އެއްވެސް ދިވެއްސަކު ޢުމްރާއަށް ނުވަތަ ޙައްޖަށް ގޮސްފައި އެނބުރި ނާދެވި، ސަޢުދީގައި ޙާލުގައި ޖެހޭފަދަ ޙާލަތަށް ނުދާނެކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައި މިވަނީ ފަހަކަށް އައިސް ޙައްޖާއި ޢުމްރާއަށް މީހުން ގެންދާ ދިވެހި ޖަމާޢަތްތަކާ ގުޅޭ މައްސަލަތައް އުފެދި އެކަމުގެ ސަބަބުން ޙައްޖުވެރިންނާއި ޢުމްރާވެރިންނަށް ނުތަނަވަސްކަމާ ކުރިމަތިވެފައި ދަނޑިވަޅެއްގައެވެ. އެގޮތުން ޑާދިފަހުން އަލް މަޝްއަރު ހައްޖު އެންޑް އުމްރާ ގުރޫޕްގެ ހަވާލުގައި ރާއްޖެއިން އުމްރާއާށް ދިޔަ ދިވެހިންނަށް ރާއްޖެ އައުމަށް ދަތިތަކެއް ކުރިމަތިވެދާނެކަމުގެ ބިރު ހީވެ އެކަމުގެ ޚަބަރުތައް މީޑިއާތަކުގައި ގެނެސްފައިވެއެވެ.
އަލް މަޝްއަރު ގުރޫޕްގެ ހަވާލުގައި މި ރޯދަމަހު 138 މީހަކު އުމްރާއަށް ދިޔައެވެ. އެމީހުން އުމްރާއަށް ގެންދަން ފްލައިޓް ޗާޓަރު ކުރި ދިވެހި ކުންފުންޏަށް އެއްލައްކަ ސާޅީސް ހާހަށްވުރެ ގިނަ ޑޮލަރު ދައްކަންޖެހުނެވެ. އެފައިސާދައްކަން އަލް މަޝްއަރު ގްރޫޕުން ދިން ދެ ޗެކެއް ބައުންސްވި މައްސަލައެއް ވަނީ ފެންމަތިވެފައެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި އިސްލާމިކް މިނިސްޓަރ ޑރ.އަޙްމަދު ޒާހިރު ޢަލީ ވިދާޅުވެފައިވަނީ އަލް މަޝްއަރު އުމްރާ ގުރޫޕުގެ ޗެކް ބައުންސްވި މައްސަލަ އިސްލާމިކް މިނިސްޓްރީން ބަލަމުން އަންނަކަމަށެވެ. އަދި މިކަމުގެ ސަބަބުންދިވެހި އުމްރާވެރިން ހާލުގައި ޖެހުނަ ނުދޭނެކަމުގެ ޔަގީންކަން ސަރުކާރުން ދެއްވާކަމަށްވެސް މިނިސްޓަރ ވިދާޅުވެފައިވެއެވެ.
