރައްވަމުން ގެންދަވާ ބައެއް ފަރާތްތައް ތިއްބެވިކަންވެސް މިފުރުސަތުގައި ފާހަގަ ކޮށްލާންޖެހެއެވެ. އޭގެ ތެރޭގައި ހިމެނޭ އެއް ބޭފުޅެއްގެ ގޮތުގައި ގިނަބަޔަކު ފާހަގަކުރާ އެއް ފަރާތަކީ މާވަށު ދާއިރާގެ މެމްބަރު، ކުރީގެ އިކޮނޮމިކް މިނިސްޓަރ މުހައްމަދު ސައީދެވެ.

އެހެންނަމަވެސް، އިދިކޮޅު ޕީޕީއެމް ފަދަ، އެތައް ހާސް މެމްބަރުންނެއް އެޕާޓީގެ މެމްބަރުގެ ގޮތުގައި ތިބި، އަދި ދައުލަތުން މާލިއްޔަތުން އެތައް މިލިއަން ރުފިޔާއެއް ހޭދަކުރާ، ރައްޔިތުންގެ މެދުގައި ބޮޑު ތާއީދެއް އޮތް ޕާޓީއަކުން، ތަބަކަކަށް ލާފަ ވަކި ބޭފުޅަކާ ރިޔާސީ ޓިކެޓް ހަވާލު ކުރާތަން ދެކެން އާންމު މެމްބަރުންނާއި ލީޑަރޝިޕުން ރުހުން ދީގެން، ދެއަތް އުރާލާގައިގެން ބަލަން ތިބޭނެތޯ މިއީ ހަގީގަތުގައިވެސް އުފެދިގެންދާ ވަރަށްވެސް ބޮޑު ސުވާލެކެވެ.

އަދި މި ސުވާލުގެ ޖަވާބު އޭގެ ޒާތުގައި ކުރިޔަށް އޮތް މަދު ދުވަސްކޮޅެއްގެ ތެރޭގައި ލިބިގެންދާނޭކަމީވެސް ކަށަވަރުވެ ޔަގީންވާން އޮތް ކަމެކެވެ.