ހއ.މާފިނޮޅުގައި އެޅުމަށް ނިންމި އެއަރޕޯޓްގެ މަސައްކަތް، ހޯރަފުށްޓާއި ގުޅުވާލައި ތަރައްޤީ ކުރަމުންދާ އެއާޕޯޓް އަވަށްޓެރި އިންޑިޔާގެ އެއްވެސް ބަޔަކާއި ހަވާލުކޮށްފައި ނުވާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ޖަލްސާގައި ހޯރަފުށި ދާއިރާގެ މެމްބަރ އަހުމަދު ސަލީމް ވަނީ އިދިކޮޅު ފަރާތްތަކުން ހޯރަފުށި އެއަރޕޯޓް އިންޑިޔާ ކުންފުންޏަކަށް ދިން ކަމަށް ބުނެ ފަތުރަމުންދާ ވާހަކަތަކާއި ގުޅިގެން ސުވާލުކުރައްވަފަ އެވެ. މި ސުވާލުގެ ޖަވަބުގައި މިނިސްޓަރ އަމީރު ވިދާޅުވީ ހޯރަފުށި އެއަރޕޯޓް އިންޑިޔާގެ އެއްވެސް ބަޔަކާއި ހަވާލުކޮށްފައިނުވާ ކަމަށެވެ.
ހއ.މާފިނޮޅުގައި އެޅުމަށް ނިންމި އެއަރޕޯޓްގެ މަސައްކަތް، ހޯރަފުށްޓާއި ގުޅުވާލަން ސަރުކާރުން ނިންމީ ފެހިކަންގަދަ މާފިނޮޅު އެ ގުދުރަތީ ރީތިކަންމަތީ ބޭއްވުމަށެވެ. ހޯރަފުށި އެއަރޕޯޓްގެ ބިން ހިއްކުމުގެ މަސައްކަތް ފަށާފައިވަނީ މިދިޔަ 2019ވަނަ އަހަރުގެ އޭޕްރިލް މަހުއެވެ. އެރަށުން ހިއްކާފައިވާ ސަރަޙައްދަށް އިތުރު 16 ހެކްޓަރުގެ ބިން އިތުރުކުރުމަށް ބިން ހިއްކުމުގެ މަސައްކަތް ހަވާލުކުރީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީއާއެވެ.
އެތެރޭގެ އުދުހުންތަކަށް ޚާއްސަކޮށްގެން ހަދާ ހޯރަފުށީ އެއަރޕޯޓް މަޝްރޫޢުގެ ހުރިހާ މަސައްކަތެއް ކުރިއަށްގެންދަނީ އެމްޓީސީސީންނެވެ. ބިންހިއްކުމާއި، ހިއްކި ސަރަޙައްދު ޙިމާޔަތްކުރުމުގެ މަސައްކަތުގެ އިތުރަށް، އެއަރޕޯޓް އިމާރާތްތަކުގެ މަސައްކަތްވެސް މިހާރުވަނީ އެމްޓީސީސީއާއި ހަވާލުކޮށްފައެވެ.
ހޯރަފުށީ އެއަރޕޯޓް މަޝްރޫޢުގެ ތެރެއިން އެއަރޕޯޓް ރަންވޭ ތަރައްޤީކުރުމުގެ މަސައްކަތްކުރުމަށް މިހާރުދަނީ ކުރަމުންނެވެ. ހޯރަފުށީ އެއަރޕޯޓް ރަންވޭގައި ތާރުއެޅުމުގެ މަސައްކަތް 28 އޮގަސްޓްގައި ވަނީ ފަށާފައެވެ.
