ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އަމަލު ކުރައްވަނީ ހިކުމަތްތެރިކަމާއި ކެތްތެރިކަމާއެކު މީހަކަށް އަނިޔާވެރިނުވެ ކަމުގައި ރައީސުލްޖުމްހޫރިއްޔާގެ އޮފީހުގެ މިނިސްޓަރ އަހުމަދު ސަމީރު ވިދާޅުވެއްޖެއެވެ.

ޖުމްހޫރީ ޕާޓީގެ ސްލޮޓްގައި ރައީސް އޮފީހުގެ މިނިސްޓަރުކަމަށް އައްޔަން ކުރި ސަމީރު ވަނީ ރިޔާސީ އިންތިޚާބަށް ޖުމްހޫރީ ޕާޓީން ވަކި ވާދަ ކުރުމަށް ނިންމި ހިސާބުން އެޕާޓީން އިސްތިއުފާ ދެއްވާފައެވެ. ސަމީރު ވިދާޅުވީ އޭނާ ތާއީދު ކުރައްވާނީ ރައީސް ޞާލިހަށް ކަމަށާއި، ރައީސަށް ތާއީދުކޮށް ކެމްޕެއިންގައި ހަރަކާތްތެރިވާއިރު ކޯލިޝަންގަި އޮތް އެހެން ޕާޓީއަކުން ވާދަކުރާއިރު އެޕާޓީގައި ހުރުމަކީ އެންމެ ރަނގަޅު ގޮތަށް ނުވާތީ ޖޭޕީން އިސްތިއުފާ ދެއްވީކަމަށެވެ.

ރޭ ކ. ގުޅީގައި، ގުރައިދޫ ދާއިރާގެ ބައި އިލެކްޝަންގެ ކެމްޕޭން އެމްޑީޕީން ރަސްމީކޮށް ފެށުމަށް ބޭއްވި ޖަލްސާގައި ވާހަކަދައްކަވަމުން ސަމީރު ވިދާޅުވީ ރިޔާސީ އިންތިޚާބަށް ކައިރިވަމުންދާ ވަރަކަށް އިވޭ އަޑުތަކާއި ދައްކާ ވާހަކަތައް ގިނަ ވާނެކަމަށެވެ. ނަމަވެސް ގަބޫލު ކުރަންޖެހޭ ހަގީގަތަކީ ރާއްޖެއަށް ހަމަޖެހުމާއި ސުލްހަވެރިކަން ގެނެސްދެއްވި ވެރިއަކީ ރައީސް ޞާލިހުކަމަށެވެ.

އޭނާ ވިދާޅުވީ ފަހުގެ ތާރީހެއްގައި ރާއްޖޭގެ އިޤްތިޞާދަށް ކުރިމަތިވި ކޯވިޑް މެނޭޖްކުރުން ވިޔަސް، އިގްތިސާދު ކުރިއަރުވަން ކަމަށްވިޔަސް ރާއްޖެއަކީ މިއަދު ދުނިޔޭގެ ނަމޫނާއެއްކަމަށެވެ. އޭގެއިން ދައްކުވައިދެނީ ރައީސް ސޯލިހުގެ ހިކުމަތްތެރިކަމާއި، ހިންގުންތެރިކަން ކަމުގައި އޭނާވިދާޅުވިއެވެ. ތަފާތު ޚިޔާލާއި ވިސްނުމުގައި ރައީސް ޞާލިހު ހޯދި ކާމިޔާބީތަކުގައި އަމިއްލަ ޕާޓީތެރެއިންނާއި، އިދިކޮޅު ފަރާތްތަކުން ކުރިމަތިކުރި ގޮންޖެހުންތަކާއިއެކު ރައީސް ޞާލިހު މަސައްކަތް ކުރެއްވީ ވަރަށް ހިކުމަތްތެރި ކަމާއިއެކު ކަމަށް ސަމީރު ވިދާޅުވިއެވެ.

އޮންނަ ޔަގީންކަމަކީ ރައްޔިތުންނަށްޓަކައި އަޅަންޖެހޭ ކޮންމެ ފިޔަވަޅެއް އެއީ ގާތް މީހަކު ކަމުގައިވިޔަސް، ގާތް ރައްޓެއްސަކު ކަމުގައިވިޔަސް ނުބައްލަވާނެ. މިއަދު ހާލަތުގައި ކުރަންޖެހުނު ކޮންމެ ކަމެއް ކުރައްވާނެ. އަޅުގަނޑުމެން އެބައުޅެން ވަރަށް ލަސްވެގެން. ވަރަށް ޝަކުވާވެސް ކުރަން. މިނިސްޓަރު ފައްޔާޒު އަރިހުވެސް އެބަ ދަންނަވާ މިވެނި އެވެނި ކަމެއް ކޮންއިރަކުހޭ ކުރާނީ. ރައީސް ވިދާޅުވާނެ އަދި މާ އަވަހަށޭ ތިއުޅެނީ. އަދި މަޑުކޮށްލާށޭ. ހިކުމަތްތެރިކަމާއި ކެތްތެރިކަމާއެކު މީހަކަށް އަނިޔާވެރިނުވެ ކުރިޔަށް މިދަނީ.

– ސަމީރު ވިދާޅުވިއެވެ.

ސަމީރު ވިދާޅުވީ ރައީސް ޞާލިހަށް ދެވަނަ ދައުރެއް ދޭންޖެހޭކަމަށާއި އެއީ ކުޑަ ރަށެއް ބޮޑު ރަށެއް ބެއްލެވުމެއްނެތި ތަރައްގީ ގެނެސްދެއްވާތީކަމަށެވެ. ކިތަންމެ ވަރަކަށް ބަހުން ޖެހިއަސް، ގައު އުކިއަސް ރައީސް އެއްޗެއް ވިދާޅުނުވާނެކަމަށާއި ނަމަވެސް އޮންނަ ޔަގީންކަމަކީ ރައްޔިތުންގެ ހައްގުގައި އަޅަން ޖެހުނު ކޮންމެ ފިޔަވަޅެއް ވެސް ރައީސް އަޅުއްވާނެކަންކަމަށެވެ.