އިސްރާއީލުގެ ވެރިރަށް ޓެލްއަވީވްގައި ދުއްވަމުން ދިޔަ ކާރަކާއި އެހެން ކާރެއް އެކްސިޑެންޓް ކޮށްގެން ފަތުރުވެރިޔަކު މަރާލާ އަދި އެ ހާދިސާގައި 5 މީހަކަށް އަނިޔާވެއްޖެއެވެ.
އިސްރާއީލުގެ މުވައްސަސާތަކުން ހާމަކޮށްފައިވާ ގޮތުގައި މި ކާރަކަށް އަމާޒުކޮށް ދީފައިވާ މިހަމަލާގައި މަރުވެފައިވަނީ އިޓަލީގެ ފަތުރުވެރިއެކެވެ. އަދި އިޓަލީގެ އިތުރު 5 ފަތުރުވެރިޔަކަށް އަނިޔާވެ، އިނގިރޭސި ފަތުރުވެރިޔަކަށްވެސް މިހާދިސާގައި ވަނީ އަނިޔާވެފައެވެ.
އިސްރާއީލުގެ ސަލާމަތީ ފަރާތްތަކުން ބުނެފައިވަނީ މި ހަމަލާ ދީފައިވަނީ އިސްރާއީލުގެ އަރަބި ދަރިކޮޅުގެ، އެގައުމުގެ ކަފްރު ގަސެމް ޓައުނުގެ މީހެއް ކަމުގައެވެ.
އެކްސިޑެންޓް ކުރި ކާރު ދުއްވަމުން އައި ޑްރައިވަރު އޭނާގެ ހަތިޔާރު ނަގަން އުޅެނިކޮށް، އެ ސަރަހައްދުގައި ހުރި ފުލުސް އޮފިސަރަކުވަނީ ބަޑިން ހަމަލާދީ ޑްރައިވަރު މަރާލާފައެވެ. އެކްސިޑެންޓްވި ކާރު ވިއްސައިގެންގޮސް މަޑު ޖެހުނީ ކައިރީގަ އޮތް ޕޭވްމަންޓް މަތީގައެވެ. މިހަދިސާ ހިނގުމާއެކު އިސްރާއީލުގެ ފުލުހުންވަނީ ސަރަހައްދު ބަންދުކޮށްފައެވެ.
މިއީ މިހަފްތާގެ ހުކުރުދުވަހު އިސްރާއީލުގެ ރައްޔިތުންނަށް އަމާޒުކޮށް ދެވެނު ދެވަނަ ހަމަލާއެވެ. އިސްރާއީލުން ހިފާފައިވާ ހުޅަނގު އައްސޭރީގައި ދުއްވަމުންދިޔަ ކާރެއްގައި އިން މީހަކު ވަނީ އެގައުމުގެ ދެ އަންހެނަކަށް ހަމަލާދީ ދެ އަންހެނުންވެސް މަރާލާފައެވެ. މިހަމަލާ ދިން މީހާވަނީ ކާރެއްގައި ފިލާފައެވެ. އިސްރާއީލުގެ ފުލުހުން ދަނީ އެމީހާ ހޯދުމަށް ޚާއްސަ އޮޕަރޭޝަނެއް ހިންގަމުންނެވެ.
މިހާދިސާތަކަށްފަހު އިސްރާއީލުގެ ބޮޑުވަޒީރު ނަތަންޔާހޫވަނީ އެގައުމުގެ ރިޒާވް ބޯޑަރ ޕޮލިސް ޔުނިޓްތައް މޮބިލައިޒްކޮށް، އިތުރު ސިފައިން މަގުތަކަށް ނެރުމަށް އިސްރާއީލް ޑިފެންސް ފޯސްއަށް އަމުރު ކޮށްފައެވެ.
އިސްރާއީލުގެ ފުލުހުންގެ ފަރާތުން ބުނެފައިވަނީ ކުރިޔަށް އޮތް ދުވަސްތަކުގައި ބޯޑަރ ފުލުހުންގެ 4 ރިޒާވް ކުންފުންޏަކުން ފުލުހުން މަގުތަކަށް ނެރޭނެ ކަމުގައެވެ.
އިސްރާއީލާ ފަލަސްތީނުގެ ރައްޔިތުންނާ ދެމެދު މަސްރަހު ހޫނުވެފައި ވަނީ، އިސްރާއީލު ސިފައިން އަލް އަގްސާ މިސްކިތަށް ހަމަލާ ދިނުމާއި ގުޅިގެންނެވެ.
