އިއްޔެ ބޭއްވުނު ރައްޔިތުންގެ މަޖިލިހުގެ ގުރައިދޫ ދާއިރާގެ ބައި އިލެކްޝަންގައި އެމްޑީޕީގެ ކެނޑިޑޭޑަށް ލިބުނު ތާރީޚީ ކާމިޔާބީ ފާހަގަކޮށް، އިންތިޚާބު ކާމިޔާބު ކުރެއްވި އިބުރާހިމް ޝާޒުއަށާއި އެމްޑީޕީއަށް ގިނަބަޔަކު މަރުހަބާ ކީއިރު، އެޕާޓީގެ ރައީސް މުހައްމަދު ނަޝީދު ޕާޓީގެ މި ތާރީޚީ ކާމިޔާބީ ފާހަގައެއް ނުކުރެއްވިއެވެ.
އިއްޔެ ބޭއްވުނު ގުރައިދޫ ދާއިރާގެ ބައި އިލެކްޝަން އެމްޑީޕީން ކާމިޔާބު ކޮށްފައިވަނީ 14 އަހަރުވަންދެން އެ ދާއިރާގެ ގޮނޑި ފުރުއްވަމުން ގެންދެވި މެމްބަރު، އިބުރާހުމް ރިޒާ އަވަހާރަވުމާއި ގުޅިގެން ބޭއްވި އިންތިޚާބުގައި ރިޒާގެ ކޮއްކޮ ހުސެއިން ރިޒާއާއި ވާދަކޮށް 114 ވޯޓުގެ ތަފާތަކުންނެވެ.
އިލެކްޝަންސް ކޮމިޝަނުން މިހާރު އާންމު ކޮށްފައިވާ ވަގުތީ ނަތީޖާއަށް ބަލާއިރު، އެމްޑީޕީގެ ކެނޑިޑޭޓް އިންތިޚާބު ކާމިޔާބު ކުރައްވާފައިވަނީ ވޯޓުލީ 2،755 މީހުންގެ ތެރެއިން 1،346 ވޯޓު ކާމިޔާބު ކުރައްވައިގެންނެވެ. އެއީ 49 އިންސައްތަ ވޯޓެވެ. ދެވަނައަށް އައި ޕީޕީއެމްގެ ކެނޑިޑޭޓަށް ކާމިޔާބު ކުރެއްވުނީ 1،226 ވޯޓެވެ. އެއީ 45 އިންސައްތަ ވޯޓެވެ. ތިންވަނައަށް ދިޔަ އެމްއެންޕީގެ ކެނޑިޑޭޓަށް ހޯއްދެވުނީ 122 ވޯޓެވެ.
މިއީ މި ދާއިރާގެ އިންތިޚާބު އެމްޑީޕީއަށް ކާމިޔާބު ކުރެވުނު ފުރަތަމަ ފަހަރުވެސްމެއެވެ.
އެމްޑީޕީގެ މި ތާރީޚީ ކާމިޔާބީއާއި ގުޅިގެން ނަޝީދު ހަނު ހުންނެވިއިރު، އިންތިޚާބުން އެމްޑީޕީގެ ކެނޑިޑޭޓު ބަލިކުރުމަށް ނަޝީދުގެ އިތުރުން ނަޝީދުގެ ފެކްޝަންގެ އިސް ފަރާތްތަކުން މަސައްކަތް ކުރިކަމުގެ ތުހުމަތުވެސް އެޕްޑީޕީގެ ޗެއަރޕާސަން ފައްޔާޒު އިސްމާއިލް ވަނީ ކުރައްވާފައެވެ.
އެމްޑީޕީގެ މި ތާރީޚީ ކާމިޔާބީއަށްފަހު އިދުކޮޅު ކެނޑިޑޭޓުވެސް އެމްޑީޕީއަށް މަރުހަބާ ވިދާޅުވެފައިވާއިރު، ނަޝީދު ފެކްޝަންގެ އިސް އެއްވެސް ފަރާތަކުން ޕާޓީއަށް ލިބުނު މި ކާމިޔާބީ ފާހަގަ ކޮށްފައެއް ނުވެއެވެ.
ނަޝީދު އެމްޑީޕީގެ ކާމިޔާބީ ފާހަގަ ކޮށްފައި ނުވާއިރު، މިހާރު ގެންދަވަނީ ޖުމުހޫރީ ޕާޓީއާއެކު ކޯލިޝަން ހައްދަވައިގެން ކުރިޔަށް އޮތް ރިޔާސީ އިންތިޚާބުގައި ރައީސް ސާލިހު ބަލިކުރެއްވުމަށް މަސައްކަތް ކުރައްވަމުންނެވެ.
