ރާއްޖޭގެ ރައްޔިތުންނަށް ސީދާ ގޮތުން މަންފާލިބޭ ގޮތަށް ރާއްޖޭގެ ފަތުރުވެރިކަމުގެ ދައިރާ ފުޅާކުރެވިފައިވާކަމަށް ޓުވަރުޒަމް މިނިސްޓަރ ޑރ.މައުސޫމް ވިދާޅުވެއްޖެއެވެ.
މިސަރުކާރުން ތަޢާރަފްކުރި ހޯމް ސްޓޭ ފަތުރުވެރިކަން އެންމެ އެކަށީގެންވާ ގޮތެއްގައި ކުރިއަށް ނުދާތީ ގިނަ ބައެއްގެ ފާޑުކިޔުން ވަނީ ސަރުކާރަށް އަމާޒުވެފައެވެ. ޚާއްސަކޮށް ހޯމް ސްޓޭގެ ސަބަބުން ސަރުކާރުން އުންމީދުކުރި މިންވަރާއި ގާތަށްވެސް ރަށްރަށުގެ ރައްޔިތުންނަށް އާމްދަނީ ނުލިބޭތީ އެކަމުގެ ކަންބޮޑުވުންވެސް ބައެއް ފަރާތްތަކުން ދަނީ ފާޅު ކުރަމުންނެވެ.
މިކަންކަމަށް ރިޢާޔަތްކޮށް މިނިސްޓަރ މައުސޫމް ކުރެއްވި ޓުވީޓެއްގައި ވިދާޅުވީ މިސަރުކާރުން ރާއްޖޭގެ ރައްޔިތުންނަށް ފަތުރުވެރިކަމުން ނަފާއާއި މަންފާ ލިބޭނެ އެތައް މަގެއް ފަހިކޮށްދީފައިވާކަމަށެވެ. ރައްޔިތުންގެ ފަތުރުވެރިކަން މިހާރު ރާއްޖޭގެ ހުރިހާ އަތޮޅަކަށް ފުޅާވެ، 118 ރަށެއްގައި މިހާރުވެސް ޚިދުމަތް ދެމުންދާކަމަށެވެ.
ފަތުރުވެރިކަމުގެ ނަފަޔާއި މަންފާ ސީދާ ރައްޔިތުންނަށް ލިބޭ، ކޮމިއުނީޓީބޭސްޑް ޓޫރިޒަމް (ރައްޔިތުންގެ ފަތުރުވެރިކަން) މިހާރު ރާއްޖޭގެ ހުރިހާ އަތޮޅަތަކާއި ސިޓީތައް ހިމެނޭގޮތައް 118 ރަށަށްވަނީ ފުޅާވެފަ. 909 ފެސިލިޓީގައި 16،300 އެނދު. އެއީ ރައްޖޭގެ ޖުމްލަ އެނދުގެ %27.
– މިނިސްޓަރ މައުސޫމް ވިދާޅުވިއެވެ.
ހޯމް ސްޓޭ ފަތުރުވެރިކަމަކީ، އެރަށެއްގައި ދިރިއުޅޭ ބަޔަކާއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ. މި ބާވަތުގެ ފަތުރުވެރިކަމަކީ ދުނިޔޭގެ ޤައުމުތަކުގައި ކާމިޔާބު ކަމާއެކު ހިންގާ އެއް މޮޑެލެވެ. ނަމަވެސް ރާއްޖޭގައި މިމޮޑެލް އެންމެ އެކަށީގެންވާ ގޮތެއްގައި ކުރިއަށް ނުދާތީ ޤާނޫނަށް ގެންނަންޖެހޭ އިސްލާހުތައް ގެނައުމުގެ މަސައްކަތް ކުރަމުންދާކަމަށް ޓުވަރިޒަމް މިނިސްޓްރީީން މީގެ ކުރިންވެސް ވަނީ ބުނެފައެވެ.
ހޯމް ސްޓޭ އަދި އެކަށީގެންވާ ގޮތަކަށް ކުރިއަށް ނުދިޔަ ނަމަވެސް ރާއްޖޭގެ ފަރުރުވެރިކަމުގެ ދާއިރާ ދަނީ ވަރަށް ބާރަށް ކުރިއަރަމުންނެވެ. ރާއްޖޭގެ ފަތުރުވެރިކަމުގެ ސިނާއަތަށް ލިބެމުންދާ ބޮޑެތި ކުރިއެެރުންތަކާއެކު މެދު ރާސްތާގައި ރާއްޖޭގެ އިޤްތިޞާދު 6 އިންސައްތައިން ކުރިއަރާނެކަމަށް ލަފާކުރެވޭކަމަށް ވޯލްޑް ބެންކުންވެސް ވަނީ ބުނެފައެވެ.
ރާއްޖޭގެ އިޤްތިޞާދުގެ 3 ބައިކުޅަ 1 ބައި ފަތުރުވެރިކަން ހިއްސާކުރާއިރު ކޯވިޑަށްފަހު އެ ސިނާއަތް ކުރިން އޮތް ހިސާބަށް ވަރަށް އަވަހަށް ގެންދެވިފައިވާކަން ވޯލްޑް ބޭންކުން ފާހަގަކުރެއެވެ. އަދި ރަޝިޔާ-ޔޫކްރެއިން ހަނގުރާމައިގެ ސަބަބުން ފަތުރުވެރިކަމަށް އަސަރުތަކެއް ކުރާނެކަމަށް ބެލުވުނަސް، ރަޝިޔާއިން އަންނަ ފަތުރުވެރިންގެ އަދަދު އިތުރުވަމުންދާކަން ވޯލްޑް ބެންކުން ފާހަގަކުރެއެވެ.
ވޯލްޑް ބެންކުން ފާހަގަކުރާ ގޮތުގައި ތަރައްޤީގެ ގިނަ މަޝްރޫޢުތަކެއް ހިންގަމުންދިއުމުގެ ސަބަބުން، އެކަމުގެ މާލީ ބުރަތަކެއް ސަރުކާރުން އުފުލަންޖެހެއެވެ. އަދި ތެލާއި، ކާޑާއި، ހިލޭ ސިއްހީ ފަރުވާއާއި ބޭސް ފޯރުކޮށްދިނުމަށް ސަރުކާރުން ކުރާ ހަރަދުތައް ކުޑަކުރުމަށް، ސަރުކާރުން ދޭ ސަބްސިޑީތައް މިހާރަށް ވުރެ ހަރުދަނާ އުސޫލެއްގެ ތެރެއިން ހަމަޖެއްސުމަށްވެސް ވޯލްޑް ބެންކުން ވަނީ ލަފާދެއްވާފައެވެ.
ކޯވިޑަށްފަހު ރާއްޖޭގެ އިޤްތިޞާދަށް ބޮޑެތި ކުރިއެރުންތަކެއް ލިބެމުންދާކަމަށް ވޯލްޑް ބެންކުގެ އިތުރުން، ބައިނަލްއަޤްވާމީ އެހެން މާލީ އިދާރާތަކުންވެސް ދަނީ ފާހަގަކުރަމުންނެވެ. ސަރުކާރަށް ފާޑު ކިޔާ ބައެއް ފަރާތްތަކުން ދަރަނީގެ ވާހަކަ ދެއްކިނަމަވެސް، ދައުލަތަށް ނަގާފައިވާ ދަރަނިތައް ދެއްކުމަށް އެއްވެސް ދައްޗެއް ކުރިމަތިނުވާކަމުގެ ޔަގީންކަން ސަރުކާރުން ދަނީ ރައްޔިތުންނަށް ދެއްވަމުންނެވެ.
