1440 ވަނަ އަހަރު މޯލްޑިވްސް ހައްޖު ކޯޕަރޭޝަނުގެ ފަރާތުން ކުރި ހައްޖު ދަތުރަށް ދައުލަތުގެ ބަޖެޓުން އެއްވެސް ހަރަދެއް ކޮށްފައިނުވާނެކަމަށް މިނިސްޓަރ އޮފް އިސްލާމިކް އެފެއަރޒް ޑރ އަހުމަދު ޒާހިރާ އަލީ ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މިއަހަރުގެ ފުރަތަމަ ދައުރުގެ 32 ވަނަ ޖަލްސާގައި މާފަންނު މެދު ދާއިރާގެ މެންބަރު އިބްރާހިމް ރަޝީދު ލިޔުމުން ޖަވާބު ހޯއްދެވުމަށް ކުރެއްވި ސުވާލަށް ދެއްވި ޖަވާބުގައެވެ.
މަޖިލީހަށް ލިޔުމުން ދެއްވި ޖަވާބުގައި އިސްލާމިކް މިނިސްޓަރ ވިދާޅުވީ ޙައްޖު ދަތުރުގައި މައްކާ ހޮޓަލުގައި ހޭދަކުރި 28 ދުވަހަށް ހައްޖު ކޯޕަރޭޝަނުން މައްކާގެ ހޮޓަލަށް 34.5 މިލިއަން ރުފިޔާ، މަދީނާ ހޮޓަލުގައި ހޭދަކުރި 2 ދުވަހަށް 3.5މިލިއަން ރުފިޔާ ހޭދަކޮށްފައިވާ ކަމަށެވެ. އަދި ހައްޖު ދަތުރުގައި މުތައްވިފަށް 16.2 މިލިޔަން ރުފިޔާ ޚަރަދުކޮށްފައިވާ ކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ހައްޖު ދަތުރަށް ދައުލަތުގެ ބަޖެޓުން އެއްވެސް ޚަރަދެއް ކުރައްވާފައި ނުވާ ކަމަށެވެ. 2019 ވަނަ އަހަރު ރާއްޖެއަށް ލިބުނު ރަސްމީ 1000 ކޯޓާގެ އިތުރަށް އިތުރު 1000 ކޯޓާ ލިބުނެވެ. އޭގެ ތެރެއިން 500 ކޯޓާ ހައްޖު ކޯޕަރޭޝަނަށް ދިނުމަށްފަހު ބަކީ ކޯޓާތައް އެއަހަރު ޙައްޖަށް މީހުން ގެންދިޔުމަށް ހުއްދަ ދީފައިވާ ކުންފުނިތަކަށް ބަހާލިއެވެ.
އެއަހަރު 6 ގުރޫޕަކުން ޙައްޖަށް މީހުން ގެންދިޔައެވެ. 2019 ވަނަ އަހަރު ރާއްޖެއިން ޙައްޖަށް ގެންދިޔަ މީހުންގެ ތެރޭގައި 1434 ވަނަ އަހަރު މަލީޝާ ޖަމާއަތަށް ފައިސާ ދައްކާ ޙައްޖަށް ދެވިފައިނުވާ ފަރާތްތައް ހިމެނެއެވެ. އެމީހުން ޙައްޖަށް ފޮނުވާފައިވަނީ އެއަހަރު އިސްލާމިކް މިނިސްޓްރީއަށް ރިޒާވްކޮށްފައިވާ ކޯޓާގެ ތެރެއިންނެވެ.
